الجمعة، يونيو 27، 2008

ملهمش ذنب

ازيكم عاملين ايه بصراحه بقالي كتير مكتبتش وده لان مفيش اي قضيه اثارت ذهني

لكن وانا في المترو وكالعاده المترو ده في الدنيا كلها الواحد بيعرف الدنيا فيها ايه من المترو

المهم ادخلي ولخصي يانيمو عشان مبنحبش الرغايين

حاااضر

وانا راكبه المترو وكنت قاعده وهلكانه موت كان اخر يوم في امتحاني ومكنتش بقي مركزه

فليقيت بنوته صغننه خااااالص حوالي 3 سنين

رايحه جايه في العربيه بتاعت السيدات وطبعا في ستات كبار بينفخوا ماهو مش عاوزين دوشه

البنوته دي كانت تقريبا لابسه لبس رث جدا ومتسخه جدا مع ان عنيها والله خضرا ومستويه ولو استحمت هتبقي قمر

البنت جميله لكن استفذني حالها وعماله اقول في نفسي

ناس يخواتي نفسهم في حتته طفل وبيصرفوا الوفات عشان يجبوه

وناس راميين عيالهم في الشارع

مش مقدريين النعمه طب والحل جتلي فكره مجنونه انا عارفه اني مش ممكن انفذها بس اهي فكره

اني اخد البنت دي اوديها القسم واشوف طريقه واخدها اربيها بس طبعا انا جاهله في الاجراءات يوه اقصد الروتينيات

طب لو البنت دي ليها ام ليه سيباها كده ليه سيباها وهي طفله تواجه الدنيا بالشكل الفج ده لو مش عاوزاها مكنتش جابتها من الاساس

فالبنوته دي اثارت موضوع اطفال الشوارع انا عارفه اني نزلته قبل كده لكن بجد كل يوم الموضوع بيزيد ومفيش حل جزري ليه

اطفال زي القمر بيشحتوا عشان المعلم بتاعهم ياخد الفلوس

هي حتي فترات الطفوله الناس بتستهون بيها

ماعلينا يانيمو من الكلام ده بس قولي انتي عاوزه توصلي لايه

عاوزه اعرف لو لاقيت طفل زي البنوته دي ممكن فعلا تاخدها وتنضفها وتربيها وتحنو عليها في ظل الظروف اللي بتواجهنا

طيب لو مش قدرت ممكن تعمل عمل ايجابي انك تاخدها لاقرب ملجا او قسم

طيب ولو ده حل غلط طيب ايه الحل للظاهره دي من وجهه نظركم

معلش دوشتكم بس الموضوع بجد خطير ده جيل المستقبل ياناس

انا حبيت انزل الموضوع بدون اي احصائيات ولا اي شي وخليته كدردرشه بسيطه

بجد اتمني حل للظاهره

مع تمنياتي بالتوفيق للجميع

نيمو

0 كلام قلوبهم: