الاثنين، يناير 12، 2009

يوم من عمري

في الاول كده طبعا كتير سال ايه تك تك تك

اللي نزل

ده كان تنويه عن المدونه الجديده حالتي في اغنيه

وكانت هتبقي مفتوحه

للجميع لكن لاخر لحظه قلت تبقي خاصه افضل

وبعدها تم الغاءها نهائيا

اما الاجازه اللي اخدتها كانت للاستجمام

وترتيب الافكار وللتفرغ لعمل بحث شاغلني

نيجي بقي لليوم اللي بجد بكون اسعد مخلوقه في العالم

********

انا في الغالب بنام 6 الصبح وبصحي علي الضهر

وعلي 7 الصبح كده لقيت النور اتفتح واللي عمال

يقولي كيارا ( اسم الدلع بتاعي )

انا بقي بفتح عين وبقفل عين عشان النور

مين هناك

لقيت اللي بتقول

علي اساس اني حرامي وانتي العسكري

فوقي يابت عاوزه اقولك كلمتين

ايه بس ياماما سبيني انام وبعدها قوليلي اللي انتي عاوزاه

قلتلي خالتك اتصلت بيا وهدي وندي ومنه جايين النهارده

مش تنامي اوي عشان لو خبطو

انا قلتلها هما بيجو الضهر مش تقلقي

ونمت تاني

لحد اما لقيت ايد صغننه عماله تخبط فيا

وحد صغنن كدا عمال يتنطط عليا

انا قمت مفزوعه في ايه

ولقيت بقي نهال وهدي وندي

جم يصحوني ويجبوني

واللي فتحلهم الباب كان محمد اخويا

بقولهم هي الساعه كام

نهال نطقت وقالت 9

قلتلها انتو جايين بدري كده ليه مش قلتوا امبارح ليه

انكم جايين كنت نمت بدري يالهوي عليكو

ولقتهم بيضحكوا عليا وانا بفتح عين واقفل في عين

ولقيت اللي جابت ازازه

وتشششششششششششششششششششششششش

هههههههههههههههههه

متخيلين بقي الصحيان علي ايه

ازازه وفي وشك علطول

المهم غسلت وشي وصليت الضحي

ونزلنا طبعا اول حاجه نروح عليها ميييييييييين

ام مينا

قلتلهم اشترو انتو وانا بعديكو

هما لا اشتري انتي الاول

قلتلهم ماشي

انا اشتريت مصاصتين بالبرتقال وبوزو

طبعا هما ورايا وجابو زيي

وجري علي تيتا

اول اما دخلت سلمت علي خالتي وطبعا خناقه كل مره

انتي هتفسدي العيال

مصاصه ايه اللي جيبهالهم جيبي لهم حاجه مفيده

انا بقي

بت ياندي بت ياهدي مين اللي اختار

هدي انتي

هههههههههههههههههههههه

يخربيتكم هتودوني في داهيه

يعني انا اللي قلتلكم جيبوا مصاصه ندي قالت لا

المهم ولسه بنتناقش مين لمحتني

منه

وصررررريخ

مش سكتت لما شلتها

وانا بقي شيلاها الغيره تدب في قلب ندي وهدي

وكان في تسلق اشجار بالضبط عشان يوقعوا منه

وانا بقي الحقوووووووووني حد ياخد منه هتقع مني

يقوم مين يلقفها محمود ابن خالي

طبعا محمود ده برغم اننا جيران الا اني مش بشوفه

الا من السنه للسنه

وكنت انا وهو حبايب جدي الله رحمه

كان بس حد يقول بم لينا

كان جدي هو اللي بيقفله حتي لو كان مين

المهم نكمل

طبعا قولتله محمود عاش من شافك يبني

قالي عاش من شافك انتي انا مرزي هنا

كل يوم انتي اللي مش بنشوفك

قولت له فوتها بقي

قالي منا مفوت

المهم قال انا نازل اجيب فطار تحبي اجبلك ايه

قولتله ماننت عارف مش بفطر قالي لسه زي مانتي

قولتله طبعا

هو خرج من هنا

وولقيت حاجه بتشدني

كان ميييييييييين

كانت هدي وندي ونهال وبيقولولي ايه

يلا نلعب انا قلت ع الصبح

قالوا ااااااااااااااااااه علي الصبح

وقولتلهم نلعب استغمايه

ايه رايكو

وافقوا ووقفت البت ندي مستغميه

وانا رحت جوا الدولاب استخبيت

وهما بقي خلاص قفشو في بعض ويقولوا فين كيارا

فين كيارا طبعا انا طفشانه لحد اما زعقوا وقالوا اظهري بقي

محمود بقي جه ومعه الفطار فطر

ونزل تاني يلعب مع اصحابه تحت

طبعا دخلنا في معركه الاكل

هما مش عاوزين ياكلو وعاوزين يلعبو

طب اعمل ايه

بقينا نلعب بالاكل واقول مين هيجي ياخد دي

وبقوا بدل اما كانو مش عاوزين ياكلوا بقي يجروا ورايا عشان ياكلو

وبعدها لعبنا كوتشينه وكان الشايب

كل شويه يجي عندي وشغالين احكام عليا

عااااااااااااااااااااااااااا

الساعه بقت 3 خدوا بالكو انا تقريبا بلعب من 9.30 لحد 3 العصر

ومش نايمه المهم انا تعبت وقولتلهم انا عاوزه ارتاح ودول مكن

يالهوي

رفضوا الراحه

فين وفين علي اما اقنعتهم

اننا نتفرج علي اي حاجه علي الكمبيوتر

وافقوووووووووووووووو هيييييييييييييييييييه

اتفرجنا علي شركه المرعبين المتحده

وتيمون وبومبه

وتوم جيري

ونيموووووووووووووووووووووووووو حبيبي

الاسم اللي لازمني كتير من حياتي وكتير بيناديني بيه

والجميل ان في مواعيد الصلاه كنا بنتوضي ونصلي احنا

الاربعه جنب بعض كنت ببقي فرحانه اوي بشكل ندي وهدي

وهما بيحبوا الصلاه

طبعا كانت الساعه بقت 6

وماما جت بقي

المهم اول اما بيشوفوا ماما

بيعرفو اني قربت امشي

فضلنا في الاوضه جوا شغالين نزغزغ بعض ونجري ورا بعض

وقلنا نشغل اغاني بقي ونشوف مواهب

ندي وهدي عشان مصممين يرقصو

وشغلنا اغنيه مش فاكره اسمها

وندي وهدي ادوها بقي وصورتهم بالموبايل

لحد اما جت الساعه 8 وبابا جه طبعا بابا جه لازم هدؤؤؤؤ

ومش في بقي الهيصه اللي كنا عاملينها

وخرجنا برا نشرب العصير

وساكتين خالص وعلي 9 بابا قال يلا

طبعا لقيت اااالعياط والصويت وحاجه بتنكد عليا اوي

هدي

تمسكني من رجلي

وندي تنط عليا ومش عاوزه تسبني

ونهال تقفل الباب بالمفتاح

وتخبيه ومش بعرف اتحرك وافضل حضانهم

واقولهم لو بتحبوني بلاش عياط وهما بقي والله بيعيطو

بحرقه بجد مش قارده انسي اللحظه دي

وطبعا كله بيتجمع ويمسك هدي وندي وبيشخطو في نهال

ياعيني البت عشان الكبيره بيجوا عليها ويشخطو

وبعرف انهم بيفضلوا يعيطوا لحد الساعه 12 وهما بقي مروحين

بيقولوا لخالتو لوجوز خالتو بيت كيارا اهو يلا نروح

طبعا بيفضلوا باصيين علي البلكونه ويصرخوا في الشارع

يعني اليوم بجد بيبقي اجمل يوم في حياتي بحس

فيه ان في ناس بتحبني عشاني انا

بتبقي فرحانه معايا

0 كلام قلوبهم: