السبت، يناير 10، 2009

انا ذنبى ايه

انا ذنبـــــــــي ايه 

 انا ذنبــــــــــــي ايه بينكم

مش انتوا اللي اختارتو بعض

مش انتوا اللي اتجوزتو من بعض

طب ليه جبتوني مدام هتحرموني من حد منكم

ليه اشوف حد فيكم بيشوه صوره التاني قدامي

قولي يابابا انا ذنبي ايه انك سيبت ماما

قوليلي ياماما انا ذنبي ايه انك سيبتي بابا 

كان نفسي اعيش بينكم واقول بابا وماما

امي انا بشوف اصحابي وكل واحد معاه مامته وباباه 

نفسي اشوف بابا زي كل الناس 


يا الف آآآآآآآآآآآآه بقولها وانا بعيد عن حضنك ياماما 


يا الف آآآآآآآآآه بقولها وانا بعيد عن حضنك يابابا



كنتوا اختارتوا بعض ليه طالما مش شيفين نفسكم مناسبين بعض



اكتشفتي دلوقتي ياامي بعد اما جيت الدنيا ان بيئه بابا غير بيئتك


اكتشفت دلوقتي يابابا ان امي مش نفعاك


الظروف هي هي مش اتغيرت


لا امي اتغيرت عن زمان 


ولا انت بيئتك اتغيرت


لما ماكنتوش نافعين لبعض اتجوزتوا ليه 


جبتوني ليه كفايييييييييييييييييييييييه ياماما بلاش تجيبي سيره بابا بحاجه وحشه ده بابا مش معقول كان كل الحياه جحيم مفيش مره طبطب عليكي مفيش مره اخدك في حضنه وحسسك بامانه 


كفاييييييييييييييييييييييييييه يابابا بلاش تجيب سيرتها بحاجه وحشه دي امي اللي في رحمها شالتني ومن حناناها رضعتني وفي مرضي شالتتي 


نفسي اشوفك يابابا واحشني


نفسي اشوفك ياامي من تاني

ارجعوا لبعض وضموني بينكم من تاني

كان نفسي اعيش بينكم زي اي طفل من اصحابي في المدرسه 

كان نفسي اقول بابا من غير مااخاف منك ياامي لا تبصيلي او تضربيني 

كان نفسي اقول ماما من غير مالاقيك بتشخط فيا يابابا

وحشتّني ضمتكم اوي اوي 


رساله لكل اتنين هيتجوزوا يخلوا بالهم ان اختيارهم ده مش متوقف عليه حياتهم هما وبس 

لا وحياه اولادهم بعد كدا مش عاوزه حد يتعذب ويشوف الحرمان اللي شفته 

ومازلت بشوفه بصرخ بالف صووووووووووت لما تفكروا في انفصال

فكروا ان القرار مش يخصكم لوحدكم في ناس من دمكم مترتب عليهم حياتهم بعد قراركم ده 

********

طبعا كان نفسي اطلع كل اللي جوا اعز طفله ليا انا قلت حاجات بسيطه من اللي بتعانيه بحاول اخفف عنها واقول ان ده نصيب لكن كانت بترد تقولي انا ذنبي اييييييييييييييييه

49 كلام قلوبهم:

قطرات من شواطئ الحياة يقول...

فكرتيني بجملة كنت لسا برددها النهاردة الصبح و بفكر فيها :

بحرب الكبار شو ذنب الطفولة ؟ شو ذنب الضحكات الخجولة ؟؟

قطرات من شواطئ الحياة يقول...

كان نفسي أقول هييييه لأول مرة ف حياتي أكون عندك أول تعليق
بس جدية الموضوع و تأثيره فيا مش مساعداني
دمتِ رائعة في اختيارك لمواضيع مدونتك !

كاتب مصري يقول...

فعلا والله الأطفال ذمبهم ايه
كلامك يخلي الواحد يقف مع نفسه ألف مرة قبل ما يقول يا جواز
وعموما أنا لسة صغنون عشرين سنة مش كتير يعني لما يجي معاد الجواز نبقى نفكر
بس بجد كلامك يوجع قوي ويارب النا ستعقل وتفهم صح
ربنا يكرمك

afew good men يقول...

عزيزتي

هذه هي الدنيا عندما تعطي لنا ظهرها
نقول دائما انا ذنبي ايه

الحالة هنا مختلفة انانية الحياة نجعلهم يجرحون انفسهم ولا يهتموا بأطفالهم

بل بالعكس كل واحد منهم يريد من هذا الطفل طريقة يضغط بيها علي هذا الآخر
ربما هذا ليس ذنبك عزيزتي ولكن انه القضاء ارجوكي قفي بجنبها واخبريها هناك اطفال بلا اهل نهائيا ولكنهم اصبحو اكثر قوة وصلابة وتعلموا من الأيام

فكري في نفسك عندما انفصلو قتل الحب بينهم دمرتهم وطغت عليهم الكراهية

تساؤلات لن ييجيب عليه احد بايي شيء غير نفسك

ارجوكي لا تتوقفي عند انا ذنبي ايه

ارجوكي انظري للغد ونفسك وقرري ان تكوني ايه ؟؟؟

تحياتي علي الموضوع

عاشقه الرومانسيه يقول...

برافو يا كيارا على الموضوع الهايل ده
عندك حق طبعا الاطفال مالهاش ذنب
كل اللى بيعملوه اى اتنين منفصلين انهم بيفكروا بانانيه فى نفسهم وبس وبينسوا ان فى حته منهم اكيد هتتعذب بافعالهم
كل اللى بيعملوه انهم بيبصوا تحت رجليهم مش بيبصوا للمستقبل
لو كل واحد فى الاتنين فكر ولو لحظه فى ابنه او بنته
اكيد حاجات كتير هتتغير
واطفالهم مش هيحسوا بالنقص
فكرتينى ببنت كانت معايا فى المدرسه وكانت بعيد عن امها وابوها انفصلوا وكل واحد فيهم عاش حياته وهى عاشت عند عمتها
تخيلى بقى حياتها كانت شكلها ايه؟
كفايه ان الاحساس بالامان كان معدوم
وكل اللى كنت باقدر اعمله انى اصبرها واخدها فى حضنى واحيانا ابكى علشانها
مفيش حد بيدفع الثمن غير الاولاد
انا باضم صوتى لصوتك وباقول باعلى صوت عندى ياناس اتقوا الله فى اولادكم
والله يا كيارا انا من افعالى بكلامك جسمى قشعر
تحياتى على البوست الهايل ده روووووعه

mahasen saber يقول...

مولان ساعات كتير يا بنتى الانفصال بيبقى اسلم شئ للاولاد والا ربنا سبحانه وتعالى مكنش حلله

بس العبره فى ان الطرفين ميسئوش لبعض عشان اولادهم
والعبره ان الام تتكلم بشكل كويس عن الاب والاب المثل

ويا رب كلنا نقدر نكون قد مسئولية ولادنا

smilyrose يقول...

حبيبتى حمدلله على السلامة

يارب تكونى بخير

وبعدين يابنت انتى مش هتبطلى مقالب

احنا مش كنا سوا من كام ساعة

مش قلتى ليه على البوست الجميل دا

بس برافوا عليكى مناقشة المشكلة

بصورة جميلة

وياريت فعلا اى اتنين ناوين ينفصلوا

وبينهم اطفال يفكرو الف مرة

قبل ما يعملوا كدا عشان اللى هيتعذب

هو الطفل اللى كل ذنبه انه

دا بابا ودى ماماته

رائعة يا كيرا

على فكرة انا بشتكيلك البت ضد

يلا بقى

smilyrose

روح الحب الصادق

adel يقول...

10/10 و نجمة و شوكولاته و بون بون سيما بتاع نابليون كمان

ايه الاحساس ده..... انا كنت هاعيط و انا بقرا البوست
:):):)

مش بهزر

كلام بسيط يس مؤثر و ربنا يكون في عون اي واحدة او واحد في الوضع ده

smilyrose يقول...

حبيبتى حمدلله على السلامة

يارب تكونى بخير

وبعدين يابنت انتى مش هتبطلى مقالب

احنا مش كنا سوا من كام ساعة

مش قلتى ليه على البوست الجميل دا

بس برافوا عليكى مناقشة المشكلة

بصورة جميلة

وياريت فعلا اى اتنين ناوين ينفصلوا

وبينهم اطفال يفكرو الف مرة

قبل ما يعملوا كدا عشان اللى هيتعذب

هو الطفل اللى كل ذنبه انه

دا بابا ودى ماماته

رائعة يا كيرا

على فكرة انا بشتكيلك البت ضد

يلا بقى

smilyrose

روح الحب الصادق

mostafa rayan يقول...

انا من راي محاسن
احيانا بيكون انفصال احسن
ولما الاولاد يتروبة بين اتنين منفصلين لكن بيحترمو بعض افضل من لما يعيشو بين اتنين متجوزين ولا يحمل كل منهم إلا العداء للأخر

sendrlla يقول...


مولان
بجد انا زعلت اوى
ربنا معاكى ويقدرك على اللى انتى فيه
بس دا نصيب وممكن يكون وضعك كده احسن الله اعلم برده
اهم حاجه انك تحمدى ربنا على اى حاجه لأن ربنا ما بيكتبش حاجه وحشة ابدا
...................
صدى-سندريلا-اختناق

elsha3er يقول...

لا حول ولا قوة الا بالله


ادعولى تعدى الامتحانات على خير



احمد الشاعر

ABOALI يقول...

نحن فى زمن الذكور لا الرجال
وزمن الاناث لا النساء
فالله الامر من قبل ومن بعد
وبلاش انا ذنبى ايه
عسى ان تكرهوه شيىء وهو خير لكم



تحياتى

حروف (دلو مرة ثانية وجرح ثاني سابقا) يقول...

بوست برغم من بساطةكلماتة الا انها تخترق القلب بوست رائع يا كيارا فكرتيني بلاطفال غزة لما اهاليهم يموتواودام عنيهم يعملواايه متهيئلي ا ن في جيل قادم حيكون غير سوي ومعقد بدون ذنب
دمتي بالف خير

حاسوباتيه يقول...

عارفه اول ما قرات كلامك افتكرت مدونه يوميات مطلق الي دايما يكتب عن القضايا الي بينه وبين مراته وانه عايز يشوف بنته ومش عارف بجد انا بيصعب عليا الاولاد قوي قوي فعلا بس نرجع نقول ان كل شئ نصيب وكل واحد بيشوف نصيبه في الدنيا بس طبعا لازم نخلي بالنا من اختيارتنا

ريمان يقول...

السلام عليكى حبيبتى


انا على فكره كنت جايه اعتبك عشان انتى مش بتسالى عنى ولا بتزورينى

بس اما شوفت البوست ده عذرتك والله

مش عارفه اقولك ايه

بس بجد متزعليش نفسك

على فكره

فى بيوت كتير اوى الاب والام عايشين مع بعض بس بيتهم جحيم يمكن لو انفصلوا كان يبقى احسن ليهم

بس والله كان نفسى اقولك حاجه بس مش عارفه اقولك ايه

لان بجد كلماتك وجعت قلبى والله

معلش حبيبتى

استعينى بالله

ربنا يصلح الحال ويرجعوا لبعض

امييييييين يا رب

شفقة هانم واحسان بك يقول...

فعلا انتى معاكى حق فى كل كلمة وللاسف ما بيتحملش خطا الاختيار ده الا الاطفال
وللاسف مالهمش ذنب

romansy يقول...

وانا ذنبى ايه اسمع الكلام اللى يقطع القلب


دا

ياريت بفهموا بقى

موناليزا يقول...

دى نفس نصيحتى لاى اتنين مستعجلين على الانجاب
تسلمى ياقمر

norahaty يقول...

يعملوها الكبار ويقعوا فيها الصغار
(عكس الحكمة والمثل الشعبى القديم) ولكنها الحقيقة ان الاطفال هم اللى
بيقاسوا مما ارتكب الكبار فى معظم الاحيان

Soul.o0o.Whisper يقول...

كيورتى ...


بجد الموضوع صعب أوى

و مؤلم أوى ..


و صح زى ما قلتى إن العبرة بالاختيار أولا

للاسف المعظم بيختار بالظاهر و المظاهر ..

و بعدين يكتشف الطامة ..



لكن بردوا لا يمنع ان فى حالات بتكون كويسة أوى
و برغم كدا بيكون الطلاق هو أسلم طريقة ..


و فى الحالة دى ، زى ما محاسن قالت

إن ماحدش يسئ للتانى ،

حفاظا على نفسية الطفل ..




ياللا تعالى بئا انا هأنزل الاجابات بتاعت ضد أهو ...


ربنا يستر ..

كيــــــــــــارا يقول...

ياشباب مش معني كلامي اني ضد الطلاق في حالات فعلا لو متطلقوش ممكن تحصل جريمه الرساله للي اصلا مش شيفين الدنيا ومش شيفين عيالهم وهمهم نفسهم وبس

وكمان انا الحمد لله بابا وماما مع بعض ربنا يخليهملي يارب ويفضلوا بيحبوا بعض كدا

بس بجد الشعور ده اسالوا عنه حد فعلا والده ووالدته بعاد

لما ام مش تشوف ابنها لمده 9 سنين وتشوفه مره واحده وبالعافيه

الموضوع انا بشوفه من وجهه تظر الطفل اللي بيفضل يعاني

انا لما بقعد مع الطفله دي قلبي بيتعصر ففي كل ثانيه بحس انها مش طفله بحس انها حد كبير من كتر الهموم

الله اعلم بالخير فين يمكن كنات هتتعب اكتر لو فضل باباها ومامتها مع بعض بس هي دلوقتي بتتكلم عن دلوقتي

rovy يقول...

السلام عليكم
بوست هايل و موضوعه متميز و اكيد مفيد جدا و ياريت زى ما قلتى كل اثنين داخلين على الجواز يقرأوه او اتجوزوا و انانيتهم بتخليهم يأخذوا قرارات سريعه بدون ما يعملوا حساب لحياة و مشاعر اولادهم
حقيقى تسلم ايديك

تقديرى و تحياتى

البت المشمشية حلوة بس شقية يقول...

كبر ونفض وعيش
اللى فى الدونيا دى
ميستهلونيــــــــــــش
ولاتزعلى نفسك
نفس المشاكل فى كل بيت

ريهام العربي يقول...

ياااه قلبتي عليا المواجع اهه انا بقالي فتره مرعوبه من سيره الجواز وبفكر كتير و لما اللي حواليه عرفو اتهزقت واتقالي اني لسه مطلعتش من البيضه عشان انا 20 سنه ^_^
بس الموضوع محتاج تفكير وترتيب وتحطي كده ورقه وقلم وتكتبي الاساسيات اللي هيتمشي عليها وبعد كده تقفلي علي الصفحه دي عشان مش يقلب الموضوع بعقد

وبعدين معلش يا سكر

محدش عاارف الخير فين مش يمكن لو كانو فضل مع بعض كانو اتخانقو اكتر وممكن ده كان ياثر عليكي بالسلب كان ممكن تتعقدي مثلا بصيلها من الناحيه دي واحمدي ربنا علي الاقل ربنا اداكي درس يخليكي تخلي بالك عشان مش تظلمي اولادك وخلي عندك ثقه في ربنا انو مش هيقدملك غير كل خير

وخلي عندك امل ان الجاي احلي واحلي وان حصل ومحلوش انت هتحليه وديما بصي للجزء الايجابي في الموضوع الحياه مش مستاهله نقف عند اللحظات الصعبه كتير يعني لازم نقف عشان نعزي نفسينا ونفكر بس مطوليش




وسوري علي التطويل في الكومنت بتاعي واتمني اجي المره الجايه الاقي بوست مفرفش وكلو امل وحياه



تحياتي ليكي يا سكره

وومن يقول...

مولان

ازيك اسفة علي التاخير بس انتي عارفة بقي

علي فكرة انتي خضتيني قوي فعلا مسئولية طفل دي حاجة فظيعة ومش عارفة لية الطلاق عندنا حاجة وحشة ومريعة

فيها ايه لو اي اتنين بينفصلوا يحترموا بعض ويقدروا انهم اب وام ودي حاجة مش هاتتمحي ولا هاينفع يغيروها

انا قلبي واجعني قوي امتي هانتعلم نبقي متحضرين ومش نذود الطين بله

تحياتي

فارس القمر يقول...

بتتكرر كتير الحكايه دى دلوقتى

ومافيش حل

يعملوها الكبار ويولع فيها الصغار

دمتى مبدعه

البحث عن الذات يقول...

كلام جميل

بكاء طفل
مشاعر ألم

شفاء من الحب

صرخة لكن لمن
والي اين

احبك ياطفل

Butterfly يقول...

ايه المواضيع الجامده دى
انتى عبرتى عن أطفال كتير أوى وبإسلوب بسيط جدا .

حسن حنفى يقول...

ربنا يكون في عونها هي معاها حق

ايه ذنبها ؟؟!!

مش هي اللي اختارت والدها او والدتها

للاسف في الحاله دي الاطفال بيكونوا هم الضحايا

الازهرى يقول...

كيارا
مش عارف اقول ايه والله
المشكلة الكبرى فى حالات الزواج هذه الايام ان الطرفين اصبحوا للاسف بيهتموا بالمظاهر
وكمان الاختيار اصبح حسب مقاييس لا تتناسب مع المراد منه وهو بناء شراكة مدى الحياة وبناء الاسرة التى تنتج افرادا صالحين

وفى النهاية للاسف الشديد الاطفال هم من يدفعون الثمن فى النهاية
والحالات حولنا كثيرة

ادعوا الله ان يصلح لنا الحال

الازهرى يقول...

على فكرة تانى تعليق المرة دى
الاول عند ضد
وطبعا اتكلمت بالخير كله

blue-wave يقول...

مالهاش اى ذنب طبعا
ياريت كل شاب وكل بنت يفكروا فى مستقبل ولادهم قبل ما يفكروا فى ارتباطهم
مواضيعك جامدة بجد يا كيارا

أحــوال الهـوي يقول...

اعتقد انك في تغيير مفاجئ و بقيتي بتكتبي مواضيع شائكه
بطريقة سهله و ممتاوة

صحيح ايه ذنب الاطفال
لكن هل تعتقدي ان الاستمرار بدون انفصال و حرب الزوجين مستمرة افضل نفسيا للاطفال ؟؟؟

تحياتي

mero-moory يقول...

السلام عليكم و رحمة الله و بركاته

منك لله يا شيخه سيبتي اعصابي افتكرت لا قدر الله انتي

بت انا مخامثاكي وموث هكلمك تاني :( ها بقى


بالنسبة للموضوع كاتباه بطريقة وجعتني وألمتني اوي

ولو يعرفوا الاباء اثلا اد ايه مشاكلهم بتاثر في اولادهم سلبيا وبتكون في نفسيتهم عقد وكلاكيع وبيتشردوا في حالة الطلاق او ينحرفوا او او يعني في معظم الحالات بيضيعوا لاولاد

ياريت كل اب وام يتريثوا شويه ويفهموا ان الزواج هو بناء وليس هدم ولو حصل وموش متفاهمين يبقى موش في داعي يخلفوا ويعذبونا معاهم وخلاث

حراااااااااام كل يوم مشاكل وضياع

في رعاية الله

roufi يقول...

اه فعلا عندك حق
مش بس كده
دانتي احسبيها بعد كده
يبقي عندك اخوات من هنا واخوات من هنا
ممكن تعرفيهم وممكن لأ
ممكن تبقي عارفة انك عندك اخت شبهك الخلق الناطق في شكلك تصرفاتك حركاتك ومش عارفة تعيشي معاها ولا تقربي منها زي اي اخوات بسبب التفرقة والبعد وانها ممكن ماتكونش بنت بابا وماما يعني مش شقيقتك فبيقي فيه حساسيات
وحاجات كتير كتير اكبر من انها تتقال في تعليق واضرارها نفسيا قبل اي شيء
احساس بأن في حد ناقصك

بس هنقول ايه
قدر الله وما شاء فعل
لأن في حالات مالهاش حل غير الانفصال الضروري
وربنا بيهديلنا ناس تحل مكان ناس
إالي ان تشرق الشمس وتحصل المعجزة وتصحي في يوم تلاقي انفصال اهلك حلم مجرد حلم ياااااااااه

تحياتي موضوعك شغل تفكيري ورسم دمعة رافضة تنزل من عيني
واجبرني علي التعليق
ملحوظة تقمستي دور الطفلة المشتتة وجسدتي ندائها بكل صدق وواقعية
تحيااااااااتي

ashraf

آه وكفى يقول...

اخس عليكي يامولان خلتيني عيطت
ربنا يسامحك
فكرتيني بكل ده
طيب حتى لما ينفصلوا لو خلاص الدنيا بئت سودة بئى وشر لابد منه .. بلاش يجرحوا في بعض .. يعني فجأه وبدون اي مقدمات تلائي ماما مثلا تقولك داهية فمنظرك مانتي زي ابوكي نمرودة
ولما هو نمرود كنتي خدتيه ليييييييييه

مقتطفات من حياة فتاة يقول...

عندك حق فعلا هما الاطفال ايه ذنبهم
بيتعذبوا
ويريت الاب والام لما بنفصلي بيعملوا بعض كويس ده هما بيكرهواالاولاد فبعض
ربنا يسمحهم

شمس النهار يقول...

كيار انت دستي علي حتت دمل
فعلا ذنب الاطفال ايه في الاختيار الغلط
بس للاسف الاطفال اللي بيدفعوا التمن
من حق هذا الطفل ان يكبر في جو اسري سليم
او علي الاقل مايتحرمش من احد الطرفين
اللي اختاروا بعض غلط همه اللي المفروض يدفعوا التمن مش الاطفال اللي مالهمش ذنب
اغلب المرضي النفسيين نتاج الطلاق
كل واحد منهم بيروح يعيش حياته مع شريك اخر والاطفال اللي بيدفعوا التمن
بصراحه دي انانيه

*shosho* يقول...

كلماتك مؤثرة جدا ومعبرة
وفعلا موضوع الجواز دا بالزات الواحد مينفعش يستعجل فيه لانه مصير حياة

********
دمت ودام قلمك المبدع
تحياتي..

الحرامي يقول...

اخيرا
اخيرا عرفت اتسلل الي المدونه دي
تعيتيني يا شيخه
عموما لو انت مش عرفاني
انا الحرامي ونويت ياذن واحد احد
اسرقك
سلام

نيجار يقول...

ايه يا كيارتي المواضيع الجامده دي
استاذه ورئيسه قسم طبعاً ،
بس بجد يا كيارتي ساعات الام بتقرر تنفصل لما تلاقي ان وجود أب مثلاً منحرف هيأثر على أولادها وجوده أكتر من عدمه فبيكون في الحاله دي الإنفصال أفضل وفي أولاد كتير بيقدروا لما يكبروا ليه الام عملت كده ،
بجد مبدعه يا قمري :)

الشنكوتي الكبير يقول...

قوليلها ان في ناس كبار بيتمنوا لو كان اهلهم ريحوهم من الهم ده من بدري
لو كانوا خدوا القرار ده من بدري قبل ما يبقوا ممتنيلين ومغموسين في الهم ده طول حياتهم
قوليلها ان وجع ساعه ولا وجع كل ساعه وكل ثانيه
قوليلها ان محدش بيعرف بكره فيه ايه
يعني لما اختاروا بعض الأول مكانوش يعرفوا انهم هيكرهوا بعض بعدين

قوليلها انهم كانوا اشجع وخدوا قرارهم بدري بدل ما يعيشوا هم واطفالهم طول عمرهم هم كارهين بعض وفي حرب طول الوقت ومحملين اطفالهم كل الذنب وكل شويه يعايروهم بأن هم مضحيين علشان خاطرهم كأن الغلط كله على اولادهم
قوليلها حتى لو كان الموقف صعب بس احسن من مواقف ناس تانيه كتير

والحمد لله على كل حال

سلاااااااااااااااااااااااااام

وردة يقول...

السلام عليكم ورحمة الله وبركاته
اولا احب اسجل اعجابي بمدونتك بجد ماشاء الله تحفة
ربنا يكرمك ويجزيكي خير
ويارب تقبليني صديقة جديدة لمدونتك
والبوست ده مليان مشاعر حلوة بريئة
يبين اد ايه ساعات مش بنشوف غير نفسنا ورغبتنا مش بنفكر في الدايرة اللي حوالينا
بنشوف بس تحت رجلينا
مش قادرة اقول غير لاحول ولا قوة الا بالله
تحياتي

princess يقول...

ملهاش ذنب غير ان فى اتنين مفكروش كويس قبل ما يخدوا قرار مصيرى فجابوها للدنيا عشان تدفع التمن

صدى الصمت يقول...

كيارا الجميلة
أحب أحييكى بشدة على إثارتك لهذا الموضوع الهام المتكرر هذة الأيام فى ظل الزيجات الطائشة الكثيرة
تحياتى

Walad_Masry يقول...

موضوع على قد ماهو جميل بس صعب

للأسف الشديد إن الأطفال بيكون مجني عليهم في قضية الانفصال دي وللأسف إن الجاني بيكون أعز الناس عندهم وهما الأب والأم

مهم جدا فعلا إن كل أب وكل أم يفكروا في مصير أولادهم كويس جدا قبل اي قرار ياخدوه

وفي النهاية اللي ربنا سبحانه وتعالى مقدره هو اللي هيكون

تحياتي لموضوعك الرائع

Eno يقول...

اه ياكيارا
لو تعرفي احساسي بموضوعك قد ايه وعمل فيه ايه
عندك حق في كل كلمه قولتيها كلامك معناه انك حاسه فعلا بالاطفال او اولاد الناس دول لانهم مش بالضروره يكونو اطفال الكبار برضه بيتعذبو في الاوضاع دي :(

لما تفكروا في انفصال فكروا ان القرار مش يخصكم لوحدكم

في ناس من دمكم مترتب عليهم حياتهم بعد قراركم ده

معاكي حق :(

zainab يقول...

كيارا

اسمحيلى اعبرك عن حبى لهذه الكلمات والإحساس

بجد بوست روعه

تحياتى