الاثنين، يناير 12، 2009

كيارا مع العريس

الاول كل سنه وانتم طيبين فعلا مش عارفه اقول ايه علي اللي عملتوه معايا

فعلا لولا وقفتكم معايا فعلا مش كنت هرجع حالا بشكر كم كلكم اللي رد في البوستين الاخيرين

واللي كلمني ميل او موبايل بجد انتوا حلي اخوات

وشكر خاص طبعا لمجنون بجد انا مش انسانه وحشه وممكن اسيب ناس حبتها وحبوني لكن انا كنت هبعد شويه

الله بقي كفايه كلام وندخل في الموضوع

البوست ده كتبته مع بوست المخدرات وكنت هنزله قبليه لكن قلت انزله بعديه احسن

الموضوع ده بقي انا قلت مش ينفع اتشل لوحدي لازم اشلكم معايا مش احنا علي الخير والشر سوا ولا اييييه....

طبعا ومن اول اما ابتدي يتقدملي ناس

وانا اسمع من ماما ان جالي عريس وهيجي يوم كذا مثلا

بحس اني عاوزه اول حاجه اعملها انكش شعري

واحط الروج حوالين شفايفي وابقي شيته الشوريره

ولما ماما بقي تقولي ده مثلا مدرس ولا مهندس ولا اي حاكه يعني في صفاته

ببقي موستنيه الحاجات اللي اقدر اقول بيها تؤتؤتؤتؤتؤ مس ينفع

المهم العريس اللي جه ده كان محامي

قلت كويس المحامين دول اصلا اتمين كده (طبعا لكل قاعده شواذ وده اللي عرفته بعد كدا ) يبقي اشطه هلاقي الزريعه بالرفض لو اتكلمت معه ولاقيته إتم كده

المهم ماما بقي لقتها عماله توضب في البيت وانا في الطناش خلاص وكل شويه قومي البسي قومي البسي

وانا بقي طيب حاضر هلبس انتي مستعجله ليه شوفتيه شرف يعني

وهي تقولي عارفه لو عملتي حركه من حركاتك

قلتلها انا برده بتاعت الكلام ده

تقولي ده انتي الكلام ده نفسه

المهم عسان مس اطول عليكو وتتفقع مرارتكم بدري بدري

هو جه وكنت في اوضتي بغير هدومي ولسه هدخل ماما لاقتني مش متزوقه قالتلي طب حطي اي روج يخربيت ده يوم

قولتلها حاضر وقبل اما ادخل الصالون بقي

ماما خرمت ودني ادخلي برجلك اليمين وبلاش ترغي عشان يقول انك مؤدبه
انا بقي
ياسلااااااااااااااااااااااااااااااااااااام وهو انا لو اتكلمت ابقي قليله الادب ماما حطت ادها علي بوقي عشان اتخرس

المهم قولت في سري عديها يابت اما نشوف اخرتها

ودخلت الصالون بقي وقعدت جنب بابا

وهو ياحيني كل اما يجي يبصلي يلاقي بابا في وشه هههههههههههههههههه

كنت هموت من الضحك ساعتها وحمدت ربنا اني مضحكتش

لان احيانا لما بضحك ضحكتي بتجيب ميدان رمسيس


المهم بابا وماما بقي عمالين يرغوا معه ويتكلموا وانا كل اللي عليا اتفرج

هو الصراحه يعني شكله قمرررررررررر

المهم شويه كده بعد رغي طويل المفروض انا وهو نتكلم عشان اعرف اخد قراري بالرفض او القبول

فراح بابا نقل قعدتنا في البلكونه بحييث اننا نكون قدامه

المهم اول اما قعدت

بيقولي ازيك

قلتله هو بعد ساعه رغي في الصالون جاي دلوقتي تقول ازيك

راح قال طب خلاص سحبتها شكل لسانك مبيفوتش

قالته ايوان مش بيفوت

قالي اخبارك ايه

قلتله هنقضيها ازيك واخبارك ايه

قالي سحبتها

قلتله هتسحب كلام كتير بعد كده هيبقي بفلوس

لاقيته ضحك اوي وهقهق كده

بيني وبين نفسي كنت هموت علي نفسي من ضحكته حسيت اني قلت نكته مثلا

سالني انتي بتحبي تعملي ايه وقت فراغك

وسع بقي انت وهو

الواد ابتدي يسال


قلتله بحب اقرا جدا يعني ممكن انسي الدنيا مع اي كتاب اركز فيه ومرتحش الا لما اخلصه

وعند كلمه بحب اقرا لاقيت اللي قاطعني

وقالي لالالالالالالالالالالالالالالالالالالالالالا

العيون الحلوه ( الحوله يعني ) مش ينفع نرهقها في القرايه

كمان انا باجي من شغلي متاخر مش معقول اجي الاقيكي بتقري انا عاوزك تدلعيني كده

انا سمعت كلمه تدلعيني وتنحت وفتحت بقي 3 سم

قلتله نعم

قالي ماتخديش في بالك

كبرت دماغي وقولت ماشي ماخدش في بالي ماخدش

المهم

ندخل علي السوال اللي بعده

قالي انتي بتحبي تسمعي مين

قلتله مش حد معين بس بحب اسمع الهادي جداا لكن اي شريط بينزل بسمعه اشوف الحلو ايه واحطه في الفيفورت

لاقيته ولتاني مره قاطعني

لالالالالالالالالالالالالالالالالالالالالالالالالالالا

لما نتجوز مش هتسمعي الا فريد الاطرش

فتحت بقي 5 سم المره دي


قلتله ايه مسمعتش

قالي ايوه الستات بيسمعوا فريد وانا بحب فريد ومش هنسمع الا فريد

قلتله هو فرض ازواق ولا ايه

قالي لما نتجوز هتعرفي ان فريد حلو

لسه طبعا فاتحه بقي 5 سم ومنتظره اللي هيتحفني بيه

لقيته بيقولي ناويه تعملي الماستر في ايه

قولتله والله انا نفسي اعمل في فتره الثوره لان فيها تناقدات كتيره جدا

وراي اتباع ملك وراي ضباط احرار والحقيقه تايهه بالنسبه ليا

هو برده

لالالالالالالالالالالالالالالالالالالالالا

وايه يخليكي تروحي للدوامه دي اعملي الماستر في التجاره او علم النفس حاجات كده

ممسكتش لساني بقي

هو انا حضرتك هدرس اللي انت عاوزه ولا ايه انا تاريخ حياتي تاريخ اروح لعلم نفس واتهبب ادرس حاجه مش ليا فيها ليه

راح يقولي طيب اتعصبتي ليه انا مش قلت حاجه

بوقي فتحته 7 سم

قلت اهدي يابت ده في بيتك

واحنا قاعدين لقينا العماره اللي قدامنا فيها اتنين متجوزين بيتخانقوا وصوتهم ملعلع

لقيت اللي بيقولي متسمعش الكلام ده احنا حياتنا مش هتكون كده خاااااااااااااااااااالص

قلتله نعم

قالي يعني مش هيكون فيه اللي بيحصل ده

قلتله ايه ده جواز يااستاذ يعني حياه يعني هيكون فيها كل الانفعالات اللي بيمر بيها الانسان

حب رومانسيه خناق عصبيه غضب حزن فرح كله

قالي لالالا احنا مش هيحصل الا فرح

قلتله انت بتكلم بيبي ولا واحده بتريل علي الببيونه

قالي لالالالالا مش اقصد بس انا بطمنك

رحت قولت في سري يامثبت العقل

قلت ياتري هيتحفني بايه تاني

لقيته بيقولي معاكي موبايل

قلتله ايوه خير

عاوزه الرقم ولا ايه

قالي لا بس عاوز اشوفه

تنحت كده تشوف ايه

قالي تليفونك

قمت وجبته قلت اما اشوف ايه الحكايه

لقيته مسكه وبيحاول يدعبس فيه بس لاقي الطريق مسدود لانه لازم يكتب باسورد

قالي الباسورد ايه

قلتله ليه ده بابا نفسه مش يعرف الباسورد هدهولك انت

قالي وايه المشكله مش جوزك

افنددددددددددددددددددددددددددددددددم

علي اعتبار اني وافقت مثلا ولا ايه

انا لسه مش قلت قراري

ولاقي دووووووووش قالي طب اهدي

ماما سمعت بقي ولاقتها جت تزغدوني في كتفي وتقولي اهدي مش في بنت تتكلم كده

عااااااااااااااااااااااااااااااااااااااااااااااااااااااااااااااااااااااااااااااااااااماهو شلني وجابلي البربري

قالي مش هتديني الباسورد


في سري هو الاحمر راح فين ياناس قلتله بقي لا مش هدهولك

المهم سكت حبه ولاقيته بيقولي انتي بتلبسي ايه عاده

ساعتها كنت بلبس جيب وبناطيل

قالي لالالالالالالالالالالالالالا

بلاش الجيب بحس انها مش حلوه في البنات


خليكي في البناطيل بتبقي شيك اوي

رفعت عين ونزلت عين

قلتله ازاي يعني

قالي بتبقي حلوه في البنات

قلتله والله

بجد كنت خلاص هنفجر واقوله برااااااااااااااااااااااااااااااا انت شلتني وجبتلي كل الامراض

يخربيت دي جوازه

ورحت قمت قولتله هجيب ميه واجي وانا بجيبها لاقيت ماما طبعا ورايا
بتقولي في ايه

قلتلها كفايه كلام معه لو اتكلمت دقيقه كمان معه مش هضمن لساني

قالتلي طيب هتصرف

ولسه بقعد راح بابا نادي علينا وقال كفايه كلام بقي مشبعتوش كلام

راح هو قال صراحه الواحد مشبعش كلام مع انسه كيارا (هو قالي اسمي يعني مش كيارا )بجد لذيذه اوي برغم عصبيتها

وخمس دقايق وراح استاذن

هييييييييييييييييييييييييييييييييه ارتحت

وطبعا رحت حكيت لماما اللي حصل

قالتلي ايه ده كل ده حصل في تلت ساعه

قلتلها ايه هو كل ده كان تلت ساعه قالتلي اه

قلتلها انا كنت فكراه ساعات

حصلت بعد كده بقي محاولات في الجوازه دي عشان اوافق لكن علي مييين

طفشيته وارتحت

نفس عميق وسلاموز 

ونستخلص من اللي فات دا ان جواز الصالونات لو مش اتعامل فيها الواحد بحزر بتقلب خالص 



2 كلام قلوبهم:

Ramy يقول...

ههههههههههههه

بجد أنا مصدوم فيه

بس دى اول مقابله ليكم مع بعض

و بالرخامة و السماجة دى

دا انا معرفش أقلب فى تليفون أخويا

أقلب فى تليفون واحدة اول مرة أقابلها

بس برضه نقول ان احنا نحترم صراحته فى بوخته

لأن لولا صراحته دى مكنتيش أكتشفتى رخامته

بوست جميل جدا (:

برغم أنى كنت مبتسم بس كنت مفروووس فى نفس ذات الوقت (:

ربنا يوفقك فى الأحسن أن شاء الله

كيــــــــــــارا يقول...

مش تفكرنىىىىىىىى

الواحد في العرسان بيشوف العجب بجد :)

دا جالي تونين بالشكل دا ههههههههه