الاثنين، يناير 12، 2009

دموووووووووع


ايه الهبل ده والنبي محدش يتكلم هدخل في الموضوع


انا نزلت النهارده من البيت عادي يعني زي كل الناس وبقي ايه متظبطه ولابسه اللي علي الحبل

ومشغله بقي اواخر الشتا علي الموبايل وبسمع بقي ومندمجه وشايله شيله يجي 10 كيلوا كتب وانا نازله تقولش هجيب الديب من ديله

وقطعت التذكره وركبت المترو عادي يعني

ولاقيت كرسي اقعد عليه لولولولىىىىىىىى

وقلت اما ابص علي البحث اشوف الشكل العام تعبي ياناس بقي وفي لحظه

قعدت قدامي واحده ست بس صغننه المهم معرفش ايه خلااني ابصلها اوي ولحظه ولقيت عنيها

بتنزل دمعه

واقسم بالله اني دموعي نزلت علي الدمعه دي ورحت قفلت البحث وقفلت الموبايل

وكنت بحاول اتكلم معاها لكن كنت مش عاوزه اتطفل عليها قلت ممكن تكون حصل شي ومش عاوزه

حد يتدخل في حياتها

لكن لحظه بلحظه ولقيت الدمعه بقت دموع والدموع بتزيد بشكل بشع وبقي العياط بصوت ملحوظ

افاجي ان امها جنبها ومش عارفه تسكتها عاوزه اقولها خدي بنتك في حضنك حاولي تديها امانك لكن برده قلت اسكت

اكتر من نص ساعه والبنت كل لحظه بتنهار اكتر وانا جوايا بقول ايه اللي يوصل انسان لانه ميقدرش

يسيطر علي نفسه وانه يعيط في مواصله او شارع

يعني انا لما ببكي ببقي معزوله في حجرتي لكن مرتين حصلي اني بكيت في الشارع

ماعلينا مني انا فضلت بصراحه افكر في البنت دي لحد اما اتشجعت وقلت اكلمها

وكلمتها بالفعل الاول قالتلي مفيش حاجه بس لحسن الحظ وانا ببدل الاتجاه لقتها معايا

قولتلها حاولي متكونيش ضعيفه وفكري في حل ومش تبكي فراحت البنت الصراحه انفجرت في


البكاء وحكيت كله


بعد اما حكت الموضوع بصراحه انا لو مكانها مش ابكي وانا ماشيه في الشارع مش بعيد اموت بسكته قلبيه ربنا يصبرها يارب

طيب يانيمو انتي وجعتي دماغانا بالكلام لخصي وقولي عاوزه توصلي لايه

حاضر من غير ضرب



كل انسان بيوصل للحظات وبيبكي فيها او بيضعف ومبيقدرش يمسك دموعه


امتي توصل للمرحله دي انك متقدرش تتحكم في نفسك وتبكي قدام الناس في الشارع وانت ماشي
في مواصله في محل في اي مكان

مع تحيات
نيمو

0 كلام قلوبهم: