الاثنين، يناير 12، 2009

كيارا في المطبخ


كيارا بتطبخ



طبعا انا نايمه لابيا ولا عليا لاقيت مين بيصحيني لقيت ماما

فبتقولي باباكي مش هيفطر معانا عنده شغل


واخوكي مش بيفطر عشان شغله (ياحيني صبعان عليا والله )

فانا وانتي بس اللي هناكل فاعملي اكل بسيط علي ادي انا

وانتي بس زودي الحلويات عشان ابوكي واخوكي لمايرجعوا


وانا بقا مفتحه عين وقافله عين عشان النور اللي فتحاه وبقولها يعني اطلع انا ايه راحت

قالت اتصرفي انتي انا اتاخرت ونازله كملت نوم لحد اما فقت كده

اممممم امي سابتني محتاسه اطلع ايه طبعا طلعت حبيبه قلبي الفراخ طلعت

نص فرخه لينا احنا التونين طيب اديني طلعت


الفراخ وسيبتها لحد اما تفك عشان اغسلها

وطلعت كيس ملوخيه ولفتين جولاش ولحمه مفرومه

وسيبتهم يفكوا لحد اما انقي كوبايه رز


عشان انا وهي مش بنحبه بس لعل وعسي يعني

رحت بعد اما غسلت الفراخ حطيتها في ميه ومعها حبهان ومستكه وورق لورا

واستنيت لحد اما اتسلقت ورحت طلعت


الفراخ علي مصفي تتصفي

وقلت اما اشوح اللحمه المفرومه عشان اعمل جلااش باللحمه المفرومه

طبعا جبت طبعا وحطيت اللحمه ومعها معلقتين سمنه متوسطتين واتشوحت


رحت جيبت الجلاش وحطيت 6 من تحت و6 من فوق

وحطيت اللحمه المفرومه مع شويه تحابيش بقي لزوم النفس يعني


ورحت حطيتها في الفرن وعقبال اما تتعمل اكون ايه ظبط الحلويات

والملوخيه وعمل الفراخ يبقوا قبل الفطار بحبه



جبت لفه الجلاش وقلت احشيها ايه احشيها ايه قلت احشيها كنافه

طلعت الكنافه من التلاجه واخدت نص الكيس يعني ربع كيلو

وطبعا فركته وسيحت 3 معالق سمنه وحطيتهم علي الكنافه


ومعلقه سكر وقعدت اشربهم في بعض وبعدين جبت طاسه وقعدت

اسخن الكنافه لحد اما بقت مديه لون محمر بس مش اوي


ورحت فركتها وبقت كدا سلسه ومسكت الجلاش وقعدت بقي الفه علي

الكنافه ومعه مكسرات بقي علي شكل صوابع ولما


خلصت حطيته في صاج زي بتاع كحك العيد كدا ورشيت فوق الوش سمنه وجوز هند

واستنيت اما الجلاش باللحمه المفرومه خلص رحت حطيت

الجلاش اللي بالكنافه وطبعا قلت اعمل الشربات فحطيت في


العين كوبايتين سكر

وعليهم كوبايه ميه وعصرت نص لمونه عشان لما الجلاش

يتساب مثلا يبات يعني متلقيش السكر بقي مجلد فيه


كده بقي فاضل ايه اجيب الربع الكنافه التاني وعملت فيه نفس اللي فات

رحت حطيت علي الكنافه سمنه متسيحه ومعلقه سكر


وفركته ببعضه وجبت صنيه صغننه ورحت حطيت النص بتاع

الكنافه وقلت احشيها ايه قلت اعمل معلقتين مهلبيه في السريع


واحشيهم بالكنافه رحت جبت طاسه وحطيت شويه لبن علي سكر علي معلقتين

نشا وفضلت اقلب فيهم لحد اما اتظبطت كده


ورحت حطيتهم علي النص الاولاني مع مكسرات ورحت حطيت الجزء التاني

كده انا خلصت الحلويات ومستنياها تستوي فاضل ايه الرز والفراخ والملوخيه

رحت جبت حله صغننه وحطيت معلقه سمنه وحطيت شعريه

وقلبتها لحد اما عملت لون محمرر كده ورحت حطيت كوبايه


الرز اللي اتنقت بعد طبعا الغسيل وحطيت كوبايه ميه

اه ملحوظه الميه تكونوا مسخنيناها عشان الرز مش يعجن وقبل

اما الرز يستوي كان عاوز شويه ميه كمان حطيتها ورشيت


الملح والرز بيبقي علي نار هااااااااااديه جدا


نيجي بقي للفراخ

طبعا الفراخ اتصفت تقوم تجيبها في صنيه كدا وتقطع ترانشات قوطه

وتجيب 6 بيضات وتكسرهم وتجيب حبه شوربه صغننه


وتحطها كده الصنيه بقت كده الفراخ ناقصها الفرن

طبعا الجلاش مش بياخد وقت جوا الفرن اخره ربع ساعه والا يتحرق

واول اما يخرج تحط الشربات عليه هنحط الفراخ بقي


مكانه في الفرن عشان الفطار وجب تلت ساعه وهتلاقيها اتحمرت وبقت فللللل

كده بقي ناقص ايه نسوي الكنافه رحت حطيتها في الفرن نيجي بقي

للملوخيه ورحت جيبت حله الشوربه وقللت الشوربه


شويه ورحت حطيت

الملوخيه عليها وقعدت ربتها كده لحد اما بعت عسل وطبعا مش

ننسي واحنا بنربها تكون التقليه بتتعمل


التقليه كام تومه كده علي كسبره علي معلقتين سمنه المهم خلاص التشه

جهزت والملوخيه جهزت ورحت شاهقه ههههههه


حلوه شاهقه دي بخض ماما منها ورحت طاشه الملوخيه

وكده فاضل ربع ساعه علي المغرب رحت بقي غرفت الرز والملوخيه

والفراخ والمخلل طبعا واه نسيت اني طلعت كيس


مانجا وعملته عصير عشان الفطار وخلاص قعدت بعد المشوار

القصير وفطرنا


الف هنا للي يفكر يعمل الاكل الغريب بتاعي :)

المقادير للي يحب هتكون بداخل الموضوع

نص فرخه

ملوخيه بالكميه اللي تحبوها

لفتين جولاش

نص كيلو كنافه

المهلبيه لبن ونشادر وسكر

وطبعا السمنه

وكوبايه رز

ومعلقتين شعريه

ولحمه مفرومه

ومانجا

ومخلالات

ومكسرات

الف هنااااااااااااااااااااااااااااا كانت معكم من المطبخ كيارا

موضوع مختلف عن اللي اتعودته مني بس قلت افرفشكم حبه
بدل الموضوع السابق حسيت منه ان الكل بيعاني

اللي جاع يقولي :)

تنبيه الموضوع الجاي هيكون عن قضيه شاغله تفكيري جدااا


0 كلام قلوبهم: