السبت، فبراير 28، 2009

اضحك الصوره تطلع حلوه


من طبعى اني ابتسم
 لان المفروض يعني ان الابتسامة مش تروح من الوجه 
حتي لو جواك مشاكل العالم
 ابتسم للحياه الحياه تبتسم لك
 والله في احلك لحظات حياتي بقعد اهزر واضحك حتي ماما بتستغرب وبتسالني 
هو انتي مش كنتي بتعيطي من شويه
 اقولها ياستي دول دمعتين وكنت مزنوقه فيهم وخرجوا .
مممممممم برغى صح طب خلاص خلاص انا هحكي ويارب توصلوا للي عاوز اقوله 
انا بخرج الصبح الساعه 7.30 من البيت وانا خارجه ببقي مبتسمه
 والابتسامه دي احلي ميك اب طبيعي خلقه الرحمن بتنور الوش وبتخليه جميل اوي
 وفي مره واحده اد مامتي وقفتني وقالتلي انا كل يوم بشوفك وبشوف ابتسامتك ببقي مبسوطه اوي 
لما بنزل واشوفك بحس ان اليوم فيه تفاءل ساعتها حسيت بقيمة ابتسامتى
 نها خلت اليوم حلو عندي وعند غيري وسالتني انتي مخطوبه قلتلها لا قالتلي
 عندك كام سنه قلتلها 23 سنه قالتلي طيب انتي بتحبي قلتلها حب شخص لسه مش في نصيب 
 لكن بحب الدنيا والحياه والناس واصحابي بحب الحياه  قالتلي  بجد بجد ابتسامتك علي الصبح ساحره ربنا يكرمك
 
ويرزقك بكل اللي تتمنيه وبعدها كلمتني شويه وفهمت انها جاره خالتي شوف الصدف 
واستاذنت منها عشان مش اتاخر وانا طالعه السلم عشان اروح الناحية التانيه لقيت واحد بيقول لواحد اهي جت اهي 
وبنفس الابتسامه قلت في سري هو مستني ولا ايه طنشي يابت  ولقيت التاني بيقول
 للاولاني انابجد عمري ماشفت حد بيبتسم 
وهو ماشي كدا الكل مبوز ومكشر وحاله كئيبيه بيكرهوني في الحياه
 المهم هما طالعين جمبي قمت مديت شويه عشان اسبقهم  
وبعدها ركبت  المترو بنفس الابتسامه وكان فيه بنتين في عربيه السيدات ميتين من الضحك لدرجه ان عنيهم دمعت 
ولقيت واحده كبيره بتقول ايه المسخرة دي انا تنحت 
ومش حسيت بنفسي الا وانا بكلم طنط وقلتلها اولا دول ياطنط بيضحكو في عربيه
 السيدات مش في رجاله هتعاكس يعني 
تاني حاجه  الافضل يضحكوا ولا يعيطوا 
 هو لازم يعني نعيط عشان نبقي محتشمين ومؤدبين ايه المشكله اني مؤدبة بس بضحك وضاربه الدنيا طناش 
ولقيها قالت تضحك بس مش بالطريقه دي قلتلها تضحك باي طريقه المهم انها تضحك 
رحت الشغل بنفس الابتسامه لقيت زملتي قالت ليا بتعجبيني بابتسامتك بكره تتجوزي والابتسامه تروح
 قلتلها ابداااا لا ممكن 
السؤال بقي ليه الناس بتمشي وفي حد ضاربها ومكشره دا المسلم اللي بجد لازم يكون بشوش ومبتسم للحياه
 
يقول جرير بن عبدالله رضي الله عنه: ما رآني رسول الله صلى الله عليه وسلم إلا ابتسم في وجهي,
 تأمل! ما هو الشيء الذي خلد في ذاكرة هذا الصحابي؟ إنها البسمة الحلوة الدائمة
 من رسول الله صلى الله عليه وسلم. ويقول ابن عباس رضي الله عنهما: كان رسول الله صلى الله عليه
 وسلم أجوَدَ أَبَشْ, أي بشوش مبتسم. وجعل النبي صلى الله عليه وسلم
 حركة الشفة صدقة يثاب عليها الإنسان إذ قال: تبسمك في وجه أخيك صدقة
. فلو لم تملك المال كي تنفقه صدقة في سبيل الله, فإن البسمة وسماحة النفس صدقة عظيمة
, وكيف لا تكون صدقة, وبها تبهج من أمامك, وتشرح صدره, وتدخل السرور عليه,
 وتخفف بها من معاناته, وتكون هي البوابة للمحبة والمودة؟.
تنويه : بوست الوصيه مش كنت مكتئبه فيه ولا حاجه بالعكس  تماما
وان شاء الله هكون في لقاء المدونين يوم الثلاثاء 3-3 الساعه 4.30 
المكان
المركز الثقافى الدولى
17 ش السد العالى ميدان فينى الدقى
الشارع المقابل لشيراتون الجزيرة
اقرب محطة مترو انفاق محطة الاوبرا
الزمان 
يوم 3 مارس الساعه 4.30 عصرا
 

100 كلام قلوبهم:

طوبة ذهب وطوبة فضة يقول...

انا مش مصدقه اول تعليق ربنا يكرمك ويديم عليكى البسمه ياقمر

كيــــــــــــارا يقول...

ههههههههههههههههههههههههههه

يس يس اول تعليق

كسبتي اسكوتر :)

نورتيني ياقمر

المعتصم يقول...

بسم الله الرحمن الرحيم
السلام عليكم ورحمة الله وبركاته
كيارا
تحياتى
بجد الموضوع جميل خالص
وياريت فعلا ان الابتسامه تكون موجوده بس الناس مشغوله بمشاكل الدنيا والمعايش الغاليه والواحد مش بيفتكر اصلا انه فيه حاجه اسمها ابتسامه الا لما بيشوف حد بيبتسم انما طول ماالدنيا واخداه اهو ماشى مكشر ودماغه فيها مليون حاجه
وياستى ربنا يكرمك ويسعدك وتفضلى مبتسمه كده على طول وحتى بعد ماتتجوزى (ولوانه صعب انماممكن)
هههههههههههههههههههههههه
تحياتى ودمتى بكل خير وود
والسلام عليكم ورحمة الله وبركاته

ABOALI يقول...

الابتسامة روح الحياه

الحق تعليق بدرى

كيــــــــــــارا يقول...

المعتصم

*******
وعليكم السلام ورحمه الله وبركاته

ابتسامه هي اللي بتهون كل حاجه

وليه بقي مش هبتسم بعد اما اتجوز هو انا هتجوز كرومبو ههههههههه ان شاء الله اتجوز واحد يكون كويس معايا مش ينكد عليا

ABOALI يقول...

بووووووووووست فى الجوووووووووووووون
على راى واحدة اعرفها

وصل المعنى ياااااااااااااااباااااااسا

على راى واحده اعرفها

بوووووووووووووست جبااااااااار

على راى واحدة اعرفها



البمسة عنوان
فمن اضاع العنوان
اضاع المكان
ومن اضاع المكان
لم يجد جدران
ولمن لم يجد جدران
عاش وحيد" بدون شطئان
وخاب فى الدنيا
وجمع حوله الاحزان
ومش هاياخد مثاثه ولا لبان


ولالالالالالالالالالالا ايه

كيــــــــــــارا يقول...

ابوعلي

*******

ايه التعليق المختصر دا هو فيه فاري في المدونه ولا ايه قول بس وانا هطفش حلطول :)

كيــــــــــــارا يقول...

ههههههههههههههههههههههههه


الا هي مين اللي تعرفها ههههههههههههه

ايون كدا هي دي تحليقات ابوعليىىىىىىىىىىىىىىىىىىىىىىىىىىىىىىىىى


نورتني بجد

eyad يقول...

الله ينور يا كيارا
بجد تحفه في الكتابه ربنا يزيدك
بس مش كيارا دي كانت في فيلم lion king
اصلي بيني وبينك بحب الافلام دي اوي
حد شاف حاجه ×-O

كيــــــــــــارا يقول...

اياد

*********

فعلا كيارا اللي في ليون كينج

نورتني بااول زياره

وميرسي علي الكلام الحلو دا

BAsMA يقول...

كيارا حبيبتى
تعرفى بقى انا عمرى ما شوفتك بس من بوستاتك وطريقتك عرفت انك علطول مبتسمة ومرحه وحبوبة ووووووووو حبيبتى كمان

BAsMA يقول...

تعرفى انا مش شوفتك اهو بس عارفة ان احلى حاجه فيكى ضحكتك
حافظى عليها معدتش منها اليومين دول

Sweet Violet يقول...

دايما مبتسمه كده ياخيارتى يارب قبل و بعد الجواز كمان (:

كيــــــــــــارا يقول...

ياكزووووووووووفى ربنا يخليكي يارب لكلامك الحلو دا انا مش اده خالص وشي بقي احمر خالث مالث بالث تالث وكول الحروف العربيه هه

نورتيني ياقمر وانا كمان بحببببببببببك

كيــــــــــــارا يقول...

ضد حبيبتي عمر الابتسامه ما هتكون ابتسامه الا وتوامها متكمل بابتسامه احلي منها كمان

فاهمني اكميل ياحلو ياحلو ههههههههههه

الازهرى يقول...

ايوه
ايوه
ابتسموا ما انتى طبختيها مع الهانم التانية
وجت على دماغ الغلبان

ربنا يخليلك الضحكة دايما

الازهرى يقول...

على فكرة انا فى احتمال قائم انى اروح اللقاء
لكن ضعيف لظروف الكلية
لكن هاحاول

adel يقول...

بجد انا كده و مبسوط تن في ناس كده

ابعتيلي تفاصيل يوم 3-3 انا عارف المكان و خدت فيه كورس سينما

كيــــــــــــارا يقول...

ازهري

********

ههههههههههههههههههههه مين الهانم دي انا مش اعرف هوانم ههههههههههه

ان شاء الله تقدر تيجي اللقاء

كيــــــــــــارا يقول...

عادل

*******

الحمد لله انك مبسوط واكيد باذن الله تفاصيل اللقاء هتتكتب

mohamed ghalia يقول...

هييييييييييييييييييييييييييييه
كيارا بتتكلم وبتقول ابتسم
هى الدنيا حصل فيها إيه
الحمد لله عدينا فترة النكد
حمدا لله على السلامة

كيــــــــــــارا يقول...

ههههههههههههههههههههههههههههههه

نكد ايه بس مين جاب نكد هههههههههههههه

*shosho* يقول...

الموضوع جميل جدا واحلى حاجة انك استشهدتي بخير الأنام النبي صلى الله عليه وسلم
الابتسامة اجمل حاجة في الدنيا انا عندي أبلة في المدرسة اسمها ابتسام ودايما تبتسم في وش اللي يبصلها اسم على مسمى بتفتح نفس الواحد
وانتي ياكيارا والله باين عليكي عسولة وسكورة جدا انا بجد حباكي من قلبي ربنا يديم عليكي الابتسامة ومحبة الناس ليكي
وياريتني كنت في مصر واقدر اروح لقاء المدونين عشان اشوفك
بس يلا خير
ربنا يبسطك ويديم عليكي الابتسامة ومحبة الناس ليكي

تحياتي..

كيــــــــــــارا يقول...

فعلا الابتسامه نور علي الوجوه وانا كمان كان نفسي اشوفك ياقمر وانا كمان بحبببببببببببببببببك

وميرسي لكلامك الحلو ياقمر

Soul.o0o.Whisper يقول...

خيــــــــــارا

فعلا يا خياراراراريايا
مافيش أحلى من الضحك


و طبعا مش عاوزة أقولك على الضحك و الفضايح
خلى الطابق مستور

ههههههههههههههههههههه





طبعا انتى عارفة حكمتى فى الحياة
لا يأس مع الحياة و لا حياة مع اليأس
هههههههههههههههههههههه









و مستنيين بوست بئا باللقاء
و كل اللى هيحصل فيه


سلام يا جميل

Eng. Ahmed Abo El-Ella يقول...

كيــــــــــــارا

الناس بتدور على النكد وتنكش عليه بمنكاش حديد

كان فيه أغنيه جميله لسيد درويش بيقول فيها على واحده بتصوت في الشارع:
"قال ايه جوز خالة أم أحمد سلفة أخوها السيد مات"

يعني الست بتصوت على واحد يقربلها عن طريق العالم السابع بالنسبه ليها


اضحك اضحك خلي الصوره تطلع حلوه

كيــــــــــــارا يقول...

سووووووووووووووووووول

****************

ههههههههههههههههههههههه بتموتيني من الضحك واكيد هيبقي اللقاء فيه فضايح لازمن ولابد التشريد :)

كيــــــــــــارا يقول...

احمد

*******

تؤتؤتؤتؤتؤتؤ مش كلهم خالث مالث هزحل منك كدا

اضحك الدنيا مش مستاهله

فتافيت يقول...

السؤال بقي ليه الناس بتمشي وفي حد ضاربها ومكشره دا المسلم اللي بجد لازم يكون بشوش ومبتسم للحياه

لا في زماننا ده المتأسلمين اكتر بكتير من المسلمين

ربنا يديم عليكي البسمة وراحة البال يارب

كيــــــــــــارا يقول...

والله معاكي حق يافتافيت

ربنا يديم علي الجميع راحه البال

نورتيني ياعثل

mosh 3aref يقول...

الحمدلله انك مبسوطه ويارب نلاقيكى دايما كدا

كيــــــــــــارا يقول...

ميرسى ويارب كل الناس تكون فرحانه

تحياتي

عمرو يقول...

يا مولان الناس شايلين هموم تقيله أوى أوى
قوتهم و قوت عيالهم و مستلزمات الحياه اللى مش بتخلص و ضيق ذات اليد و كل الضغوط التانيه اللى بتواجه الناس خلتهم مكشرين و عبوسين رغم أن المصريين مشهورين بالفكاهه و النكته الحاضره بس للأسف الزمن تغير و بقت الحكايه صعبه أوى
يعنى معلش نلتمس العذر للمكشرين و المبوزين و اللى على وشهم سيمات النكد لأنهم معذورين بس مش معذورين أن مايكونش عندهم شىء من الأمل لأن اليأس المطبق قنوت من رحمة الله
ربنا يسعدك يا مولان و يخليكى دايما مبتسمه و بشوشه حتى بعد ما تتجوزى :)

ghorBty يقول...

*_*

موضوع جميل اووووووي

وربنا يديم عليك الفرحه وراحه البال

فعلا والله

ويكفي انها صدقه

وكما يقال

قمة التحدي ان تبتسم وفي عينيك الف دمعه

يا ريت الكل يعرف الاسنان مش عوره يعني ابتسم وخليها علي الله

بس ربنا يستر ما نلقيش كل واحد ماشي يبتسم للبنات والعكس احنا مش ناقصين

كل واحد يبتسم ويغض بصره مع بعض يعني

تحياتي

بوركت

Nabil يقول...

السلام عليكم....

ياريت كل الناس كده ادام الله بسمتك

تحياتى ويارب تفضلى مبتسمه كده على طووووول

بوست حلو جدا

كيــــــــــــارا يقول...

استاذ عمرو

*********

لا تقنتوا من رحمه الله طب هي التكشيره دي هي اللي هتزود رزقهم بالعكس هتكبرهم في السن وتشيلهم الهم ومش هيعرفوا يفكروا في حياتهم كل واحد رزق ربنا كاتبهوله المهم اننا نرضي باللي ربنا كتبه لينا دا الابتسامه دي هتهون عليهم المشاكل وتخليهم عندهم قدره علي العمل اكتر

وربنا يسعد الجميع حتي بعد الجواز هههه

نورتني والله يااستاذ عمرو بااول زياره :)

كيــــــــــــارا يقول...

يا ريت الكل يعرف الاسنان مش عوره

*************

ههههههههههههههههههههه والله عثل اغربتي

وطبعا مش اقصد ان البنات والصبيان يقضوها بالعكس كل واحد يبتسم مش لحد لنفسه وعنيه مش تزوغ لا هنا ولا هنا

نورتيني ياقمر

كيــــــــــــارا يقول...

نبيل

********

ياااارب الناس كلها تبتسم

نورتني يانبيل والله وربنا يسعدك ياارب

تايه في وسط البلد يقول...

يااااااااااااااااااااااااااااه

ايه اللي يخللي الناس تمشي مكشرة؟

سؤال حلو والله!!

عموما انت معاكي حق في سؤالك بس تعالي نحوره حاجة بسيطة

ايه اللي يخللي الناس تصبر علي اللي يخليها مكشرة؟!!

تحياتي ليكي وابتسامتك الجميلة

كيــــــــــــارا يقول...

التكشيره دي معناها عدم رضا يبقي ايه

لازم يكونا الاول مؤمنين بالله وراضين وكل حاجه هتتحل هي التكشيره دي هتزود مرتبهم وتحل مشاكل العيال و تجوزهم وتحل حياتهم ازاااااااااااااي

وميرسي لتحيتك

وغايب ليسه عندك ضريبه تاخير


تحياتي

نفرتارى يقول...

بجد ربنا يديم عليك الابتسامة .. ويارب كل الناس تمرض بالابتسامة والفرحة والسعادة .. ان شاء الله .
وعلى فكرة ان ممكن احضر اللقاء خصوص انه قريب من شغلى .

تحياتى ،،

نفرتارى

كيــــــــــــارا يقول...

ربنا يديم السعاده للجميع

ياريت تيجي هكون سعيده اني اشووووووفك

princess يقول...

بصى انا كده برده يعنى مثلا النهاردة بستخدم الدباسة روحت مدبسة ايدى اليمين طبعا اتفتحت ههههههه بس قعدت اضحك ومحدش يقولى ده عدم احساس ههههههه لانى عيطت بعد كده:)) بس قصدى مفيش حاجة مستهلة بجد لازم التفاؤل يبقى موجود
ابتسمى يا بنتى:))
تحياتى

سفروتة يقول...

ربنا ما يحرمك من ابتسامتك الجميلة دي يا كركورة يا ثكر
:)

اللؤلؤة يقول...

السلام عليكم
الأخت كيار إنها دعوة جميلة نتمنى أن تسود على الأقل معظمنا حتى نستطيع بالإبتسامة تحمل مصاعب الحياة
تحياتى

ايوشة يقول...

ربنا يديم عليكى الابتسامة والسعادة ياجميل يارب
ربنا يكرمك دايما ياكيارا

كاتب مصري يقول...

فينك من زمان يا فندم وحشتني تعليقاتك وزيارتك
ربنا يديم الغبتسامة عليكي ويفرح قلبك
مودتي

EMMY BABY يقول...

بوست جاى فى وقته يا كيااارا والله

ربنا يكرمك ويخليلك ابتسامتك يارب

انتى هتروحى اللقاء ده ؟؟؟؟؟

هانى زينهم يقول...

عندك حق بس الابتسامة لمجرد الابتسامة زى التكشيرة لمجرد التكشيرة . ما حدش يكره يضحك بس المهم ايه اللى يضحك ؟؟ لو عرفتى قوليلى .

حسن حنفى يقول...

للاسف المعظم بيكون مبوز ومكشر من اي حاجه

تعرفي الابتسامه دي بتقرب دايما الناس من بعض ده غير ان البسمه صدقه


بس للاسف الناس كلها مكشره في مكشره :D

سمكه واحده يقول...

ايوه يا كيورتي ومين سمعك وحياتك مفيش احلي من الابتسامه
اهو ابتسمتي البلهه دي هي المودياني في دهيه طب انتي بيقولك الله عليكي
انا بيغموني يقوليلي انتي ديما كده معندكيش دم ومبتسمه علي طول وديما بتتضحكي في وش اي حد زي الهطله كده
طب اعمل انا في الناس الجاهله دي ايه قوليلي بس
انا وخدها علي انها صدقه
(وش بيغمز)
ربنا يسعدك يارب وديما مبسوطه وفرحانه
تحياتي يا كيوره يا اموره

hager يقول...

يا ريت الناس كلها كده
ربنا يديم عليكي البسمه دايماا يا رب :)

”*°•.˜”*°•..سونه..•°*”˜.•°*”˜ يقول...

hi
السلامه عليكم .
اضحق كركر اوعى تفكر
البسمه صدقه اكيد
بس مش فى كل مكان
كيار فى الشارع ابتسمى براحه لحسن
الناس تقول بعد كده بص البت ياعينى اتجننت ياحرام هههههههههه
اوعى تزعلى خلاص خلاص خدى المصاصه دى
تحياتى *سونه* سلام.

صفـــــاء يقول...

.
ربنا يا اختى يديم عليكى الابتسام

بس دلوقتى لما تضحكى او تبتسمى فى وش

حد تقريبا بيفتكرك مجنونه
.

عاشقه الرومانسيه يقول...

البوست اكتر من رائع
ربنا يسعدك
ويجعل ايامك ابتسامه على طول
بس الابتسامه ممكن تختفى مع مشاكل الحياه
ومش مشاكل بنوته صغيره ورقيقه زيك
لأ
مشاكل اسره وبيت وعيله وزوج
الانسان لما بيكبر مشاكله بتكبر معاه ومسئولياته كمان وتبدأ الابتسامه تختفى حبه حبه

جميل انك تكون مبتسمه لدرجه ان اللى حواليكى يلاحظوا ده
انا بقى عكسك
طول ما انا ماشيه مكشره لانى باكون مع نفسى وبافكر فى شئ ضايقنى مثلا
اصلى انا نكد
ههههههههههههه
الا فى حاله واحده لما اكون انا والحب متوافقين ومفيش خلافات ولا زعل بينا

مش بقولك انا نكد
عارفه نفسى يابنتى رغم انى بحب الهزار والضحك بس مش لدرجه انى امشى فى الشارع فاشخه ضبى
ههههههههههههههههههههههههههههه

بقولك ايه
سيبك من كل الكلام اللى فوق ده وشوفى صلاح جاهين قال ايه

الضحك قال ياسم ع التكشير
امشير وطوبه وانا ربيعى بشير
مطرح ما بظهر بانتصر ع العدم
انشالله اكون رسمايه بالطباشير
عجبى!!!

فراشة يقول...

يارب يا كيارا ابتسامتك ماتفرقك ابدا
جميل البوست جدا وجديد
فعلا عندك حق
الواحد بيشوف ناس كتيرة بتبقى نازله الصبح منظرها غريب
بس جايز الهم طاغى عليهم
ماهو برده الواحد لما بيكون مهموم مبيقدرش يسيطر على اللى جواه
اصل دى مش باييد الانسان
مهما حاولنا نخبى المشاعر الداخلية لازم يكون لها تأثير على الملامح الخارجية
بس المشكلة مش فى المهموم
المشكلة ان فى ناس عمال على بطال مكشريين اعوذ بالله
زى ما بتقولى اضحك الدنيا تضحكلك
وبعدين ده من الناحية العلمية
التكشير بيحرك تقريبا 37 عضلة فى الوجه والضحك او الابتسام 17 عضلة فقط
انا مش متأكده من الارقام
يعنى المهم ان التكشير بيعجز الوجه اسرع من الضحك
ماشاء الله عليكى يا كيارا ربنا يسعد ايامك
وتكونى سبب ابتسامه كل من حولك
تحياتى

آه وكفى يقول...

اقولك انا ليه
عشان انتي ممكن تكوني بتقدري تفصلي بين المشاكل وبين احساسك الخارجي
يعني وانتي نازله مبتقعديش تفكري بئى وتكئبي نفسك فالبتلي ده مش بينعكس في المرايا اللي هى وشك او يمكن تكوني صح عاملة زييلما تزعلي تقلب معاكي بضحك .. كمان ساعات في ناس بتكون مكشرة لمجرد انها صاحية بدري واليوم طويييييييييييييل وهيتعبوا فيه يعني بينكدوا على روحهم مسبقاً

بس ياستي .. وفكرك فضلنا على كده كتير .. 30 سنة بس وحياتك

صدعتك انا

مسدس صغير يقول...

ههههههههههههههههههه
هههههههههههههههههههههه
ههههههههههههههههههههههههههه
حلو كده؟؟؟
بضحك اهوه..
وش ميت من الضحك
...
لا بجد انا زيك تمام طول مانا ماشى وانا مبتسم مبعرفش ازعل خالص وقت الزعل عندى بيبقى قصير جدا ودى نعمة من ربنا بحمده عليها..

أكون أو لا أكون يقول...

ياسلام... هو فيه أحلى من الإبتسامه...
يارب يديم الأبتسامه والفرح يا أحلى ورده...

وكمان بتعكس على نفسية الشخص اللي يشوفك... خصوصا لو كان متعود على إبتسامتك... وفي يوم مش شافها... بيصيبه إكتئاب ههههه.... علشان كده لازم تكون الإبتسامه دايما على الوجه... حتى لو كان الإنسان متضايق... خصوصا داخل الأسره... بين الأهل... الزوج والأولاد... لأنها يتعمل جو من الطمأنينه...

بوســـــــــــت هايل ياكيورتي...
: )))))))))) هههه

أكون أو لا أكون يقول...

بالنسبه للقاء... إن شاء الله تنبسطو يارب... ويكون لقاء ابتسامااااااااات وفرح...
مش تنسوني...
ياريتني أجي معاكم...

لحظة تأمل يقول...

الله عليكى بجد
بقى صعب اوى تلاقى حد مبتسم الصبح وهو بيبدا يومه

ربنا يديم عليكى اجمل ابتسامة

mahasen saber يقول...

تبسمك فى وجه اخيك صدقه

وفعلا الناس فيها اليى مكفيها ننكد عليها كمان فى الشارع ليه

خليكى علطول كده يا كيارتى مفيش احسن من ابتسامة القلب

mahasen saber يقول...

بس انا ساعات بضحك فى الشارع مع نفسى ههههههههههه

شفتى العته بفتكر حاجات تضحك اعمل ايه

بهزر بهزر

يــوم جــديد يقول...

مش عارفة أقولك حاجة غير "انتي جميلة أوي بجد" إحساسك راقي ومشاعرك سلسة
بتعرفي توصلي من غير لف ولا دوران يمكن لأن مشاعرك صادقة ونقية
مش بيعرف يبتسم غير اللي بجد جواه صافي ونقي
عارفة من ضمن النوايا اللي باخدها قبل ما أخرج إني أبتسم في وش مسلمة عشان آخد أجر الصدقة
لكن لقيت فعلا إن الابتسامة مش بس بتأثر في نفسية اللي قدامك ، بتأثر في نفسيتك انتي كمان؛ بكون خارجة معيطة ومضايقة وأبتسم لأي حد أبقى كويسة
:)يارب الكل يعيش البسمة

حاسوباتيه يقول...

بتفكريني بنفسي كانوا البنات في الكليه يقولولي هو انتي مش بتبطلي ابتسامه بنحب نشوفك لما نخرج من الامتحانات تقولشي مهرج بضحكهم مثلا ممكن يكون جواها هم الدنيا بس لازم نصبر ومش نكشر

roody hanem يقول...

انتى عارفه من غير ما اشوفك متخيلاكى مبتسمه دايما ومشرقه

يارب يديمها عليكى ومتكشريش ابدا ابدا

بس برضه نفسى اشوفك عشان اتأكد بنفسى (:

marmar يقول...

ربنا ما يبعد عنك وعن كل المسلمين الابتسامه وراحه البال
اللهم امين يارب

وردة يقول...

كيارا
انا نفسي مش في اول تعليق
طيب العشرة الاوائل
هههههههههههههه
ربنا يكرمك ويحبب فيكي خلقه والمدونين كلهم يارب
بوستك جميل وبيضحك زي وشك اللي منور من ضحكتك
علي فكرة ممكن الاهل اللي زي الست اللي انتي قابلتيها في المترو هما اللي خلونا نكشر واحنا ماشين
بمعني تاني لو حد كبير لاقاكي ماشية مبتسمة بس مش بتضحكي بيقولو عليها قلة ادب
شوفتي النكد
انا حجرب الميك اب بتاعك
وان شاء الله حقولك علي النتيجة
ماشاء الله عليكي
ربنا يكرمك
سلام

أمير البلانكو يقول...

كيارا

حقآ

ماأجمل الابتسامه في زمن مليء بالحزن

ربنا يسعدك دايمآ يا كيارا

ياااااارب

حروف (دلو مرة ثانية وجرح ثاني سابقا) يقول...

65 تعليق حرااااااااااااااام ليه نزل امتي دة اعمل ايه اعمل ايه مش عارفة اقرا ولا اعلق عند ناسسسسسسسسسسسسسسسسسس
حقرا واجي اعلق تاني
سلام يااختي ياحببتي

صوت من مصر يقول...

هههههههههههههههههههههههه
ادينى ببتسم اهو اوك

مـجـنـووون يقول...

ربنا يديم عليكي الأبتسامه

ومتحطيش في بالك الناس مش بيعجبها العجب والا الصيام في رجب

لقاء المدونين دعوة عامه والا خاصة ؟؟؟

تقبلي مروري
مجنووون

Eno يقول...

فعلا ياكيارا الابتسامه مهمه اووووووووووي في حياتنا كفايه انها بتنسينا حاجات كتيره اوووي ولو لثواني :)

عاوزه اقولك اني العنوان بتاع المركز الثقافي كده مش صح

انتي رحتي قبل كده ولا حد قالك عليه
علي العموم رجعي 140 اونلاين دليل من النت وشوفي العنوان الصح هو اللي موجود ولا اللي انتي كتباه ؟؟

تحياتي ليكي :)

elsha3er يقول...

جميلة الابتسامة دايما ربنا يديمها عليكى وتكونى سبب فى سعادة الناس


تحياتى

احمد الشاعر

جارة القمر يقول...

موضوع حلو اوي ياكيارا
بس عارفة انا كمان زيك في عز مابكون مضايقة باضحك حتي ان الناس اللي حوالية بتستغرب من كدة بس عارفة انا باقول دايما ايه ذنب الانسان اللي انا هاكشر في وشه اشيله همومي ليه
ربنا يديم عليكي البسمة ويرزقك بالانسان اللي يحافظ عليكي
تحياتي لكي

Tamer Nabil يقول...

يمكن عشان الناس عايشة

فى ظروف صعبة

وايام مرة

بقى الضحك علامة من علامات

التعجب والاستغراب


الابتسامة جميلة

والاحلى اننا نحاول نكون سعداء على قد ما نقدر

فالحياة لاتكون على وتر واحد

ربنا يكرمك

تحياتى

Esraa Hamed يقول...

السلام عليكم

ازيك يا قمر

كنت عايزة ادعيكي
لحضور توقيع كتابي
"أحيانا و أحيانا" يوم 11 مارس 2009
الساعة 7 مساءا
بمكتبة البلد أمام الجامعة الأمريكية

http://www.facebook.com/event.php?eid=133120355079#/event.php?eid=133120355079


اتمني ان تشرفيني بالحضور
:)

Rania يقول...

موضوعك رائع زى العاده يا سكر
و اكيد الابتسامه بتضيف على الوجهه جمال تانى خالص

تحياتى

elsha3er يقول...

كيارا هانم

المهم عندى اعرف انتم معايا وعجباكم الفكرة ولا لا اما حكاية الهجوم زيى الوثيقة انا صاحب الفكرة وانا ان شاء الله ححل المشكلة دى لو حصل حاجة انا مش حدخل حد منكم الا لماتبقى خلاص مسألة منتهية

بس اللى يهمنى الفكرة وتقبلها


تحياتى

احمد الشاعر

elsha3er يقول...

لا انتى فهمتينى غلط التوسع مش للدرجادى احنا حنعمل حزب وجريدة فى المدونة يعنى برضه حتبقى الكترونية لمرحلة ما تثبت بس نجاحها تحت اسم التدوين يعنى برده حتبقى عاملة زى مدونة اسمها حزب المدونين وجريدته

ودى مالهاش خطوات تتعمل وبعيد عن المسألة القانونية زى ما المغاربة عملو حزب المدونين وعملو جريدة الكترونية ودلوقتى بسم الله ما شاء الله لهم دور بارز


تحياتى

احمد الشاعر

مهندس / على درويش يقول...

السلام عليكم /

للأبتسامه تأثير جميل على الشخص المبتسم وعلى من يراه

ومنها أيضا صدقه
والأحساس بالبهجه دائما اظن انه أجمل ما في الكون


ابتسم عدما تكون حزين
وابتسم عندما تكون سعيد

قمه الحزن أن تبتسم وفي عينك ألف دمعه.....

::::::::::::::

قبلي مروري

حسام غانم يقول...

ربنا يديم عليكي البسمة يا ستي

بالنسبة للسؤال بتاع ليه البنات مش بتبتسم في الشارع

فده لأن فعلا بيعتبر الضحك في الشارع قلة أدب من وجهة نظر الناس

عابرة يقول...

شي حلو كتير انك تكوني مبتسمه دائما
انا دائما بكون مبتسمه وبالذات الصبح مع فيروز وطريق المدرسة مع صاحباتي بكون مبتسمه بس بحاول اخفيها علشان الناس ما يحكوا انوا هاي البنت مجنونه او بتبتسم للي رايح وللي جاي
بس احلى حاجه الواحد يضل مبيتسم ما في احلى من هيك
ومتل ما قال الرسول علية الصلاة والسلام : تبسمك في وجه اخيك صدقة
ومين احسن تبتسم ولا تبقى مكشر وتعب عضلات الوجه
وكنت متمني كون معكم بلقاء المدونين يوم الثلاثاء بس للاسف المسافه الي بتعيقنا كبيرة بس يوم من الايام رح حقق حلم سفري لمصر وزور ملتقى المدونين

موناليزا يقول...

:) فكرتينى بنفسى
بس انا فاكرة موقف حصلى تقريبا وانا فى ثانوى (اصلى مبتسمة بقى لى كتير يعنى)
المهم ماشية فى الشارع لوحدى وكالعادة مبتسمة لقيت اتنين شباب ماشيين وواحد بيزق التانى ويقوله عدينى ياعم لما اشوفها بتضحك على ايه:)
طبعا الكلام عليا
ومن يومها وانا قررت طول ماانا ماشية لوحدى لازم اصدر الوش الخشب(على قد مااقدر لانه بيبقى طبع):)
احلى حاجة بجد اننا مسلمين واننا نثاب على الابتسامة

فيه حاجة عازة اعلق عليها وهى انه فعلا مايصحش البنات يضحكوا بصوت عالى حتى لو المكان مخصص للسيدات لان ديننا بيقول اجتنبوا الشبهات فمالوش لازمة حد ياخد انطباع سئ من صوت ضحكتهم العالية(دعونا نبتسم فى صمت):)

dalia يقول...

كياراااااااااا

انا من كتر الابتسام مش بعرف امثل انني مكشرة وبكتشف ان معظم الحوارات اللى بعملها وانا بعيد تشغيل الMP3 اني بضحك كتير وده بيخلي الشخص اللى بقابلة مطمن منى جدا بس تاني يوم في الجرنال بيلاقى شغل معارض جدا بيتخض ويبقوم يكلمني ويقول كل ده يطلع منك هههههه

تحياتي يا قمر
مش عارفه والله اقدر اترك الشغل ولا ايه بس اي تفاصيل اللقاء يعني علشان نتحمس شوية

أكون أو لا أكون يقول...

http://www.petitiononline.com/ttwpdi/petition.html

هذه عريضه تفكيك اسرائيل... ياريت توقع جزاك الله خيرا...
ولا تحسب أنها غير مجديه... ولا تحسب أن صوتك لن يغير شيئاً...
سيغير الكثير... طالما أننا عازمين على التغيير.... وبكل الوسائل.

DoNyA يقول...

ربنا يفرحك كمان وكمان
مفيش اجمل من الابتسامه في الدنيا
حتي في اصعب الاوقات
فعلا بتنور الوش
وتديكي جمال رباني

ربنا يسعدك يارب

Butterfly يقول...

أنا برده بتضايق أوى من الناس المكشره على طول دى
مع ان ماما وبابا دايما بيقولولى انى مكشره على طوول وكده
بس أنا مش بكشر غير لما بيبقى فى حاجه حصلت
على العموم ربنا يديمها عليكى نعمه هههه

أحــوال الهـوي يقول...

الابتسام
و بشاشة الوجه من صفات المؤمن
و مثال كنت باحبه زمان لاقيني و لا تغديني
يعني كن باشا هشا و قابلني بلطف و ابتسام افضل بكثير انك تعزمني علي الغدا و كلك نكد

ادام الله عليك ابتسامتك قبل و بعد الزواج و خدي بالك من اللي ملاحظ ابتسامتك ده عريس المستقبل

تحياتي

elsha3er يقول...

كيارا هانم

انا ممكن اعرف ايام ما عرضتم الوثيقة كانت مرحلة الهجوم عليها فين بالظبط فى مرحلة الفكرة ولا مرحلة تكوينها وعرضها ياريت تساعدينى فى الحكاية دى هو لغاية دلوقتى تمام


تحياتى

احمد الشاعر

:: Salma Emad :: يقول...

ربنا يسعدك ياكيارا

و يديم عليكي الابتسام و الفرح علي طول

و حتي بعد ما تتجوزي لان انتي اللي بأديكي تبتسمي و تخلي اللي حوالكي يبتسم

ربنا يكرمك يا جميل

mostafa rayan يقول...

ربنا يديم عليكي البسمة يا بنت منطقتي

اقصوصه يقول...

في رايي

القدره على الابتسام مب شي سهل

انا احيانا احاول اكون بشوشه

بس الهم يثقل القلب بعد

يعني كيف نضحك وداخلنا حزن

مادري بس اشوفها صعب شوي

رغم اني مقتنعه ان الانسان لازم

يكون دووم بشوش

بس للاسف ما اقدر اطبق هالشي ع نفسي

تدوينه جميله :)

طلاب من أجل مصر يقول...

بوست جميل

ربنا يكرمك ويديم عليكى البسمة


دى أول مرة أدخل المدونة وان شاء الله مش الاخيرة

rovy يقول...

السلام عليكم
ما شاء الله عليكى ربنا يبارك فيمى و تدوم ابتسامتك يارب ..

تحياتى دوما

الطالبة عفو الله يقول...

بوست جميل اوي يا جميل

طبعا مفيش احلى من الابتسامة و سبحان الله بتدي للوش جمال و بتخليه مشرق و لي يشوفه ينشرح له صدره

يا رب ديما تفضلي مشرقة ببتسامتك الجميلة

ربنا يسعدك ديما يا حبيبتي

على فكرة انتي وحشاني اوي و مش بلقيكي في الاميل خالص

بـسـمـــة صـــــلاح يقول...

بوست كميل خالث مالث
ربنا يديملك ابتسامتك
وانا كمان مش اسمي بسمه
هههههههههه
وحشتيني اوي ياكيارا
تعرفي والله لو كان بإيدي كنت جيت بتاع المدونين دا عشان اشوفك
بس يلا محدش عارف يمكن نشوف بعض بعد كدا
سلام للنونو

GiGi يقول...

يارب تفضلى عمرك كله تبتسمي يااجمل كيارا
فعلا الدنيا مش مستهله بس ساعات بنتخنق
بحبك ياقمر

شمس النهار يقول...

كلامك جميل في البوست ده قوي

aldo rady يقول...
أزال أحد مشرفي المدونة هذا التعليق.