الخميس، أبريل 16، 2009

اصل وصورة



بنقابل ناس بنعرف ناس هما اصل في حياتنا
اتاثرنا بيهم جدا وحسانهم جدا
شفنا فيهم اللي مش قدرنا نشوفه في حد تاني
هما بمعني ادق الحياه
والحياه اثبتت انهم اصل مش تقليد
وبقوا شي اساسي في الحياه
مش نقدر نبعد عنهم ولا نستغنى عنهم بقوا زي الميه والهوا

للاسف بنفتكر اننا امتلكانهم ومنعرفش انهم طيور لو مش راعيناها
وقدرنا قلوبها هتطير
وبعد اما بيطيروا
http://1.bp.blogspot.com/_q6CwuYO0LdQ/Rzn6SriPP3I/AAAAAAAAAIQ/yqnq5sg3JDc/s400/81662453mk6.jpg

بنقعد نلف وندور في الوجوه علي حد زيهم لكن بتكون صور مشوهه

لانهم تقليد ممكن نلاقي كل الميزات اللي فيهم في غيرهم بس عمرهم ماهيكونوا زيهم
علي راى مروان بنلف فى دواير و الدنيا تلف بينا

دايما بننتهى لمطرح ما ابتدينا

طيور الفجر تايهة فى عتمة المدينة

بتدور

ما بنكتبش الرسايل ما بنتظرش رد

لا حد فى يوم سمعنا و لا بنسمع حد

طيور العمر تايهة فى عتمة المدينة

بتدور

ساكنين فى عالم يعشق الخطر

فيه الطيور تهرب من الشجر

و تهرب النجوم من القمر

و تهرب الوجوه من الصور

بنلف فى دواير ندور على الأمان

و نلائينا رجعنا تانى لنفس المكان

ندور ندور ندور
نحلم و نحلم بالحياة المفرحة
و اتارى احلامنا بلا اجنحة بلا اجنحة

ندور ندور ندور بجناح حزين مكسور

ساعات نشوف فى العتمة و ساعات نتوه فى النور
ساعات عيونا بالاسى تفرح وساعات فى ساعة الفرح ننوح
 
 

http://shots.ikbis.com/image/77339/medium/5enses.jpg
يبقي لية نسيب الاصل ونروح للصورة
دعوة للجميع خلي بالكم من الاصول اللي في حياتكم وبلاش الصور وبريقها يخدع اعينكم

68 كلام قلوبهم:

هانى زينهم يقول...

الله .. جميل اوى البوست ده وصعب حد يقراه وما يعلقش عليه . بس المشكلة ان الاصل احيانا بيبقى صورة والصورة بتبقى اصل ومن هنا بتيجى المشكلة . حلوة الفكرة والتعبير يا كيارا . يا ريت كله يبقى كدة .

كيــــــــــــارا يقول...

الحمد لله انه عجبك دا شهاده تقدير بجد

مهو الاختلاط في الامر
انا مش بقول علي حد اصل من كلام ولا من وقت من المواقف والتجارب

وكلامك بجد اخجلني

فينك من زمان ياستاذنا

ABOALI يقول...

هناك من الناس معادن
وهناك من الناس نفائس
وهناك من الناس
العاصى والفاجر



هناك من يغوص فى البحر فيستخرج اللؤلؤ والياقوت والمرجان
وهناك من يغوص فيستخرج
اسماك القرش والثعابين


تلك هى الدنيا
علينا ان نختار من صندوقها الكبير

من يصلح ولا يصلح


ولكننا نحتاج الاصل والصورة

لندرك قيمة الاصل وتفاهة الصورة


ولالالالالالالالا ايه

منورة مدونتى دايما يا كيارا

mohamed ghalia يقول...

معاكى حق يا كيارا لازم نركز على الأصل
الموضوع ده قريب من موضوعى الجديد ياريت تبقى تشوفيه

كيــــــــــــارا يقول...

صح ياابوعلي

والله انا مقصره مع الكل في موضوع الردود ادعيلي المده دي تعدي علي خير بس

أمبارح كان عمرى عشرين يقول...

الله عليكى بوست جميل
ومعاكى حق فيه ناس بيكون صعب جدا اننا نعوضهم وبنحاول ندور على صفاتهم فى الناس ومش بنلاقيها

بوست جميل جدا
دمت بكل خير

Butterfly يقول...

فعلا
ساعات أوى بنتخدع ونسيب الأصل ونروح للصوره ونرجع نقول ياريتنا !!!

king_somya يقول...

موضوع جديد ومفيد فمن الضروري ان يبحث الانساس دائما علي ماهو اصيل بلا قناع زائف

الشاعر الحزين يقول...

كيارا

كنت عايز أسألك سؤال

هل أنتى فعلا حاسه بقيمة مدونتك ؟؟؟؟

أنا دايما بلاقى فى مدونتك الاختلاف
المواضيع التى تمس الانسان فعلا

المواضيع التى تستحق القراءه

بجد أتمنى منكى الاستمرار على هذا النمط الرائع

ولكى منى كل التحيه والتقدير

A.SAMIR يقول...

مش دايما احنا اللي بنضيع الاصول مننا
ساعات القدر بيلعب لعبته وبيغيبوا غصب عننا
و ساعتها فعلا الحياة بتسود وما بنعرفش قيمتهم الا لما بيضيعوا مننا

MaNoOoSh يقول...

فعلا فعلا الناس الاصل فى حياتنا هم اللى بيخلوها حياة
واللى يقدر قيمة الاصل ويحس بثيمتة أكيد عمرة ما هيخنقة
لكن ساعات الواحد الدنيا بتغرة ومبيحسش بمدى احتياجة للأصل وساعات للأسف بيكون بعد فوات الأوان

مسدس صغير يقول...

فعلا الاصول بقت قليلة جدا اليومين دول.
والصور كتيرة ومزيفة
ربنا يهدينا
احييكى على البوست
نورتى المدونة
هههه

عاشقه الرومانسيه يقول...

حاضر
ولو انى مش فاهمه

هو فيه ايه؟؟؟

smilyrose يقول...

وحشتينى يا اصل البسمة فى دنيتى

ياريت كل واحد فعلا يحس باللى فى ايده

ومش يضييعه ويعرف قيمته قبل

فوات الاوان وقبل ما يجى وقت


لا ينفع فيه ندم ولا دموع


ابقى طمنينى عليكى يا طفلة

smilyrose

وردشان

روح الحب الصادق

لورنس العرب يقول...

بس ساعات -او في الغالب- الاصول هي اللي بتمشي ومش بيكون لينا يد في انها تبعد
في الحاله دي لا انا مش بروح للصور
لكن بعيش على ذكرى الأصل

ايوشة يقول...

عندك حق ياكيارا فى كلامك تسلم ايديك على البوست ويمكن انا واحدة من اللى فى بعض اللحظات دورت على الصورة وسبت الاصل :(

Sonnet يقول...

بوست جميل جدا يا استاذة
إيه الحكم القوية دى !
(دعوة للجميع خلي بالكم من الاصول اللي في حياتكم وبلاش الصور وبريقها يخدع اعينكم )
بالتوفيق

رؤية يقول...

حاضر
من عنينا

بوست رائع ومعناه جميل ومهم

تحياتى

جورنالجى يقول...

بوست جميل
الناس معادن فيهاالغالى وفيها الابرخص التراب

وردة يقول...

المشكلة ايه يا كيارا
اننا مش بنعرف انهم اصل غير لما نتعرف علي التقليد او المزيف
وساعتها بنتمني يرجعو تاني
ونحافظ عليهم
بجد ياريتنا كنا حافظنا عليهم
جيتي علي الوجع البوست ده
ربنا يكرمك
الموضوع جميل جدااااااا
سلام

صوت من مصر يقول...

للاسف فى اصول كانها صوره ولا ايه يا كياره
محدش عارف الاصل هيخبيله ايه بس والله انا لى مليون صديق ومليون حبيب لكن كلهم اصول ليسوا بصور

إبن مصر يقول...

السلام عليكم

الأصل دايما بندور عليه
ولو قبلتنا صوره
نقول ونروح للصوره ليه
الأصل معانا يبقى
نتعلق بيها ليه
لكن ساعت كتيره
بتبقى حياتنا كلها
بصوره متعلقه
ومعناها لينا كبير


موضوع حلو وأثر فيا جدا مش عارف ليه ؟؟؟

عموما انتى دايما متألقه ومبدعه مش حاجه جديده عليكى

تحياتى


موض

elsha3er يقول...

السلام عليكم الناس اللى نسونا خالص

ازيك يا كيارا اتمنى انك تكونى بخير

ياريت تيجى عندى وتقولى اية رأيك وتناقشينا


تحياتى

احمد الشاعر

الجواز و سنينه يقول...

المهم تعرفى ان الاصل من الصوره
و مش تتخدعى و تحسى الاصل صوره او العكس
موضوع حلو اوى
بس فين مواضيعك البريئه
انا بحس انك بريئه اوى من جوه
ما تتعمقيش اوى فى النكد اصله جى جى
انا كنت بقول كيارا دى برائه البلوجر كلها فيها
تحياتى يا جميل

DoNyA يقول...

كيارا

دايما بتبهريني
بكل البهجه والحب اللي جواكي
تنويه لازم كلنا ناخد بالنا منه
علشان منصحاش في يوم نلاقي
كل الاصول ضاعت
وبعينا زي الشجره اللي من غير جذر
اي شويه هوا يوقعوها

nona يقول...

المشكلة الكبيرة ان الصور بقت شبه الأصول اوى اوى
الفرق بينهم بئا غير ملحوظ والتمييز بينهم بئا صعب ومتكتشيفهوش الا فى المواقف الحاسمة والمهمة
الصور بقت بتجيد التمثيل بدرجة ممتاز علشان تتلخبطى فيها وتفكريها تستاهل الحب والتضحية

جزى الله الشدائد كل خير
ففى غمراتها انتبه النيام

موضوع جميل

mostafa rayan يقول...

كلامك صح قوي

----------

ايه اخبار تسجيل الحلقة ؟

جنّي يقول...

السلام عليكم

بداية اسجل اعجابي بكلماتك الرائعة والفكرة بنفس الروعة ..

فعلا ساعات ننسي الاصل ونبحث عن الصور الزائفة الباهتة رغم بريقها ..

ولكن احيانا يكون التقصير من الاصل فيجعلنا نبحث عن الصورة ..

مـجـنـووون يقول...

موضوع في متهي الجمال والروعه

وعندك حق في ناس بيبقوا اصول في حياتنا

بس للأسف مش بنحس بيهم غير لما يبعدوا عنا

ويا ريت اشوفك في مدونتي

تقبلي مروري
مجنووون

ELMASRYA - MRS WRITER يقول...

البنوتة العاقلة كيارا

كل لما بتكتبي أكتر بحبك وبحترمك أكتر

مواضيعك تحمل دائما فكرة عاقلة قوي بتطرحيها بمنتهي المنطق والحب في نفس الوقت

بالنسبة للأصول في حياتنا طبعا دول أهم ناس ويجب المحافظة عليهم خصوصا لو مرينا معاهم بتجارب أثبتت لينا إنهم قريبين منا قوي ومخلصين قوي قوي

لو ضاع منا في أثناء رحلة حياتنا حد من النوع ده بتبقى خسارة أكيد

عكس ناس خسارتهم بتكون مكسب لأننا افتكرناهم أصول وانبهرنا بالنور اللي بيشع منهم ولما قربنا منهم لقيناهم مجرد نيجاتيف باهت ومشاعرنا الطيبة وسلامة نيتنا هي اللي هيأت لينا إنهم أصحاب بريق أصلي

ربنا يحميكي يا كيارا ويحفظلك عقلك الراجح

دمتي سالمة بحفظ الرحمن

حسن حنفى يقول...

الناس دي للاسف اما تمشي من حياتنا بتسيب تأثير رهيب وبيخلفوا وراهم فراغ مرعب

من غير عنـــوان يقول...

people in your life
for a season
or
a reason
or a life time

حواء يقول...

بوست رائع بجد
تحياتي

ريمان يقول...

السلام عليكم


معاكى حق بجد

والله فعلا

على فكره بحب اوى اغنيه بنلف فى دواير

لحظة تأمل يقول...

عندك كل الحق يا كيارا

بس اوقات بنتلخبط وبناخد وقت عشان نعرف الاصل من الصورة

واكيد لازم نحافظ على الاصول اللى فى حياتنا لانهم بيعملولها اجمل معنى

تحياتى

الازهرى يقول...

بعد الذى قرأته لا اجد ان احدا ربما يتخلف عن الانضمام اليك فى دعوتك

تحياتى للقلم الجميل

شمس النهار يقول...

المشكله ياكيار ان البني ادم مابيحسش بالنعمه اللي في ايده الالماتضيع منه نهائي
وبيحاول يرجعها مابيعرفش
ولمايلاقي صوره منها اوشبها بيحاول يحافظ عليها ويعمل معاها اللي كان مفروض يعمله مع الاصل
بس عشان ده الشبيه مش الاصل بيكون رد الفعل مختلف مابيرضيهوش هنا الندم بيزيد علي اللي راح والارجعش
بوست حلواوي
تسلم دماغك ياايها الفيلسوفه الصغيره

طـــائر الليــــل الحـــــزين يقول...

كيكــــــو
جميل قوى البوست
الكلمات جميلة والصور اروع
تسلم ايدك يا قمراية
تحياااااااااااتى

dina يقول...

الغنوة جميلة و كلامها يجنن طبعا عمنا الابنودى...و انا معاكى يا ريتنا ناخد بالنا من اصول حياتنا
تقبلى المرور

أحمـــــــــــــد أبو العلا يقول...

لكن لما الأصل بيمشي وتبعده الحياه يعني, بيكون شئ مؤلم

عشان كده فيه ناس بتفضل أن ميكونش فيه أصول خالص ويكون الكل مجرد صور

همس الاحباب يقول...

رائع جدا
تسلم ايديكى
فعلا كثير بنتوه فى النور
ومنعرفش نفرق بين الاصل والصورة

جميل قوى اختيارك لهذا الموضوع
تحياتى

الطالبة عفو الله يقول...

الله عليك يا كيارا موضوع هااايل بجد

يسلمواديك

بجد حاجات كثيرة في حياتنا حلوة و مش واخذين بالنا منها

منها الناس الطيبة الي بنحبنا بجد

فعلا خلونا في الاصل و تعالوا ناخذ بالنا منه عشان منروحش ندور على الصورة

ربنا يسعدك يا كيرو

Tamer Alhosiny يقول...

عزيزتي الجميلة كيارا

اولا انا سعيد جدا بزيارتي ليكي في البروفيل بتاعك علي الفيسي بوك

اما بقي بخصوص البوست التحفة ده فبجد
مهم جدا اننا ندي من طاقتنا لكل الاي حوالينا
نكون احنا مصدر البسمة علي وشوش حبايبنا

نكون احنا مصدر سعادة الاي بيحبونا
علشان يفضلو دائما يحبونا

الحب طاقة لا تحرم من حولك منها

حاول فقط ان تقول احبك
لوالدك لامك لاخوتك لاصدقائك
وستجد تاثير عجيب
الحب طاقة فلا تحرم من حولك منها


تامر الحسيني
انسان عاشق حر

adel يقول...

تعليق متاخر بس احسن مامفيش
هههههههه

كلامك صح بس مين دلوقتي بيفرق بين اللي صورة و بين الحقيقة ؟؟؟

marmar يقول...

كوكتي مالك بقى انا مصدقت ان مزاجك بقى عالي
تعرفي بجد كلامك صح احيانا كتير بننخدع في حياتنا من ناس فكرنهم كل حاجه مع انهم ولا حاجه وبنروح للناس الي مكناش مدينهم قيمتهم ويطلعو حد حلو وجميل اوي
زيك انتي كده حد حلو وطيب وسكوره

لجين أبو الدهب يقول...

الصورة خداعة لابعد حد ..

والاصل احيانا بيكون مؤلم واحيانا بيكون جميل ..

لكن فى كل الحالات بيعلمنا ..

دمتِ بخير ..

ذو الوجه المبتسم يقول...

السلام عليكم
كيارا
دعوة للجميع خلي بالكم من الاصول اللي في حياتكم وبلاش الصور وبريقها يخدع اعينكم

دعوة مقبولة
علشان كده لازم كل واحد يقدر يفرق بين الاصل وبين الصورة
الحكاية مش بسيطة ومش مجرد كلمات
لازم ناخد بالنا كويس قووووى
علشان منرجعش نندم
تقبلى تحياتى

momken يقول...

البوست رائع بجد

تسلم ايدك والفكره جامده جدا

الناس كلهم اصول...لكن كثيرا مت يملاء الصوره رتوش والوان زائده
هذه الرتوش ما يختفى خلفها الاصل

فان ذادت الرتوش ذات اختفاء الاصل


الغش طرطش عالوش بويه

مدرتش مين بالياتشو

او مين زازين

شاف الزمان وشى مش زى اخويا

ضاعت وشوشنا بين زين وشين



تحياتى

kochia يقول...

صحيح ساعات بنفكر انهم طيور
ومش بنحس الا لما يروحوا
وعمر الصورة ما بتكون زي الاصل مهما كانت دقيقة

بوست جميل وحقيقي جدا
تحياتي

نهــــــــــار يقول...

السلام عليكم...
كلام جدا رائع ....
وأن شاء الله ناخذ بنصيحتك..
...
في أمان الله يا عثل ..

Soul.o0o.Whisper يقول...

كيتى الجميلة

أولا بأعتذر لك عن التأخير حبيبتى
معلش كانت ظروفى مش ولابد

بس الحمد لله
:)


فعلا يا كيتى كلامك صح جدااااااااا
فى أصول فى حياتنا
لا يمكن نعيش من غيرها
و لما بنفقدها
بنحس إننا فقدنا نفسنا

و نفضل ندور فى صورة
و ننصدم فى الصورة
و نلف و ندور
و نرجع مكان ما ابتدينا



تحياتى ليكى يا جميلة على البوست الرائع دا

قوس قزح يقول...

بحب الاغنية دى اوى

و الاصل طبعا احلى من الصورة
بس يا ترى الواحد هو كمان اصل للى قدامه و لا مجرد صورة !!

تحياتى

د/ رامي شهاب الدين يقول...

كلام صحيح ومنطقى

لكن أهم شئ إننا نمتلك القدرة على التمييز بين الأصل والصورة

أنا شخصيا أعتقد إنه شئ صعب ، وخصوصا إننا عايشين فى عالم مليان كدب وزيف للأسف

تحياتى

dalia يقول...

كيارا الشقية
ساعات نشوف فى العتمة و ساعات نتوه فى النور
فعلا هي ديه طبيعة الانسان موضوع في منتهي الرومانسية
فينك من زمااان

صدى الصمت يقول...

والله عندك حق ساعات بيكون فى حياتنا كنوز من البنى آدمين وبنخسرهم فى لحظة ونرجع نندم عليهم سنين
تحياتى

عاشقة الورد

عالم ماريونت يقول...

حلو اوي يا كيارا

لمستني بجد حكاية الاصل والتقليد دي

بس قوليلي
انا حكاية التنسيق دي طلعت عيني
انتي قولتي لي اعملها ازاي؟

صفــــــاء يقول...

ليه بنفكر ان الأصل فى العلاقه هو الامتلاك ؟
مع ان الترابط والتوافق وتمتع كل شخص بنوع من الحريه الذاتيه هو اللى بيحافظ على العلاقه
لكن الامتلاك من أسوء انواع الأنانيه وبتتسبب فى العكس وهو الخسارة
كل سنه وانت طيبه يا كوكى
سلامى ومودتى

تامر علي يقول...

إشارة جميلة جداً ... لكن قلما ينتبه الانسان لما يملكه إلا بعد فقده .... غالباً التجربة المرة فقط هي التي تثبت لنا الفرق بين الصور والأصل ... فمثلاً كم رأيت شاباً يفضل صديقه على والده وهو لايعلم بأنه مع أول اختبار سيفر الجميع ولا يبقى سوى الأصل ... لكن بعد فوات الأوان

تحياتي على الطرح المثمر الجميل

dr_samarmar يقول...

ألله يا كيارا الله ع الكلام الرائع الجميل الفظيع

مش ممكن :)

صح مية فى المية

لازم نحافظ عليهم لازم

الله :)

msafa يقول...

رائع البوست والفكره لطيفه جدا الاصل والصور
علشان بنفقد الحقيقه دايما ...
سعات بتكون الصور اجمل

الشيماء صلاح*shosho* يقول...

فعلا لازك نحافظ عالاصول اللي في حياتنا بس احيانا بننخدع وبتطلع الاصول دي صور بشعه

بوست رائع

دائما انتي مبدعه
تحيتي..

مصعب صلاح يقول...

حلو البوست دا جدا
وأسلوب العرض رائع

hasona يقول...

السلام عليكم

كلامك جميل قوي
وفيه عبرة وحكم

ولأننا أوقات بنتوه بين الاصل والصورة
ونخلط بينهم
يبقي اللي يلاقي أصل ما يفرط فيه

،،،،
بس ايه الطمع ده بقي
عايزة تحلم
وكمان الاحلام تبقي بأجنحة
عايزة احلام تحلق في السما

Nabil يقول...

السلاااااااام عليكم

ازييييييييييييييييييك؟؟؟؟ اخبارك ايه؟؟؟

طبعا كلامك مظبوط جدا جدا

واللى معاه اصل لازم يخلى باله منه اوى اوى

تحياتى ليكى دمتى بود

أبو العريف يقول...

كيارا
اولا
مع انها متأخره
اهلا برجوعك
بس انا اللي ماكنتش باجي بقالي فتره

بس البوست جميل
وكلام مروان جميل

تحياتي

roody hanem يقول...

للاسف الانسان مبيحسش بقيمه الحاجه اللى ما بتضيع من ايده

سواء بقى بنى ادمين كويسين فى حياته او اى حاجه تانيه

ياريته فعلا يحاول يحافظ عاللى فى ايده

سلاموز يا جميل

Sonnet يقول...

تحياتى لك يا كيارا
ادعوك و قراء مدونتك الكرام إلى يوم الكتاب
http://shayunbiqalbi.blogspot.com/2009/04/blog-post_1515.html

rovy يقول...

الله يا كيارا ..
نصيحة مهمه جداااا ..
ربنا يكرمك حبيبتى
احساسك راقى و جميل ربنا يحميكى

تحياتى