الأحد، يونيو 28، 2009

يعني ايه صداقة

110 كلام قلوبهم


في الحياه بنقابل ناس بنعرفهم بيوصولو قلوبنا 

بنفرح معاهم بنحزن معاهم 

بس هما درجات في حياتنا 

كل درجة ليها مسمي 

ليها حقوق

ليها واجبات

لها حدود

مش معني ان حد منهم اتحط في الدرجه دي انه مش له مكان في القلب 

او انه مش ممكن يزيد لدرجه اعلي 

كل درجه وليها مواقفها وحدودها 

مواقف ظروف حاجات كتير بتخلي الحد يعلي من درجه لدرجه 

لكن مفيش حد بياخد درجه معينه فجاه بتيجي واحده واحده

اصلها لو جت بسرعه يبقي هتروح بسرعه

هنا 

عاوزه كل اللي يدخل يقول 

يعني ايه صداقة ؟؟

درجاتها ايه ؟؟

وكل درجه مسماها ايه ؟؟

الحقوق في كل درجه ايه 

الواجبات في كل درجه ايه؟

الحدود في كل درجه ايه؟

ايه اللي بيخلي فرد يعلي من درجه لدرجه ؟

ايه اللي بيساعد الصداقة علي الاستمرار ؟

ايه بيخلها مع اول مطب تقع ؟

طبعا انا هرد معاكم وهتكلم معاكم وفي نهاية البوست في بوست هينزل عن المجمل 

وبعده هتكلم عن مواقف حقيقيه بتحصل كل يوم 

والمناقشه مفتوحه تقدروا تناقشوا بعض وعيشوا بئه :)

لكم مني اطيب الامنيات 

كيارا 


الخميس، يونيو 25، 2009

امر ولابد منه :)

51 كلام قلوبهم
 
عااااااااااااااااااااا ا  الحر عامل فيا بلاوي
مث بحرف اقعد ساحه علي بعضيها
وطبحا لان الكل افتكل اني عملت الاجازه حثان انا زحلانه او نفثاويتي مث ولابد
فانا اقر واحترف اني نفثاويتي زي الفل وفرحااااااااااااااااانه بس الحررررررررررررر
عمال يفصل شبكتي
ولان اغلي ناس لقلبي طلبت اني ارجح
واكتب اي حاجه
فهقولكم اني هقعد ساحه في اليوم بث
علي اد صحتي في الحر دا
بث مث حنزل بوثتات الا لما الجو يتحسن
وهرد علي اللي هقدر عليه
اتفقنااااااااااااااااااااااا
اهو انا بقول اهو
النفثاويه حديد
بس الحرررررررررررررررررررررررررررررررررر
انا من حلوان ياناااااااااااس 

الثلاثاء، يونيو 23، 2009

اجازه تدوينيه واغنيه

52 كلام قلوبهم


طبعا انا هاخد اجازه تدوينيه معلش مش هقدر ارد عليكم

ياريت مش تزعلوا بس لاني بجد في فتره مش قادره استوعب اي كلام

هتوحشوني اوي وطبعا لاني واحده منكم حبيت اقول دا عشان مش في حد يزعل من كيارا

اسمعوا الاغنية دي بجد انا من اول اما سمعتها وانا مبهورة بيها حمل هنا

السبت، يونيو 20، 2009

ربنا يتمملك بخير يادودو

57 كلام قلوبهم
ياااااااااااااااااااااااااااااه بقالي كتير مش عملت افراح ولا اعياد ميلاد
ايه الاصحاب دي
الا مافي واحده منكم فرحتني بخطوبه ولا عقد كواز ولا حاجه
اخيرا اخير القلب نور بفرحه القمر
نوربفرحه دودو
مبسوووووووطالك اوي
وحسه اد ايه انتي  عانيتي
بس خلاص احمد جالك
خطف حزنك ورماه
وخطف قلبك وسكن فيه
وخطفك كلك وحببك فيه
هقولك حاجه قبل التورته عارفه هتموتي عليها ياربي علي الفضايح
هقولك خليه تاجكك
والتاج لازم نحافظ عليه
فاهمه
ربنا يحميكي انتي وهو انا فرحاااااااااااااااااااااااااااااااااااانه اوي حسه اني قلبي هيقع من فرحته
اخير قلبك ارتاح ياحبيبه قلبي
ربنا يحميكوا
ويبعد عنكم العيوووووووووووووووووووووووووووون اللي بترشق
كل سنه وهو طيب عيد ميلاده مع قرايه الفاتحه كمان
وان شاء الله الجواز يكون قريب مش بعيد
اممممممممممممممممممممممموه بوسه كبيره وحضن اكبر لحد اما اجيلك اسكندريه 
http://www.bridalwave.tv/CavingWeddingCake.jpg
التورته دي ليكي انتي وهوا
http://images.panet.co.il/articles/01022006-144349-1.jpg
دي بئه للكلللللللللللل
 ودي بقي بغنيها وانتي فاهمه لييييييييييييييه
تيريرارار
لو قاللولك مين يروح للموت عشانك قول انا

لو قالولك مين يضيع لو ساب مكانك قول انا
لو قاللولك مين حبيبك ياحبيبي قول انا

يلا كل اللي تحب تقوله قوله
يلا عمرك ماهتندم علي تقوله
انا دايما ليك وبروحي افديك
انا خوفي عليك اكتر مني انا
لو قاللولك مين يروح للموت عشانك قول انا
لو قالولك مين يضيع لو ساب مكانك قول انا
لو قاللولك مين حبيبك ياحبيبي قول انا
روحي ياروحي انا بحلم بيك ياروحي
انا بس كفايه تحس هوايا
وتبقي معايا هنا
روحي ياروحي انا نفسي ارضيك ياروحي
بس انت اتمني وقول هستنا وهجيلك انا
ويلا كل اللي تحب تقوله قوله 
يلا عمرك ماهتندم علي تقوله
انا دايما ليك وبروحي افديك
انا خوفي عليك اكتر مني انا
بحبببببببببببببببببببببببببببببببك ومبسوطه اووووووووووووووووووي

عشان اجمل عاشقه للرومانسيه اخيرا قلبها دق


وقابلت اللي


يستاهلها بجد
بلغي احمد اخوكي مباركتي ليه 
وبلغي احمد كوزك ان شاء الله في المستقبل اني بباركله وانه اخد جوهره لازم يحافظ عليهااااااااااااااا
وبلغي طنط اني فرحنالها انها هتخلص منك اني واحمد في شهر واااااااااااااحد:)
   

الجمعة، يونيو 19، 2009

صحبان عليا

21 كلام قلوبهم
والله صبحان عليا موت موت موت ياحيني هو في تدا قلت افرفثكو بدل الدموح بتاعت البوثت الثابق

الخميس، يونيو 18، 2009

النجوم تبكى

43 كلام قلوبهم

غمضت عينى

زي كل يوم

شفت النجوم حزينه

بصيت ليها

مقدرتش اقولها مالك بتبكي ليه

كانت بتبكي بصوت


لقتها بتكلمني بعنيها الملاينين دموع

بتقولي بتساليني بعيونك مالي

واللي فيا دا عشانك

بصيت اوي ليها وعنيا ماليها الدموع

مقدرتش اقول ليه


راحت اخدتني في حضنها

وقعدت ابكى

مش عملت حاجه غير اني بكيت

وهيا بكت علي بكائي اكتر واكتر

ولقتني سامعه اغنية استغربت للكلام وللتوقيت

كانت

ياصحبي زمنا غير زمن اللي شافو الخير

هما زمنهم كان كله حنان وضمير


ومهما زمنهم شاب تحس انهما شباب


واحنا زمنا ياصحبي واحنا زمنا ياصحبي

اول شبابه شاب

وزي كل مره لقيت احن ايد في الكون بتشيل دموعي

وبتاخدني في حضنها


كانت ايد ماما اكتشفت ان دموعي مع النجوم


كانت بتنزل فعلا مش مجرد غفوه :(


يلا الحمد لله علي كل شئ

الأحد، يونيو 14، 2009

فوقي ياقطه احنا في غابة الجزء التالت

68 كلام قلوبهم
  
وصلني طلب اضافه علي الميل بتاعي من بنوته موش اعرفها

طلبت مني اني اضفها علي الياهو او الهوتميل وانها عاوزني في حاجه ضرورية جدا وموش ينفع تتاجل

بصراحه قلت الموضوع خطير جدا وضفتها

قالتلي ازيك ياكيارا قولتلها الحمد لله نشكر الله


قالتلي انتي تعرفيني ومش تعرفيني

تنحت شويه وقولتلها معلش انا صغننه وخوديني علي اد عقلي ازاااااااااااااااااااااي اعرفك وموش اعرفك


قالتلي انا مدونه قلتلها جميل واكيد انتي وغيرك بيزورني وازوره قلتلها طبيعي

قالتلي انا قريت الجزء الاول والتاني من بوستك فوقي ياقطه

وبصراحه عجبتني طريقه معالجتك

لكن الاول قبل اما اتكلم ياريت مش اكون محل سخريه منك او من اي حد يقرا الكلام دا

قلتلها انا مش فاهمه حاجه

قالتلي انا كنت عاوزه ارد واقول تجربتي عندك في لبوست لكن انتي لاغيه غير معروف

عشان كدا طلبت اضافه اميلك اللي هقوله يمكن يفيد بنات غيري انهم مش يغلطوا زيي

قلتلها اتكلمي وانا مش هقاطعك

*******************

انا بنت وقربت علي 30 سنه معايا ماجستير وبحضر الدكتوراه علي قدر من الجمال مقبوله الشكل يعني

بدخل النت زي اي حد  بتعرف علي ناس جديده وافكار جديده بس مش جربت احب في مكان شغلي او كليتي

وزي اي بنت بدور علي الحب بمنكاش ودا الشي اللي ناقصني اوي

وفي يوم قابلت علي الشات واحد مصري عايش برا وسنه قريب من سني

وكان بيكلمني عن حبيبته اللي ماتت وانه مفتقدها حسيته اوي

وعجبني وفائه لحبيبته حتي بعد موتها

بقي كلامنا كتير وكل يوم بيزيد عن الوقت اللي قبله

لحد اما في يوم قالي انه بيحبني وانا قلتله اني بحبه

وقررنا انه اول اما ينزل مصر هيتقدم ونتجوز
واتفقنا ان الفتره اللي هو فيها برا هنعتبر نفسنا مخطوبين ونشوف هل ننفع بعض ولا لا

هل احنا مناسبين لبعض ولا لا

والتفكير وكل شي

بدانا نشغل الكام لبعض

ونتكلم بالساعات مبنحسش بالوقت ابدا

وفي يوم قالي لازم نتجوز قلتله ازاي نتجوز وانت في بلد وانا في بلد

قالي هقولك زوجتك نفسي علي كتاب الله وسنه رسوله وانتي هتقولي وانا قبلت زواجك

كانت الفكره مستحيله بالنسبلي

قالي انتي مبتحبنيش قلتله لا بحبك ومتشككش في حبي ليك بس دا مش جواز لازم شهود

الجواز العرفي لازم اتنين شهود دا مين شاهد علينا

قالي ربنا

وفي نفس اليوم فعلااتجوزنا بطريقة الشات اللي انتي قولتي عنها في الجزء التاني

وفي نفس اليوم ضميري انبني وقلتله طلقني قالي لو طلقتك مش هعرفك تاني

وطلقني

رجعت وقولتله انت طلقتني حسيت انه طلقني بجد

ورجعني تاني

بدا الكلام يبقي مفتوح بينا

واكننا مع بعض

الكام وانا من غير هدوم

والكلام عن المعاشره الجنسيه كامله

كنت بحس اني في حضنه وهو في حضني

بس كنت بقرف من نفسي ومن الاسلوب الجواز مش كدا

معتقدش ان في بنت متجوزه ممكن تقرف من الحلال كنت حاسه ان دا حرام

طلبت الطلاق كتير ولما كان بيرفض كنت بقوله انا اصلا مش متجوزاك لان مفيش شهود

الجواز ناقص

وبقيت ادعي ربنا انه يتوب عليا

واستغفرته كتير

وخلاص حجز طياره انه نازل مصر وطبعا هقابله في الشقه مش مراته

ودا كان مخوفني اكتر

واصريت علي الطلاق كان بيهددني كتير انه مش هيخليني اتجوز اي حد لكن

كنت مصره علي موقفي ويوم اما قال انتي طالق لتاني مره حسيت اني ارتحت

لكن قالي انتي خسرتي حد كان بيحبك بجد

مبقتش عارفه هو اللي كنت فيه صح ولا غلط انا جرحته ولا لا

لكن في كل الاحوال

لا يصح الا الصحيح

ولو كان في نصيب بيني وبينه كان هيجي فعلا ويتقدم

انا قلت الحكايه بس ياريت مش تسلخوني

*****************

طبعا في الحوار قالت تفاصيل تانيه انا حذفتها واستئذنت منها دا

وطبعا انا هقول رايي في الكومنتات زيي زيكم ومعلش ياصاحبه الكلام الموضوع اتاخر

لكن كل شي بوقته

اي تعليق هحس انه فيه اهانه للبنت دي انا هحذفه مهما كان صاحب التعليق

عاوزين نناقش الموضوع بمصداقية  عشان الموضوع خطير بجد

السبت، يونيو 13، 2009

تاجييييييييييييين عاااااااااااااااااااااا

13 كلام قلوبهم

جالى تاج من حسن حنفى صاحب مدونة شيفا

بدأت تدون من امتي ؟ و دخلت العالم ده ازاي ؟

كنت مشتركه مع مدونه انتيمتي مجرد انسانه وبس ودي من سنه ومن شهرين تقريبا عملت مدونه ضي القمر للمواضيع الاجتماعيه وايام زمان لمواضيع التاريخ لكن بكتب من سنتين في المنتديات وطبعا بعمل ابحاث تاريخيه عشان دراستي

ايه كان انطباعك في البداية ؟

طبعا انا كنت عامله المدونه مجرد ارشيف لكتاباتي وعارفه ان مش فيي حد هيزورها وكدا ازاي حد يزورني وانا مش معروفه وكدا وكنت مهتميه اكتر بالمنتدي اللي انا فيه لاني معروفه هناك ومعروف اسلوبي لكن في عالم التدوين مش كنت متوقعه ان ممكن حد يزورني

مين اكتر واحد بتهتم بتعليقه علي بوستك الجديد ؟

اللي بهتم بتعليقهم اكيد انا مسجله مدوناتهم عندي كمان بهتم باي واحد جديد بيعلق عندي بجري علي مدونته اعرف منها هو ايه نوع المواضيع اللي بيفضلها وبفهم اسلوبه عشان اعرف ارد علي الكومنت اللي سابه

ايه أهم حاجة اتعلمتها من عالم التدوين ؟

اني اهتم بالنفس البشريه كل مدونه بتعبر عن صاحبها سوا شكلا او اسلوب المواضيع

ايه أكتر حاجة كرهتها ؟

ان في مدونات بتجيب كل مصايب مصر واكن مصر مفهاش ميزه خالص


حاسس ان التدوين له تأثير ؟

طبعاااااااااااااااااااااااا اكبر تاثير ان رئيس الوزراء بيزور المدونات وده بدايه كويسه ان صوتنا بيتسمع


تهدى التاج لمين ؟

اهديه لميييييييين

طفله مش عاوزه تكبر

كلام من القلب

دردشه عربي

مش عارف





طبعا التاج ده جالي من حسن حنفي صاحب مدونه شيفا

وجالي من سيفين صاحب مدونه مش عارف


س 1-أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟

انسان بلا حلم يبقي بلا حياه او هدف الحلم بيكون بدايه لطريق نسير فيه بس احلام الماضي ممكن تكون هي هي احلام المستقبل بس هحاول اشوف احلام انتهت

الحلم الاول : كنت متفوقه جدا في ماده الرياضيات علي مدار السنين وكنت بطلع الاولي علي المدرسه فكنت بحلم ادخل علوم قسم رياضه طبعا حلم لم يتحقق عشان بابا اصر علي ادبي ماعلينا

الحلم الثاني : كنت بتعلم موسيقي وكنت باخد درس فيها وكنا بنعذف مقطوعات جامده لام كلثوم وفريد الاطرش وحليم وبرده بنعذف للجيل بتاعنا وكنت وصلت لمرحله ان لما اكون مخنوقه امسك الاورج او الناي واعزف اي حاجه المهم اقدر اخرج من المود وكنت عاوزه اكمل في الطريق ده بس برده كان في معارضه شديده من البيت وبابا قال عاوزه تعزفي او اي حاجه في البيت لكن مش تستمري في المجال ده اني ادخل معهد موسيقي وكدا

الحلم الثالث : الرسم اقرب حاجه ليا وكنت بهدي لاصحابي زمان حاجات انا رسماها وهما اللي بيختاروا ده وكنت برسم علي الزجاج يعني كانت هوايه علي ادي بس لما دخلت الكليه كنت كل اما اجي امسك الورقه والقلم وارسم الاقي سيل من الصوت العالي فين مذاكرتك و...و... ويوم ورا يوم اصبح الرسم بعيد المنال

الحلم الرابع : لما دخلت كليه الاداب كنت عاوزه اتخصص في اللغه الفرنسيه لاني فعلا كنت عاشقتها بس الكليه بقي اعترضت لان لازم يكون لغتي الاولي فرنسي او من مدارس فرنسيه

وطبعا كنت حزينه جدا واختارت تاني ماده بحبها التاريخ بس جيت بقي وانا في تانيه كليه الشرط اللي كان علي اللغه الفرنسيه اتغير وبقي اني اكون جايبه في الماده الفرنسيه لا يقل عن 45 من 50 وطبعا ده كان متحقق بس قلت هضيع سنه وخلاص انا اندمجت مع مود التاريخ

الحلم الخامس : ان اعيش في مكان فيه حساب للجيره والناس فيه كلهم عارفين بعض وقلبهم علي بعض مش زي مانا دلوقتي وقبل كده كل الاماكن اللي بسكنها عمارات ومبعرفش شكل جيراني ايه

س 2-أذكر 5 أحلام على الأقل تخص مستقبلك ؟

الحلم الاول : كاي بنت بتحلم تحب وتتحب وتحس بحب وحنان واحتواء حبيبها

الحلم الثاني : العفاريت وهو طبعا انجاب اطفال ينورو الدنيا ويحسسوني اني فعلا عايشه لان بجد الاطفال بالنسبه ليا حاجه كبيييييره اوي يمكن كتير بيعتبروني طفله بسبب اندماجي السريع مع الاطفال ببقي اقل سننا منهم

الحلم الثالث : طبعا انا بعمل دراسات عليا بجد بحلم اكمل الطريق فيه لكن الله اعلم ايه هيحصل في المستقبل

الحلم الرابع : اني اشتغل في المجال اللي بحبه لان انا مجالي شي ودايما الشغل اللي بيجيلي شي تاني

الحلم الخامس : اكفل طفل يتيم

س 3-أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟

نورا : انتيمتي الغاليه

مني : اختي وصديقتي

زهره اللي هي ليدي بنتوتي

دول بجد كنت بحلم يكونوا معايا من يوم ميلادي في الدنيا دي

س 4-أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟

جدي الله يرحمه بجد كنت بحلم يكون شيفني دلوقتي حاسس بيا حاسس بالمي حاسس بفرحي جدي اللي كنت الدنيا ليه بجد هو معايا مع انه توفي من وانا في تانيه ابتدائي

الشخص التاني خاله ماما بجد مش شفت حد في حنيتها وطيبتها بجد اتمني وجودها بس الله يرحمها توفت من كام شهر

5-لمن تهدي هذا التاج ؟

ماما اموله

طفله مش عاوزه تكبر

كلام من القلب

دردشه عربي

الأحد، يونيو 07، 2009

اطيعك ولا اناكفك ولا اعاندك

167 كلام قلوبهم
 
اولا كل سنة وايام زمان طيبة عيد ميلاادها النهاااااااااااادره

عشان خاطره ياما سمعت الكلام ومن غير كلام اوام بعمل اللي يقولي عليه


ولو قالي ايه مابسألش ليه مابأقلش انا تلت التلاته كام


انا ساكته اهو ومابقلش يوم على حاجه لا وكلامه يمشي على قلبي وعليا



من غير ماياخد رأي موافقه ومعاه انا من ايده ديا لايده ديا
~~~~~~~~~~~~
من كام شهر كتبت بوست اسمة يابنتي كفاية طيبة


وكنت بتكلم فيه هو المشاعر لما بتظهر رد الفعل بيكون ايه

والصراحه المناقشه كانت حامية جدا بين الشباب والبنات

طيب نيجي بقي للمرحله التانية للشي اللي بيمس اي علاقة بين اي شاب وفتاه مرتبطين

وبقصد الارتباط هنا عشان مش حد يفهمني غلط

الارتباط  ::: مرحلة الاعداد للخطوبة - الخطوبة - الزواج



  من التجارب اللي شفتها في كل الاشخاص اللي حواليا وبشوفها كل يوم

ان البنت اللي زي جنات اللي حاطه كلامها فوق دي يقولها

انتي بارده انتي .....انتي ......انتي ......... يابنتي اتحركي قولي لا مرة ايه داانا هتشل

تقوم البنت تغير الطريقه معاه

وتعاااااااند

رد الفعل بئه

هو انتي متعرفيش تقولي اه مره يعني لو قلتيها هتموتي ولا هيقولوا عليكي ياغلبانه

ولا لماتقوليها هياكلوا من لسانك حته  دا انتي شليتي اهلي



نفسي تسمعي الكلام من غير مناهده يالهوي دانا هعملك تمثال ساعتها

تحتار البنت بين النقضيين

وتقرر

تناكف

ولما تناكف

رد الفعل

ايه الدلع والمياصه دي متقولي اه علطول ولا لاء علطول

لازم يعني الحركات القرعه دي

لازم يعني تلوعي الواحد عشان تقولي راي

صحيح شغل حريم فاضي

وتحتار البطلة وسط دا ودا ودا

وتقوله بصوت عالي

انت عااااااااااااااااااااااااوزني ايييييييييييييييييييييه

اطيعك ولا اعادندك ولا اناكفك

طبعا الكلام اللي قولته دا موش سمعته من بنت ولا اتنين ولا تلاته كله ماشي علي الحال دا وربنا

ومن هنا تنادي كيارابالاتي

ان الشباب تجاوب علي السؤال دا



اطيعك ولا اناكفك ولا اعاندك ولـــــيه ؟



والبنات تجاوب


تطعيه ولا تنكافيه ولا تعانديه ولـــــــيه ؟



اما رايي ياجماااااااااعه

هقوله في التعليقاااااااااات

انا موش كتبت رايي وهكتبه في الكومنتات انا بقووووووووووول اهو