الأحد، يونيو 14، 2009

فوقي ياقطه احنا في غابة الجزء التالت

  
وصلني طلب اضافه علي الميل بتاعي من بنوته موش اعرفها

طلبت مني اني اضفها علي الياهو او الهوتميل وانها عاوزني في حاجه ضرورية جدا وموش ينفع تتاجل

بصراحه قلت الموضوع خطير جدا وضفتها

قالتلي ازيك ياكيارا قولتلها الحمد لله نشكر الله


قالتلي انتي تعرفيني ومش تعرفيني

تنحت شويه وقولتلها معلش انا صغننه وخوديني علي اد عقلي ازاااااااااااااااااااااي اعرفك وموش اعرفك


قالتلي انا مدونه قلتلها جميل واكيد انتي وغيرك بيزورني وازوره قلتلها طبيعي

قالتلي انا قريت الجزء الاول والتاني من بوستك فوقي ياقطه

وبصراحه عجبتني طريقه معالجتك

لكن الاول قبل اما اتكلم ياريت مش اكون محل سخريه منك او من اي حد يقرا الكلام دا

قلتلها انا مش فاهمه حاجه

قالتلي انا كنت عاوزه ارد واقول تجربتي عندك في لبوست لكن انتي لاغيه غير معروف

عشان كدا طلبت اضافه اميلك اللي هقوله يمكن يفيد بنات غيري انهم مش يغلطوا زيي

قلتلها اتكلمي وانا مش هقاطعك

*******************

انا بنت وقربت علي 30 سنه معايا ماجستير وبحضر الدكتوراه علي قدر من الجمال مقبوله الشكل يعني

بدخل النت زي اي حد  بتعرف علي ناس جديده وافكار جديده بس مش جربت احب في مكان شغلي او كليتي

وزي اي بنت بدور علي الحب بمنكاش ودا الشي اللي ناقصني اوي

وفي يوم قابلت علي الشات واحد مصري عايش برا وسنه قريب من سني

وكان بيكلمني عن حبيبته اللي ماتت وانه مفتقدها حسيته اوي

وعجبني وفائه لحبيبته حتي بعد موتها

بقي كلامنا كتير وكل يوم بيزيد عن الوقت اللي قبله

لحد اما في يوم قالي انه بيحبني وانا قلتله اني بحبه

وقررنا انه اول اما ينزل مصر هيتقدم ونتجوز
واتفقنا ان الفتره اللي هو فيها برا هنعتبر نفسنا مخطوبين ونشوف هل ننفع بعض ولا لا

هل احنا مناسبين لبعض ولا لا

والتفكير وكل شي

بدانا نشغل الكام لبعض

ونتكلم بالساعات مبنحسش بالوقت ابدا

وفي يوم قالي لازم نتجوز قلتله ازاي نتجوز وانت في بلد وانا في بلد

قالي هقولك زوجتك نفسي علي كتاب الله وسنه رسوله وانتي هتقولي وانا قبلت زواجك

كانت الفكره مستحيله بالنسبلي

قالي انتي مبتحبنيش قلتله لا بحبك ومتشككش في حبي ليك بس دا مش جواز لازم شهود

الجواز العرفي لازم اتنين شهود دا مين شاهد علينا

قالي ربنا

وفي نفس اليوم فعلااتجوزنا بطريقة الشات اللي انتي قولتي عنها في الجزء التاني

وفي نفس اليوم ضميري انبني وقلتله طلقني قالي لو طلقتك مش هعرفك تاني

وطلقني

رجعت وقولتله انت طلقتني حسيت انه طلقني بجد

ورجعني تاني

بدا الكلام يبقي مفتوح بينا

واكننا مع بعض

الكام وانا من غير هدوم

والكلام عن المعاشره الجنسيه كامله

كنت بحس اني في حضنه وهو في حضني

بس كنت بقرف من نفسي ومن الاسلوب الجواز مش كدا

معتقدش ان في بنت متجوزه ممكن تقرف من الحلال كنت حاسه ان دا حرام

طلبت الطلاق كتير ولما كان بيرفض كنت بقوله انا اصلا مش متجوزاك لان مفيش شهود

الجواز ناقص

وبقيت ادعي ربنا انه يتوب عليا

واستغفرته كتير

وخلاص حجز طياره انه نازل مصر وطبعا هقابله في الشقه مش مراته

ودا كان مخوفني اكتر

واصريت علي الطلاق كان بيهددني كتير انه مش هيخليني اتجوز اي حد لكن

كنت مصره علي موقفي ويوم اما قال انتي طالق لتاني مره حسيت اني ارتحت

لكن قالي انتي خسرتي حد كان بيحبك بجد

مبقتش عارفه هو اللي كنت فيه صح ولا غلط انا جرحته ولا لا

لكن في كل الاحوال

لا يصح الا الصحيح

ولو كان في نصيب بيني وبينه كان هيجي فعلا ويتقدم

انا قلت الحكايه بس ياريت مش تسلخوني

*****************

طبعا في الحوار قالت تفاصيل تانيه انا حذفتها واستئذنت منها دا

وطبعا انا هقول رايي في الكومنتات زيي زيكم ومعلش ياصاحبه الكلام الموضوع اتاخر

لكن كل شي بوقته

اي تعليق هحس انه فيه اهانه للبنت دي انا هحذفه مهما كان صاحب التعليق

عاوزين نناقش الموضوع بمصداقية  عشان الموضوع خطير بجد

68 كلام قلوبهم:

shimaa يقول...

مش ينفع نجرح فى انسان غلط لاننا كلنا بشر وممكن نغلط

اللى بس بستغربله ان لسه فى ايامنا دى ناس ممكن تخدع فى البشر مش علشان حاجة غير ان الصح بقى واضح والغلط واضح
واى رغبة منها فى معرفة الصح والغلط هاتقدر توصله بس هى رغبتنا اننا نسال او نتاكد
بس موقف الانسان ده مش غريب لان فى ناس كده كتير
ناس بتستغل احاسيس البشر علشان تحقق متعتها من الدنيا
بس احنا المفروض مش حيوانات ولا ده الهدف من حياتنا احنا بنعمر الارض باخلاقنا واعمالنا اولا
ياريت نرجع فى الطريق الصح اللى المفروض نمشى فيه بجد
ربنا يرحمنا ويسامح الجميع

emadiab يقول...

غريب جدا فى رأيي ان انسانة و اعية ومثقفة زيك تقف فى فخ زى ده واضح ان كان فى خلل من الاول
يمكن انعزال عن الناس
عدم وجود حياة اجتماعية سليمة و ده شئ بعانى منه و مش حقول ادى لأيه بس الحمد لله الواحد بيحاول يركز مع الناس اللى مفيش قلق منها

انتى طول الوقت يا آنستى كنتى بتلفى و تدورى حوالين نفسك و مش عاوزة تعترفى ان اللى كنتى فيه غلط و ميصحش لا دينيا و لا حتى اجتماعيا مفيش اى بنت تقبل على نفسها كده
و نصيحة لأى بنت اوعى تدورى على الحب و انتى على النت و تفكرى انك حتلاقيه
مشاعر زى دى صعب اختزالها فى تكتكات كيبورد و صورة على ويب كاميرا
انتى خليتى نفسك ضحية لإنسان معندوش ضمير و مبيعبأش بمشاعر البشر استغلك و اعتقد انك مكنتيش الوحيدة اللى بيكلمها فى نفس الوقت بس انتى اديتيله اكتر من غيرك اكيد و عشان كده محسش بملل و كمل اللعبة للآخر لحد ماانتى لقيتيها حتقلب بجد
بإختصار انتى كمان غلطتى فى حق نفسك و سمحتى للشخص ده يحولك لنقيض اللى انتى عاوزاه تحت مسمى الحب
ربنا يتقبل التوبة منك و اتمنى ميكونش كلامى تقيل عليكى رغم انه لازم يبقى تقيل لأن الغلطة مش صغيرة

كاتب مصري يقول...

ازيك يا كوكي
أولا الموضوع ده على اختلاف طريقته لكنه موجود الحمد لله انها خلصت منه على خير
كلنا بنغلط وأحيانا بنغلط غلطات كبيرة قوي بس العقل اننا نفوق قبل ما تحصل كارثة من رحمة ربنا انه مكانش في مصر والموضوع ربنا وقفه على قد كده وهي ربنا هداها
بس بجد انا لو في ايدي اغلاق الشات كله كله كله والله لن أتأخر ثانية مش رجعية وتخلف مني نقفل الشات والمسنجر موجود الي هضيفه عندي بس هو الي هكلمه يعني براحتي وبتفكيري عشان لو غلطت يبقى بايدي وبمزاجي وأستاهل الضرب وقتها
اه يا قلبي لو كنت أقدر اقف حامي وحارس على عقل كل بنت من البلاوي الي بنشوفها كنت عملت كده بس مفيش غير اننا ندعي ربنا يبعدنا عن الغلط وعن أهل السوء يارب
آمين
ربنا يتوب عليها ويثبتها على الهداية ويكتبلها نصيب مع حد يقدرها ويصونها ويحميها
مش هقول غير كده
ربنا يكرمك يا كوكي
سلام
وابقي نوريني

بدراوى يقول...

مكنش المفروض انها تحكى اصلاً
لحد
الصح معروف و الغلط معروف

و بعدين ربنا يعافينا جميعاً
من الوقوع فى معاصى

بس انا مستغرب لحاجة
ازاى بنت معاها ماجستير و بتعمل دكتوراه
تعمل كدة
مش عشان ثقافتها وعلمها
انا قصدى انها معندهاش فراغ بتعانى منه
خلاها تعمل كدة و لا بتعانى من بطالة

ربنا يتوب عليها و يرحمنا جميعاً

adel يقول...

الغلط غلط ....و هي مش معني انها مثقفة و دكتورة يبقي فاهمة بالعكس انا متعاطف معاها لانها اكيد نسيت نفسها في زحام تحقيق طموحها و ده عمل عندها فراغ عاطفي قدر الشخص ده يستغله
و هو شخص مش كويس ...مفيش حد بيحب حد يخليه يعمل كده قدامه
و هي غلطت اكيد و علي الاقل شكلها قدام نفسها مش هيبقي زي الاول .... ازاي واحدة تقبل علي نفسها حاجة زي كده

انا مش بحاسب حد و انا متحرر فكريا علي فكرة بشكل معقول ...بس في حدود

انتي قلتي علي لسانها اننا منسلخهاش
بس ماذا يضر الشاة شلخها بعد ذبحها
اسف علي التعبير للبنت دي
بس انا مضايقلها بجد
ومش حابب ااقل منها
هو ربنا وقف جمبها و رجعها للطريق الصح
بس تخلي بالها اكتر من كده

الراجل اللي بيحب واحدة بجد بيخاف يلمسها او يمسك ايديها مش يطلب منها حاجة غلط

شكرا قيو علي شجاعتها دي و علي طرحك للموضوع ياكيارا

وومن يقول...

مش قادرو اقولك يا كيارا انا اتأثرت بالموضوع ازاي وعاوزة اقول لصاحبتة اني حاسة بيها قوي وعذراها انتي كنتي بتدوري علي الحب واتخدعتي

وعلي فكرة في رجالة بتستخدم خدعة وجود حبيبة او زوجة سابقة وتوفت والمأساة دي علشان تتورطي عاطفياً وحصلت قدامي قبل كدة

ومش فاهمة الناس دي بتستحمل تعيش في كدب كدة علي طول ازاي

انتي فوقتي لنفسك وعملتي الصح حتي لو كان جه مصر كانت اجازتة هاتعدي وانتم بتقضوا الوقت مع بعض ولا كان هايتقدم ولا حاجة او كان هاتهرب منك بأي حجة

كل أبن أدم خطاء وخير الخطائين التوابين واتعملي متثقيش غير في اللي تشوفيه بعنيكي ويبقي واقع ملموس

إحنا مش ملايكة كلنا بنغلط ولازم نتعلم من غلطنا ربنا معاكي

شمس النهار يقول...

الموضوع غريب جدا
البنت علي درجه علميه عاليه
وسنها مش صغير يعني مش سن طيش

يبقا ايه السبب
واحنا لما ندور علي السبب مش بنجرح فيها لا عشان نستفيد ونفيد الاخرين

فراغ ماعندهاش فراغ اعتقد من خلال كلامها هي لسه بتكمل دراسات عليا

طيب فراغ عاطفي اكيد
ماشي العواطف في حد ذاتها مش عيب
العيب الجموح الغريب اللي حصل

هل هو حب المغامره
والا قلة خبره والا ايه بصراحه انا احترت خالص مش عارفه
اقول ايه

المهم ان موضوعها يكون عظه

والحمد لله ان ربنا نجاها
وتحاول تتخطي الموضوع
ومش مهم ان الانسان يغلط لكن المهم انه يرجع عن غلطه ويستغفر ربنا ويندم ومايكررش نفس الغلط

مصعب صلاح يقول...

السلام عليكم
أولا انا سعيد ان البنت دي قررت انها تقول تجربتها ودا اكبر دليل على صدق نيتها

ثانيا :- الواحدة لما توصل لسن التلاتين ولسه ما اتجوزتش ممكن تقع في حب اي حد يقابلها

طبعا هي مخطئة بس هو كمان مخطيء

أنا بس عندي سؤال

هو ليه بقت فكرة التفرقة بين الحب الحقيقي والحب اللي مش حب بل تقضية وقت

ثالثا :- التنازل عن حاجة معينة هو اللي بيعمل كده ، ياريت البنت ما تتنازلش

يعني لو عاوزة تشيت يبقى بدون صوت كتابة فقط

طبعا هي مخطئة بس هو كمان مخطيء

أنا بس عندي سؤال

هو ليه بقت فكرة التفرقة بين الحب الحقيقي والحب اللي مش حب بل تقضية وقت

تقبلي مروري

طـــائر الليــــل الحـــــزين يقول...

كيارا
انتى حكيتى قصة بتحصل كتير وان كانت بطرق مختلفة
مش عارفة ليه البنت لما بتحب بتكون فى منتهى السزاجة
وبتكون احلامها مغطية على الواقع
وبتكون عاجزة حتى انها تفرق بين الصح والغلط
ومن هنا بتبدء التنازلات
وهلا حتى مش عارفة انها بتفرط فى ابسط حقوقها
مش عارفة اقولك ايه
هى طبعا غلطانه
بس المفروض انها لما كانت بتفوق من وقت للتانى كانت تحكم عقلها اكتر من كده
بس تقريبا احنا كل ما بيتقدم بينا العمر وبتكون ياتنا بتعانى من الوحدة
بنكون معرضين للخدعة والزييف اكتر من كده
وبتكون مشاعرنا اضعف من مشاعر البنات الصغيرة فى السن
تحياااااااااااتى

hérisson يقول...

اولا كلنا بشر والكلام موجه لينا كلنا

بين الطيبة و السذاجة شعرة
بين الصدق والخداع خيط
ما بيبانش غير لما نحتك بناس حوالينا وتمر مواقف قدام عنينا وتتعدد وتتكرر حالات قريبة من حالات ممكن نمر بيها
وساعاتها بنعرف نفرق الكداب من المخادع

نقدر ونتأكد لو اللي قدامنا يستاهل نتعامل معاه بطيبة ولا هتتحول لسذاجة لان من الاول نيته مش سليمة

فأكيد بعدنا عن الناس اللي حوالينا ومانخترش مجموعة منهم نشاركهم حياتنا الشخصية
الوضع هيختلف
لا هنتجه لمحاولات للتعارف مع حد غير معروف مالوش ملامح بياناته مش واضحه
من الاخر كده بدون إثبات شخصية


بالنسبة لصاحبة الموضوع
فكلنا بنغلط وكويس انها فاقت من الوهم اللي نهايته اكيد مش نوووووووور ولا ينفع يتعاش قدام الناس

حاجة صغيرة بس احب اوضحها يمكن تكون غابت عنها
الشخص الندل اللي هي اتعرفت عليه احتمال يكون كان بيسجلها علي الكام من غير ماتحس
ان اسف الموضوع ده ممكن يثير القلق عندها
بس لازم تعمل حسابها وتحط قدامها كل الاحتمالات

وفي نهاية ربنا بيغفر
المهم دلوقتي هو الابتعاد عن الشخص ده
والاحتكاك بالمجتمع اللي حواليها اكيد هتلاقي منهم اللي يستاهل طيبتها
ولكن مع الحذر دايما

وعلي رأي كيتي
فوقي يا قطه احنا في غابة

romansy يقول...

معلش يا كيارا صحيح ممكن احب اه واعجب باسلوب الكلام اه بس متوصلش للجواز الطلاق بس كل واحد فينا جواه احاسيس مخبيها يتمنى انه يتكلم عنها مع اقرب الناس
وبالذات مع الناس اللى بيحبها
الاعجاب مش عيب بس العيب اننا نتمادى فى الغلط

د. ياسر عمر عبد الفتاح يقول...

الغريب غنها بتطلب الطلاق ..!
لا وخايفة إنه ميخليهاش تتجوز تاني
أصلاً ده مكنش زواج
وكانت المفروض تسأل أي حد من رجال الدين وكان هيقلها كده

أنا مش عاوز أخوفها
بس هل تضمن إنه ميكونش مسجل الكلام ده؟
يارب يكون علي درجة من الأخلاق والأمانة تمنعه من كده
يارب يارب

بغض النظر عن كل حاجة
دي لازم تبيق عظة لكل بالبنات
لازم يفوقوا شوية ..
اللي متأكدين منه إن مفيش ملايكة علي الأرض
بس بجد فيه شياطين
ربنا يبعد عن بنات المسلمين كل شر

صوت من مصر يقول...

للاسف معنديش كلام اقوله غير انها فى اول مره لما هو قال يلا نتجوز بالكلام كان لازم تكون هى واخده بالها من انه انسان مش كويس اولا
وثانيا محدش بيقلع هدومه على شبكه النت لانى انا ممكن اسجل ده بسهوله جدا
معلش هى غلطت
وهو كمان استدرجها لده ومعلش ده كده مش اسمه حب
انا عن نفسى كولد كنت بتكسف انى افتح الكام بتاعى لحبيبتى التى كانت
بصراحه الموضوع كبير

عاشقه الرومانسيه يقول...

بصراحه بصراحه؟

لا تعليق

المعتصم يقول...

ازيك ياكيارا
يارب تكونى بخير
كل اللى اقدر اقوله
انى ادعى ربنا انه يحفظ بنات المسلمين ويهديهم ويصونهم
اللهم امين
ســـــــــــــلام

مسدس صغير يقول...

موضوع مهم جدا
انا من خلال الموضوع اوجه رسالة للبنات ان ده مش جواز
وان طلقنى ومش هطلقك لأ طلقتك
طب انتى طالق
الكلام ده كله سخافات وكلام لا قيمة له
ايه التهريج ده
معقول الجواز اللى ربنا جعله سكن يبقى بالمنظر ده
انا مش عاوز اجرح فيها او فيه
بس لازم نتنبه للجواز الجديد ده.
بجد انا حزين ان فيه بنت بالسهولة دى تصدق كلام شخص زى ده لحد ميوصلو للمرحلة دى
ما عليها دالوقتى الا انها تنساه لانه انسان غير مسئول وعمره فى يوم محبها
وانها تتوب الى الله من الذنب اللى اقترفته ده
وربنا يهدينا جميعا

قلب ارهقته الاحلام يقول...

في الحقيقة أنا مش بلوم عليها اكتر مابلوم علي الظروف ال هي اتحطت فيها

بس مهما كانت الظروف كانت المفروض تبقي اقوي من كده

ولازم تكون عارفه ان من يتقي الله يجعل له مخرجا ويرزقة من حيث لايحتسب

الانسان ده لو حبها بجد كان حافظ عليها ومخلهاش تتصرف تصرف يخليها تنزل من نظر نفسهامن قبله

نرمي اي حاجه ورا ضهرنا خصوصا لما تكون حاجه لاقيمه لها

حاجة تنزلنا تحت مش ترفعنا لفوق وصدقيتني مجرد معرفتك بيك هتخسرك كتير

لو فكرتي ف الرجوع تاني فلاتلومن الا نفسك

وربنا ف كل وقت هيتقبلك فعسي الله أن يتقبلك قريبا قبل ان يفوت الآوان

اللهم إنا نستغفرك ونتوب إليك

وعسي الله أن يتوب علينا ويقبلنا جميعا

حنين القلب يقول...

اغلب البنات بتقع فى الفخ ده
وطبعا عريس الغفله مش بيتقدم
لانه خلاص حس انها فريسه ووقعت فى شباكه
وبيقول اللى عملت معايا كده
اضمن منين مش تكون عملت مع غيرى

بصى يا حبيبتى انتى ضعفتى وغلطتى
وربنا يسامحك
بس المهم مش تكرري غلطتك تانى

أكون أو لا أكون يقول...

استغفر الله العظيم...
لا أستطيع إلا أن أقول: " هذه جريمة"!!!

صبرني يارب يقول...

لا مش هانسلخك

احنا هاندبحوكي يا شابه

عارفه انا فى الاول قلت ازاي ؟؟

ازاي قدر يضحك على عقل واحده واعيه ومتعلمه ومثقفه المفروض

وبعدين قلت اه

هى قرت وفهمت كتب كتيره اوي ما عادا كتاب واحد

هو اهم كتاب فى حياتنا كلنا


كتاب الله وسنة نبيه

انتى كنتى شاكه ان الكلام ده غلط

طيب دوري
اسألي قبل ما توقعي نفسك فى مصيبه

عموما عليكى بالتوبه يا بنتى


انت ارتكبتي ذنب فعلا وده لا جواز ولا نيله

ده هبل فى البتنجان


تووووووووووبي الى الله تعالى

وربنا يسترها معاكي ومع الكل

الجواز و سنينه يقول...

انا شايفه اغلب التعليقات بتقول انها كبيره و مثقفه
و ايه علاقه ده و الموضوع
احتياجها الطبيعى للحب خلاها تقع فريسه سهله فى ايده
هيه نفسها قالت انها كانت بتدور على الحب بكل وسيله
شافت ده مستقبل و سن مناسب و كمان عملها نفسه الوفى الخلوق و هو بعيد عن ده كل البعد
رسم خيوطه عليها صح
مع قله خبره بالبشر حصل اللى كان
كويس انها فاقت قبل ما ييجى مصر و يقولها انها مراته و تعالى قابلينى وكده
ساعتها ماكانش هاينفع انها تفوق خلاص
لازم نفرق بين الخبره الحياتيه و العلميه
بس اكيد اكيد هيه وقعت فى الفخ ده علشان ماتقعش فى اللى اكبر منه
ياريت تكون اتعلمت و ده الاهم ان اللى مايجيينيش لحد بيتى و ياخدنى معززه مكرمه مابصش فى خلقته و لو كان مين
انا اغلى جوه نفسى من انى حد ياخدنى رخيصه
تأخر الحب مش مشكله رغم ان الاحتياج ليه صعب مقاوته
بس الاحلى انك فى الاخر تلاقى اللى انتى بتحبيه و تعييشى معاه فى النور من غير رعب و لا خوف من ربنا

لاسع افندى يقول...

اختى
اولا تحيه لانك توقفتى وقررتى عدم استكمال رحلة الخطأ
ثانيا حاولى ان تتأكدى بشكل او باخر ان هذا الشخص لايملك تسجيلات يبتزك بها فيما بعد

ثالثا ارجوكى لاتفتحى له اى باب حتى وان تقدم لمنزلك لطلب يدك لانه لن ينسى انه يوما رآى منك ما لايصح بدون زواج

رابعا اشكرك على طرح تجربتك ربما انقذتى بها غيرك كثيرات قبل الوقوع فى فخ معدومى الشرف والضمير

تحيه على شجاعتك وعودتك

همسة ايمان يقول...

اولا اسمحيلى احكيى على مدونتك الرائعه

لانى زائرة جديدة وان شاء الله اكون دائمة

وبالنسبة لصاحبه القصة بجد صعبانة عليا اوى واثرت فيا وربنا يارب يغفر لها ويعفوا عنها ومن شروط التوبة الندم وانا حاسة دة فى كلاممها جدا ربنا يتقبل توبتها
وهى ممكن الى دفعها لكدة لو انه موش مبرر هو كبر سنها وانها لسة موش فى حياتها راجل فالافتقاد العاطفى دة كان عملها عمليه تخدير ومعيشها فى عالم وهمى بنته هى لنفسها انها اتحبت وكمان اتجوزت وكمان بتتطلب الطلاق لو ان دة كله وهم لان مفيش اى شرط من شروط الزواج حصلت فعلا وان شاء الله تتوب من قلبها وتثق فى رحمة ربنا وان دى خلاص موش آخر الدنيا ومسيرها ان شاء الله ربنا يعوضها بزوج صالح يسعدها ويحبها فى الحلال وقدام الناس كلها بس هى تلزم الاستغفار والدعاء وربنا رحيم اووووووى وربنا يهدى الى وصلها لكدة
والله الواحد بيتحصر لما يلاقى الاشكال تى فى امة محمد (اللهم اهدى شباب وبنات المسلمين وثبتنا على دينك)
جوزيتى خيرا

karim يقول...

مع الاحترام لكل الاراء و الاحاسيس و المشاعر انا ليا راى. انا عايز اعرف احنا لية دايما نحب نضحك على نفسينا و نزييف لحقايق كل دة علشان احنا ضعاف مع نفسنا فابنتحايل عليها بكل شىء غلط, انا عارف انها عملت كدة خوفا من العنوسة وانها نفسها تحب وكل احاسيس المراءة التى بداخلها تريد ام تشعر بها, يعنى الست مهما عليت فى تعليمها و دماغها بردواا ست سهل اوى يضحك عليها مداد هى محتاجة شعور معين, واللة كل دة مش مستاهل محديش يستعجل نصيبة سواء جيية ولا لا, ولا حد يدور على الحب وشريك حياتة لانو جاى جاى لوحدة, محديش بيتجووز مراات حد ولا جووز حد, تحياتى

MaNoOoSh يقول...

بصي صعب بشر يحكموا علي بشر

واكيد اى حد فى الدنيا مهما كان على علم او ثقافة او منصب.. فده كله ميمنعش ان الانسان ميقدرش يستغني عن قلب يرتاح جواه من هموم الدنيا


اللي حصل خلاص انتهى طالما تبتي لربنا.. المهم انك تتعلمي من اللي حصل ان اى امر تحتاجي فيه فتوي.. تروحي للمكان المتخصص.

اكيد ان شاء الله لما ربنا يرزقك بالزوج الصالح.. هتعرفي تحكمي علي شخصيته كويس

لان اللي ميتعلمش من تجاربه مهما كانت قاسية فهو هيخرج من الحياة زي ما دخل.

ربنا يوفقك لراحة الضمير والقلب ورضا ربنا

واوعي نزعلي على اللي حصل لكن اتعلمي منه.. فكري فيه كويس واكيد هتعرفى امتى غلطتى.

مامة مازن يقول...

يا سبحان الله دى بتقول قربت على الدكتوراة ازاى دى المفروض يبقى عقلها بريمو عن كده
ده طبعا مش جواز هو يمكن لمس منها انهامتحفظة شوية فى الاول قال ادخلها من سكة الجواز علشان كله يبقى فل
وبعدين هى حيرانه لاحسن تكون جرحته مش فاهماها خالص
هو اللى جرحها لما شافها رؤيه لا تصح له ابدا الا بعد طلبها من اهلهاوحدوث الزواج بشروطه المعروفة لاى واحد ماشى فى الشارع
الحلال بين والحرام بين
مش معنى انها ناقصها الحب انها تخون نفسها واهلها مينفعش خالص ولازم متقابلوش خالص لما ينزل مصر خالص لو عايز يتقدم رسمى اوكى ياخد ميعاد من والدها زى اى حد محترم لكن لو قابلته اؤكد لها انها مش هيفضل منها ولا حتى بقايا انسان

مامة مازن يقول...

يادى المصيبة دا فى ناس بتقولك انه ممكن يسجل لها يا خرابى ربنا يستر عليها

شوفى كل اللى علق قال حاجة مفيدة يعنى اما فراغ عاطفى لانها طبع المفروض مشغولة بالبحث العلمى بتاعها
واخ عادل قالك اللى بيحب واحدة اصلا بيخاف يمسك ايديها
شفتى الفرق انه يخاف يلمسها من كتر حبه وخوفه ليها هو ده الحب فعلا مش زوجتك نفسى على النت ايه ده

اسماء واحلام فى وجدانى يقول...

لا اله الا انت سبحانك

انى كنت من الظالمين

الله يكون فى عونها لان مهما كانت ظروفها احنا منقدرش نحكم عليها لان ربنا وحده هو اللى اعلم بيها
ربنا معاها وتخرج من المحنة دى بسرعة
يارب

فتاه من الصعيد يقول...

ازيك يا كيارا
على فكره انا داخله علشان اعلق على الموضوع اللي فات لاني ما كنتش عارفه اعلق عليه والكومنتس ما كانتش بتفتح موش عارفه ليه
انا كان رايي انا الواحده تكون نفسها يعني ما تحاولش تصتنع اي شىء اثناء الخطوبه وكمان ما تتاخدش بسبب الحب وتحاول ترضيه باي شكل حتى لو كان على حسابها
ولاقيت ان كلامي برضه ينفع تعليق للموضوع ده
ربنا يهدي الجميع

Soma يقول...

الشيطان مش بيغوي الانسان فجاءه ومره واحده
بياخده بشويش وبراحه وعلي خطوات
عشان كده بيقع وهو مش واخد باله

بس الحمدلله انها فاقت, والحمدلله انها عرفت ان ده مش طبيعي ولا منطقي, ياريت تعرف هي اد ايه غاليه عند اهلها والناس اللي تعرفهم ومترضاش بالعلاقه الرخيصه.

تفتكري لو الشاب ده صورها؟؟؟؟
يبقي ليها فيديوهات علي النت و صور!!!!!!!!!!
ربنا يستر
وبعد التوبه ربنا هيبدل السيئات بحسنات

Mohamed Hamdy يقول...

طب انا بصراحه مش لايم على البنت .. انا لايم على الولد

انا بحب الانسان الواضح الصريح مهما كانت سفاله مقاصده .. يعنى عاوز تمارس الجنس عبر الانترنت لو سمحت قول ده بوضوح بدل متضحك على بنات الناس وتستخدم شرع ربنا لعبه فى ايدك تنصب بيها

البنت مش هتخسر فى الموضوع ده غير احترامها لنفسها واحساسها بالتهديد كل شويه .. مع الوقت هتنسى ده وهتقوى علاقتها بربنا وهترجع زى الاول وأحسن .. ياريت بس متتعقدش من الرجاله بعد الموقف ده .. ولازم تعرف ان الانسان مش بيتعلم ببلاش

بس

rovy يقول...

السلام عليكم
بجد مش عارفه اقول ايه .. ازاى ممكن بنت تثق فى شاب عرفته عن طريق النت للدرجه دى ازااااااى .. !!
كل اللى بأتمناه ان ربنا يسترها معاها و ما يكنش الشاب المعدوم الضمير ده و اللى استغل احتياجها للحب كان بيسجل لها المهم انها لازم تبعد فورا مهما حصل .. و بأقولها ارجوكى اوعى تضعفى و لازم تشوفى حد تثقى فيه من اقارب او اصدقاء يشاركك المشكله و يتصدى للشاب المعدوم الضمير ده و ربنا يسترها معاكى و مع كل بناتنا يارب و يبعد عنكم جميعا اى شر او اى ذئب ..
تحياتى

وردة يقول...

مش عارفة ارد
بجد انا متأكده انها واعية وفاهمة ومش ناقصها اي شئ علشان تعمل كده
حتي لو الحب هو اللي كان نقاصها
مش عارفة ارد اقولها ايه
غير ربنا يهديها والحمد لله انها عارفة انها بتعمل غلط وانها فاقت قبل ما المصيبو تكبر
اشكرك علي عرض الموضوع
ربنا يوفقها
ويصلح حالنا جميعا
سلام

hager za3bal يقول...

مش هتكلم عن الوعي او انها كبيره او كده.. لان البني آدم مهما كبر بتجيلوا لحظات ممكن يقع فيها ويغلط..

يمكن هي كانت محتاجه للحب والشاب ده استغل الموضوع ده تحت رداء الدين وانهم يتجوزوا وطبعا دا جواز غير شرعي ميتحسبش عليها اصلا .. هو يتسمي اي مسمي غير الزواج.. يعني تعتبر نفسها متجوزتش اصلا..

انا مش هتكلم واقول ازاي وثقت فيه او كده لان الموضوع حصل وانتهي وخلاص الكلام ده مش هيجيب نتيجه..

بس الحل دلوقتي
انها تنساه.. تنسي اسمه تنسي كل حاجه تمحيه من حياتها تماما..
لانه مكنش بيحبها .. الي بيحب حد بيخاف عليه..
ولانه مكنش جوزها اصلا .. فعلاقتهم مكنش ليها ملامح كل اللي بيربطهم شبكه عنكبوتيه ملهاش وجود!!

يبقي تنسي
مش مجرد نسياه .. تمحيه باستيكه من حياتها ودماغها ومذكراتها وكل حاجه..

وتبدأ حياتها من جديد..
لو هي اتظلمت هتلاقي اللي يعوضها..
ولو هي غلطت تتوب لربنا وربنا كبير اوي ورحمتة اكبر من اي حاجه..

رغم ان رأيي ممكن ميعجبش البعض..
بس انا متعاطفه معاها وبشده..

hager za3bal يقول...

وعايزه اقول حاجه كمان ليها..
مش مهم انك غلطي.. المهم انك مستمرتيش في الغلط ده..

فوقي بقي كده لننفسك وحددي وارسمي ليكي طريق تبدأي منه من جديد

blue-wave يقول...

معلش يا كيارا
بس دا نقص ايمان
ونقص معرفه بالدين
لو مؤمنه بجد
هاتعرف ان دا زنى
مش جواز خالص
هوا استغل حبها وجهلها
وكل اللى عليها دلوقت انها تستغفر ربها
بس كدا

همس الاحباب يقول...

لا شك ولا خلاف ان الموقف خاطىء وان الشبطان زين لهم المعصية
ولكن المهم انها اقرت واعترفت بالخطا والدليل على كده مصارحتها لكى والحديث عن الخطا الذى ارتكبته ولذلك فهى تريد ان تساعد الاخريات فى عدم الوقوع فى مثل هذا الخطا
لذلك ربنا يكرمها ويتجاوز عن سيئاتها
وده ناقوس خطر يدق
ولابد من الانتباه
فالاخلاق ضاعت وانعدمت
ناهيك عن الفراغ والكبت وتاخر سن الزواج
والاخطاء لا ترتبط بمؤهل ولا درجة علمية
فالشيطان لا يفرق
تحياتى

صباح الصباح يقول...

اية الكلام العجيب دة يا كيارا... هية البنت اصلا ازاى طاوعتة وهية وى ما بتقول على قدر عالى من الثقافة... عجيب جدا!!!

حواء يقول...

عارفه ياكيارا
انا لما قرات القصه
حسيت اني قرفت من فعلها زي مهي قرفت من نفسها
بس الحاجه الوحيده اللي اقدر اقول بيها ان البنت ديه فيها ذرة خير ممكن متخلهاش ترجع تاني او تفتحله اي باب هي انها قدرت تبعد عنه
بمعني انها قدرت تحكم عقلها وفي وقت شهوتها متحكمه فيها
انا كمان اعرف مدونه خايفه عليها اوي بعد معرفت حكايتها
خايفه يكون مضحوك عليها
خايفه يكون بيلعب بيها
ربنا يستر علي البنات يارب
ويهدي الشباب

e_emy يقول...

ربنا يهديها يارب

مفيش قدامها الا انها تستغفر ربنا وتوب
ومضيعش لحظة ف انها تفكر ف الانسان ده
لانه عمره ماحبها اصلا ..

وان شاء الله ربنا يوفقها ف حياتها
بس تكون صادقة مع ربنا ومع نفسها

وتفكر ف اهلها الى واثقين فيها هى للاسف مقدرتش ده ..

ربنا يهديها للخير يارب
ويهدى بنات المسلمين ياااااااارب

انا ودماغي يقول...

هو يعنى أنا مش فاهمة
و قريت البوست كذه مرة و هو هو نفس الكلام بنفس درجة فهمى
هو إيه طلقنى و مطلقنيش...ده مش جواز أصلا

بصى يا كيارا

لا تعليق !!!!!!!!

shimaa يقول...

اظن ان ناس كتير اتكلمت على اسباب اللى حصل
طب ما نتكلم على الحل
انها ترجع لربنا وتتوب بجد وفى حد قال انها مش تفقد ثقتها فى الرجال
بس انا نفسى اسئل سؤال
كام واحد عنده استعداد يسامح البنت دى ويتفهم غلطتها ويكون بعدها عنده استعداد يرتبط بيها؟
كم واحد عنده الاستعداد انه يشجعها ان التوبة مش معناها ان الدنيا تتقفل فى وشها وان فى امل تلاقى اللى يسامحها بجد؟
ولا المفروض انها تخاف ومش تصارح حد تانى بالموضوع ده؟
ياريت حتى يا كيارا يبقى موضوع تابع للموضوع ده وتشوفى راى الناس

Ahmed Talk يقول...

لا حول ولا قوة إلا بالله العظيم

صفــــــاء يقول...

لا حول ولا قوة الا بالله
والله يا كيارا حالات كتير اوى كدة
وهى تحمد ربنا انها وصلت لحد كدة بس وانه مفضحهاش
لأن الموضوع كان ممكن يكبر جدا والبنت دى تتبهدل
ربنا المعين

(أم البنين) يقول...

هذه شهوة وليست حبا يا أختي
لماذا ترخص الفتاة نفسها هكذا!!
لا حول ولا قوة إلا بالله

*البت المشمشية *حلوة بس شقية * يقول...

انا تابعت الجزيئين الى فاتو
ااتناولتى الموضوع بشكل كويس ومحترم
وياريت تكملى كمان
عشان القطط تفهم

حنان الشافعي يقول...

السلام عليكم
انا كنت جايه اسلم واسيال واقولك وحشتيني
لقيت الموضوع اللي انت كاتباه ده
حاجه تحزن المشكله في شباب معندوش لا دين ولا ضمير
عايز يوصل لغايته وبس ومش مهم الوسيله ومش معني كده انها مش غلطانه نسيت دينها وتناست اخلاقها ومش هقول التقاليد وكل الكلام ده
غير ان الحب عمره ما هيبقي عالنت بين واحد وواحده بينهم مسافات كتير
مش بس بالاميال كمان بالتفكير بالواقع
الواقع ده اللي هو عنصر تجاهلته بشده
ليه تفرض انها لو شافته عالواقع هتحبه او حتي تقبله ودي نقطه بسيطه
ده غير ان ديما عالنت اغلبنا بيكون حد غيرنا بندور علي حاجه ناقصه او بنحط في نفسنا حاجات مش فينا خصوصا لو احنا حد حاسس بوحده او ملل ومش اجتماعي وله اصدقاء في الواقع
انا مش عارفه اقولها ايه ولا اقول رايي في ايه لاني مكنتش متابعه من الاول بس الموضوع شدني وعلي حد علمي
الحب عالنت بيحصل كتيييييييير الايام دي ومش عارفه فعلا ليه بنسيب نفسنا لحاجه لو قعدنا مع نفسنا دقيقه بعمق هنتاكد انها مش صح طالما عندنا عقل
هقولها ربنا يغفر لها ويتوب عليها ويبعده عنها
وهقولها كمان انتي كسبتي نفسك مهما كان اللي خسرتيه وعمر الذنب ما يكون دافع اننا نستمر فيه بالعكس يكون دافع اننا نبعد عنه وكل الاحاسيس السيئه اللي عسناها تكون برده دافع لينا منغلطش تاني عشان منرجعش نحسها تاني عشان كده الالم احيان كتير بيكون نعمه او هو فعلا نعمه من عند ربنا
اما هو
فمن كل قلبي ربنا يهديه ولو متهداش ينتقم منه
لان المرأه ضعيفه وعقلها صغير وممكن بكل بساطه تنخدع بكلمه او باحساس زائف هي بتدور عليه
وطبيعي السؤال مين اداهولها من غير ما يراعي ربنا ولا يفكر لحظه في احساسها والله ده يبقي شخص اناني وانا متاكده انها صارحته اكتر من مره باحساسها وهو تجاهله بسبب انانيته دي
طب لو معندوش دين او ضمير وفعلا بيحبها
فرضا يعني
مخافش عليها من احساس وحش كان ممكن في وقت من الاوقات يخليها تتصرف تصرف يئذيها طب مفكرش في انه بيئذيها فعلا
امال حب ايه اللي كان بيقول عليه
انا طولت كتير واتكلمت زياده عندي كلام اكتر بس فعلا ربنا يهديهم ويهدينا جميعا

خالص ودي

صوت من مصر يقول...

انا شايف من التعليقات كلها انها هى غلطانه
وكله متفق على كده
وياريت متكملش

Rooma Qandil يقول...

طبعا مقرتش الجزء الاول والتاني بس ادينا في الثالث

حلوو اووي اننا نواجه خطأ شائع وسط النااس ونحاول نواجه ( الخطأ نفسه)يا كيارا في بوستاتك بس كنت احبذ طريقة معالجة ...عاجبني فكرة رايك في الكومنتتات بس برده لازم طالما في طرح للموضوع يبقى في معالجة منه,,,

موضوع النت والي بيحصل فيه من استغلال وتساهلات....ربنا يعافينا ويعفو عنهم جميعا

بالنسبة لعزيزتي صاحبة الحدث

مش هنعاتب في الي فاات لانه حصل وانقضى خلاص وفعلا زي ما قلتي لو كان في نية صحيح كان اول ما نزل مصر كان اتقدملك بس محصلش
انتي كنتي عارفة الصح والغلط ولما حسيتي انك ما شية في الغلط ابتديتي تواجهي الامر وانسحبتي من الموضوع

"كل ابن آدم خطاء وأن خير الخطائين التوابون" اعرفي ده كويس واعرفي ان بتوبتك لربنا ربنا بجد هيقبلك المهم الصدق في النية وربنا يرضى عنك

بالنسبة عزيزتي لسن ال 30 مش عيب خالص ومكنش في داعي للاستعجال وانك تلجأي للنت من خلال الشاتين انك تلاقي ابن الحلال...اعلمي ان رزقك في تقدير الرحمن وانه هيحصل حتى لو بعد ايه وربنا يرزقك التوبة النصوح...

rovy يقول...

عاوزه اضيف نقطه كان مفروض اذكرها فى تعليقى و هو انها بتقول و دلوقتى عاوزنى اقابله فى شقته لما يرجع طبعا مش مراته !!! الحقيقه الواضحه و اللى لازم البنت دى تفهمها انها اكيد مش مراته و عمر اللى حصل ده ما كان زواج ابدا و انها يجب ان تلجأ للرحمن بصدق و تطلب منه العون و الستر والله لو لجأت له عن توبه نصوحه و ايمان صادق و ثقه فى رحمته و عفوه فلن يهزمها احد ابدا و لا الشيطان اللعين نفسه .. و ربنا معاها يارب

sendrlla يقول...


كيارا
الأول ازيك ووحشتينى وكل المدونات وحشتنى
بس انتى زعلتينى أوى من الموضوع دا
لأن يوم الجمعة اللى فاتت قريت نفس القصة بالظبط فى جرنال الجمهورية لكن الفرق كان التانية بالتليفون موش نت

بس انا زعلت أوى أوى ان البنات بقت بترخص نفسها والله

يا كيارا والله الجواز والحب ما كل حاجه فى الدنيا هما صحيح استقرار سواء كان عاطفى أو غير كده بس لا يصح الا الصحيح

والانسان لازم يحكم دماغه فى كل حاجه وخاصة البنات لأن البنات طيبين وبينضحك عليهم بسرعة

البنت دى انسانه مثقفة وعلى درجة عاليه من العلم كان لازم يكون عندها تفكير أقوى من كده بكتير

يمكن كلنا بنغلط وخير الخطائين التوابين عند الله بس المشكلة ان البنت دى دلوقتى خسرت حاجات كتير ما تقدرش ترجعها ولو بالطبل البلدى
تحياتى لموضوعك الجميل
..................

لا تعتــ رضوى ـذر

ديالا يقول...

بصي ياقمر كلنا بنتخدع عشان كلنا بشر بس لو كنا كلنا بشر كنا استحملنا غلطنا علي اساس اننا بشر بس للاسف فيه ناس مننا بقت حيونات والحيونا كمان عندها احساس عننا فتصوري بقي حيونات بتعامل بشر هتبق النتيجه ايه

المطلوب بقي مننا نعرف كويس مين فينا بشر ومين الحيوان ونعامل كل نوع بالطريقه الي يستحقها

تقبلي مروري

جــــوه القـــلـب يقول...

هو بجد موضوع مهم وكتير منا ممكن يقع فيه بس لازم يكون فى عقل يفكر وقلب يحس بس هو كان باين من طلباته منك انه انسان مش خايف عليكى وكل همه انه يستمتع وخلاص حتى لو استمتاعه على حساب كرامتك ومشاعرك وبصراحه انا بستغرب على علاقات الشات وخصوصا فى الحب بتكون مش كامله وبتكون من غير روح ايه معناه حد بيكتبلى وانا برود عليه هو ده بيكون حب ...الحب الطبيعى مواقف وكلام رومانسى ومعامله وانه يطقى ربنا فى البنت المعاه بس لازم اشوف انطباعه وهو كمان يشوف انطبعاتى وتكون فى نطاق الحلال ولازم اشوف خوفه عليا فى عنيه للاسف الحب الايام دى فى كتير بيستسهلوه وبجد بيظلموه ....بس كويس انك فوقتى من الموهم ده وعرفتى غلطتك فى كتير غيرك بيفوقو بعد فوات الاوان ...وياريت ماتسعيش وراء الحب لانه من المفروض انه هو البيجى من غير اى مقدمات ويارب يكون شخص يستاهل حبك ويقدر مشاعرك....مش مهم اننا نغلط المهم اننا مانطولش فى الغلط والحمد لله انك رجعتى لربنا وتبتى قبل فوات الاوان ربنا يتقبل توبتك....
rock.....

arsenalwy يقول...

السلام عليكى اختى كيارا

انا سعيد جدا انك معانا فى الحملة وان شاء الله تبقى من المنظمين معانا هنبتدى الشغل الجد بمجرد الاستقرار على كام حاجه كده

الاكونت بتاعى

ana.ahlawyalatool6@gmail.com

هبلغك بالجديد ان شاء الله

وهرجع اقرى البوست فى اقرب وقت

ذو الوجه المبتسم يقول...

السلام عليكم ورحمة الله وبركاته

فى البداية اسمحى لى كيارا ان احييكى على عرضك للموضوع الخطير ده

سيدتى صاحبة القصة احييكى على صدقك مع نفسك
ومن خلال الكلام المكتوب بيدل على انك انسانة متعلمة تعليم عالي ومثقفة جدا

ولكن انتى بشر
انتى انثي
وما فعلتيه رغم انه خطأ الا انه لك العذر
فالانسان منا ضعيف
وليس كلامى مبرر لاستكمال الخطا
ولكن طالما انك تكلمتى وعاوزة حل بجد

اولا احب اذكر لك قصة بسيطة وواقعية
لى صديقة مصرية
تعرفت على شاب
وكان بنفس الظروف تقريبا
مسافر بالامارات
وهى بمصر
اتعرفو على بعض عن طريق النت
وبعد حوارات وكلام كتير
لا يتعدى الحدود
رجع الشاب بالفعل لمصر من اجل ان يرتبط بهذه الصديقة
وبالفعل كلم اهله عنها
وبالرغم ان اهلك سخرو فى البداية من الموضوع وازاى تتجوز واحدة اتعرفت عليها عن طريق النت
الا انه صمم وبالفعل ارتبط بها
وهى بتحبه جدا جدا جدا
وتقدر له هذا الحب
هو حاليا مسافر السعودية من اجل استكمال خطوات المعيشة والزواج منها
وللعلم كلما كلتها كانت تتكلم عنه بشكل رهيب وحب حب بجد

الهدف من كلامى
علشان مطولش قووى عليكم
يكفى ما فعلتيه عبر النت
حتى لو كنتى بتحبيه بجد
او اقنعتى نفسك بهذا الحب
لانك حتى لو تزوجتيه سيكون الشك مصدر تعاسة لك وله
واعتقد انك فاهمة الكلام ده كويس
والاهم :
لو فعلتيها وقابلتيه بالشقة حسب كلامك
تفتكرى ايه اللى ممكن يحصل

اعتقد ممارسة كاملة للجنس
حتى لو كنتى رافضة الان
وقتها مش هتقدرى تقاومى نفسك ولا نفسه
فهناك نفس امارة للسوء

سيدتى صاحبة ال 20 سنة وصاحبة العلم والماجستير والدكتوراه ان شاء الله
لا تتعجلى على فعل شئ لم يأن وقته

ربنا يرزقك بالزوج الصالح
اللى يقدر انسانى حساسة مثلك
وذات قلبك يعرف الحب الحقيقي
اما عن الشاب المذكور
فاعتقد ؟؟؟؟؟؟؟؟؟ كملى انتى


باكرر شكرى لكيارة الجميلة لفتحها الموضوع

Butterfly يقول...

يا سبحان الله القصه دى ماسكنها كل الولاد للبنات اليومين دوول ولا ايه ؟؟!!!
دى عالم غريبه ومفتريه المفروض يخافوا على البنات زى ما بيخافوا على اخواتهم وأمهاتهم بالظبط ...
المهم أنا هقولها حاجه واحده بى انتى غلطتى اه وكلنا بنغلط المهم اننا نتعلم من غلطنا ونستفيد منه وفى حاجلته انتى بالذات لازم نتوب توبه نصوحه ...!

ربنا يهديكى ويهدينا ...

صدى الصمت - عاشقة الورد - يقول...

حبيبتى الجميلة كيارا
وحشتينى قوى
بأشكرك جداً على محاولاتك الدائمة لتوعية الفتيات من الوقوع فى مشاكل قد لا ينفع إصلاحها
وبالنسبة لصاحبة الموضوع
فأنا بأحييها على صراحتها وشجاعتها
وباحمد ربنا إنه نجاها فى الوقت المناسب قبل أن تقع فى مشكله زواج أركانه الأساسية مفقودة وباطل من أساسه
ويجب أن تعتبرها تجربة مرت فى حياتها ويجب أن تتعلم منها في المواقف القادمة
تحياتى

تايه في وسط البلد يقول...

مصطلح التطرف هو أوفق مصطلح قد يصف الحالة

ليس المتطرف فقط هو من أطلق لحيته وتعصب لرأيه لكنه المفرط في كل شئ

مفرط في جده أو في هزله
في فرحه او في حزنه
في حبه وفي كرهه

وللأسف هذا النموذج كثير ولا يحكم عقله لكي يدير الأمور..

وفي حالة البنت هذه فلا تجريح حين أقول ان الدرجة العلمية من ماجيستير او دكتوراة لم تضارع نضج التفكير او حتي رشد المشاعر

ليست اول او اخر من قاربت الثلاثين ولم تتزوج ..والأفضل لها ان تبحث عن متنفس لطاقتها في مذاهب طبيعية( أعمال خيرية- ممارسة الرياضة والتفوق- تفعيل مجال علمها ليفيد البشر الخ)

ولا مزيد

ســـــــهــــــــــر يقول...

كل ابن ادم خطاء و خير الخطائين التوابون

مش هنتكلم ف الموضوع فقهيا لاننا مش هنتدعى علم مش عندنا اصلا

لكن لو هو جاى مصر ايه مشكلة انه يصلح الخطأ ده و يعمل زواج صحيح شرعى

ليه اصرت على الطلاق و مااصرتش انه يتمم الزواج الحلال الشرعى اما ييجى

يمكن عشان القصه تفاصيلها مش ادامنا كلها مش هنعرف نقول راى
ربنا يعوضها خير و يغفر لنا جميعا

mohamed ghalia يقول...

أنا لسه مخلص امتحانات وقولت أجى أسلم
بس واضح انى فى موضوع كبير هنا
هحاول ارجع تانى وأقول رأيى

أحــوال الهـوي يقول...

بنوتي العزيزة
ما شاء الله مش لاقي مكان للتعليق و انا فخور بطرحك الموضوع الشائك هذا و اعتبره شجاعة من بنت ان تواجه جموح البعض
طبعا لن الوم صديقتنا لانها قد فعلت و ندمت و خير الخطائين التوابون و ما فعلته تحذير من الوقوع في الخطا باي دافع كان مجهود ارجو ان يكفر لها من تانيب ضميرها\
تحياتي

تحياتي

احنا يقول...

قرأت هذا الموضوع والحقيقة انى لم انزعج منه ؛ والسبب انى قابلت من امثال هذه القصة العديد والعديد .
ويجب ان نفرق عند سماعنا لمثل هذه القصة بين شيئين وهما الرغبة والحب ، فهذه القصة قصة رغبة وليس حب ، لان الحب ببساطة هو احترام واهتمام والتزام تجاه شخص أعرفه مباشرة وليس شخصا أرسم له صورة فى خيالى . فعالم النت ملئ بالكاذبين المتجملين ، ا ما اسميهم بائعى الوهم .و وهذا الشاب بائع جيد نجح فى ان يحدد حاجة زبونه فقدمها له . بينما نجد الفتاة من المولعين بالاشياء المبهرجة ، بحثت عن رغبتها وحاجتها بالطريق غير المناسب فجملت لنفسها الوهم والرغبة تحت مسمى الحب وقالت : بأنى أحس ان هذا حرام بينما لو كانت بحثت عن صوت ضميرها وعقلها وهما الحارس الاول لقلب الانسان لكانت انسحبت من هذه المقامرة مبكرا
واخيرا نصيحتى لها ان تسعى لايجاد الشخص الملائم الذى يعطيها الحب والرغبة معا والامر ليس بعسير لأنى استشعر فيها ثقافة وبراءة ، والامر بمنتهى السهولة هو إدراك المسار الصحيح والبحث عن حلال الله من خلال المعارف والعلاقات العائلية والمحيطة وفى النهاية تبقى التجربة تاج على رءوس المجربين نفهمها ونعيها كى لا نقع فيها مرة آخرى .
-------------------------------
مع تحياتنا حازم وهانى ونأسف للأطالة

كيــــــــــــارا يقول...

كلامكم بجد تحفه ويارب يكون جرس انذار لكل الفتيات

حابه بس اوضح شي

البنت اللي اتكلمت دي اصلا حليت مشكلتها

وهيا قالت دا

************


واصريت علي الطلاق كان بيهددني كتير انه مش هيخليني اتجوز اي حد لكن
كنت مصره علي موقفي ويوم اما قال انتي طالق لتاني مره حسيت اني ارتحت

لكن قالي انتي خسرتي حد كان بيحبك بجد

مبقتش عارفه هو اللي كنت فيه صح ولا غلط انا جرحته ولا لا

لكن في كل الاحوال

لا يصح الا الصحيحولو كان في نصيب بيني وبينه كان هيجي فعلا ويتقدم
***********

بمعني انها قالت الحكايه عشان تنبه البنات وتحذرهم لكن هيا كانت قادره تحل المشكله وربنا يسترها علي بناتنا

كيــــــــــــارا يقول...

طيب رايي انا ايه

طبعا انا قلته للبنت لما كلمتني لكن نقوله تاني


خليني معاكي للاخر

لو فعلا انتي واثقه ان اللي حصل دا جواز فعلا

وناتي وهو نت مهما كان بقي كام مش كام فانتي في بلد وهو في بلد

وهو ماشي في الطريق

السر الالهي طلع

هتعرفي ازاااااااااااااااااي

جالك عريس واتنين اللي كنتي نفسك توصليلهم هتتجوزي ازاي وانتي في واحد ميت ومش عارفه انه ميت

ولا هترفضي وتضيعي حلم امومتك والكلام دا
وولا هتقبلي وتبقي في شك انك متجوزه اتنين

يووووووووه موضوع ملخبط خالص

طب ماشي بلاش

افرضي بقي كنتي كملتي ونزل وقالك تعالي معااا الشقه ماانتي مراااااااااااااااااته بقي

وفقدتي عذريتك وبعدها بخ فص ملح وراح

قالت

ومين قال اني مفكرتش في كل دا انا كنت بين نارين نار حبه ونار الخوف من ان يكون حرام بس في مسلسل عربي كان في جوازه زي كدا والشيخ قال انه جواز لكن مفيش مايثبت دي الدوامه اللي كنت فيها

وعشان كدا طلبت اكلمك وعارفه انك هتنشري الموضوع كويس وتوجهيه صح

الحمد لله ان الموضوع عدا علي خير وربنا يحفظك ويحفظ بناتنا

///////////////////////

ياتري ايه خلاها تعمل كدا

شبح العنوسة

ضغط الاهل

ظروف الحياه

حلم دقة القلب

كل شخص في العالم له اكيد طموح واحلام ومشاعر بتختلف حجمها من شخص لاخر

ممكن شخ قلبه اهم من طموحه وممكن حد رغبته اهم وممكن حد علمه اهم

بس هيا في الاخر انثي ليها مشاعر نفسها تحي والشيطان دا استغلها صح

عرف يرمسي الشبك ويصطاد

طيب يابنات حواء

نحافظ علي نفسنا ازاي من الشبك

نكون احنا اذكي من الصياد

ازااااااااااااي

اولا نصاحب امنا ونخليها صديقه لينا ونحكي ليها كل حاجه

نقرب من ربنا ولو ضاق العالم باسره عمر ما رحمته هتضيق علينا

بعدها نسال اهل العلم

لو وقعنا في اي حيره نروح للمختص ونسال دا احنا لو تعبنا بنروح للدكتور لو تعبنا نفسيا في طبيب نفسي ليه لما حاجه تخص موضوع خطير زي دا مش نسال اهل العلم

مهندس مصري يقول...

ما هو يا كيارا الموضوع مش محتاج طلاق لإن مفيش جواز اصلاً
و مفيش حاجة إسمها ربنا شاهد علينا
لابد من ولي و شاهدي عدل
ما عدا في المذهب الحنفي فيجوز أن تزوج المرأة نفسها و لكن لابد من وجود شاهدين متصفين بالعدالة
أي موثوق بدينهما و خلقهما

فمكانش فيه جواز علشان يكون فيه طلاق من أصله
هو إستهبلها و هي لازم تعرف كده كويس و تعرف الحكم الشرعي الصحيح

و لو كانت عملت سيرش في الجوجل على الشروط الشرعية للزواج الصحيح في أي وقت من اللي كانت بتكلمه فيه على النت كانت عرفت إنه بيستهبلها

ربنا يتوب عليها و يغفر لها
لكن مش لازم تعرف أي حد أبداً باللي حصل ده لإن البشر مش بيغفروا زي ربنا و لا بيسامحوا

صوت من مصر يقول...

محتاج عروسه
شرط يكون عندها كاميرا 2 ميجا بيكسل
وهيدفون راديو شاك وتكون ناويه تتجوز كتابيا
حد موافق

عمرو وجيه يقول...

السلام عليكم


والله انا شايف ان الراجل ده بيضحك عليها

قوي


بس برده هو ايه الجواز علي الكام ده

اعتقد انه نوع جديد والله



ربنا يحمينا من الفتن

Bola 7elmi يقول...

أول مرور لمدونتك
وللأسف مفيش عندي تعليق
:|