السبت، يوليو 04، 2009

الصداقـــــــــة

في البداية


يعني ايه صداقة


هلخصها في كلمتين صدق وتوافق


الصدق طبعا مفسر نفسه


طيب ماهو ممكن اتنين يكونوا صادقين مع بعض


 لكن مش اصدقاء بالشكل المرجو يبقي مفيش توافق



الحاجه اللي بايد الشخص هو الصدق



لكن اللي مش بايد الشخص هوا التوافق



دا حتي لما حد بياخد دم لازم يتعمل توافق بين المريض والمتبرع



والا يحصل رياكشن وحبشتكنات للمريض



حديث النبي صلى الله عليه وسلم:


(الأرواح جنود مجندة، ما تعارف منها ائتلف، وما تنافر منها اختلف)



طيب ادي اول حاجه في الصداقة


اما



النقطه المهمه



هيا نوع الصديقين



بنت وبنت


بنت وولد


ولد وولد


نتكلم الاول عن الصداقة المختلطه بين الذكر والانثي



انا مش هتكلم في دين في نقطه زي كدا



طبعا في الفتره دي بقي صعب عن اي حد  انه مش يتعامل مع الجنس الاخر




فيه احتكاك بين الشباب والبنات



في الجامعه


في الشغل


في النت



مستحيل نقدر نعمل فصل بين الطرفين لو حصل ايه



يبقي لازم نحط اطار سليم لاي علاقه ممكن تنشا بين شاب وفتاه



ومش اقصد بعلاقه بالمسمي السئ احسنوا النواااااااياااااااااااااااااا



زميل في الشغل



يبقي الكلام في حدود مجال العمل



ولو تطرقنا للامور الشخصيه في اي حوار



تكون بحدود



بس ممكن تزيد وتوصل للتوافق اللي قلت عليه في الاول




طبعا لازم تكون فيها حدود



مهما حصل لازم حدود



لان دا ولد ودي بنت



لان العلاقة هتكون حساسه جدااااا



بينهم



ومش اي صداقه بين بنت وولد هتكون ناجحه



الا بتوافر شرط اساسي وهام وضروري جدااااااااا



هو



 النضووووووووووووج




عشان مش تنجرف لاي طريق



وتكون صداقة بريئه فقط



بس  في اوقات كتيره مش بتكمل او بتستمر لان ممكن البنت ترتبط



واللي ارتبطت بيه مش هيوافق انها تكلم اي حد برغم انه واثق فيها



ولو وافق هيكون في اطار ضيق اووووووووي



او الشاب يرتبط والبنت اللي هيرتبط بيها غيوره ومش هتوافق علي صداقته باي بنت




وفي صداقات بتستمر حتي لو الاتنين اتجوزوا لكن بتكون نادره وقليله




طيب نيجي بقي للي هما زي بعض يعني بنت وبنت وولد وولد




التوافق



كل اما كانو متوافقين وطباعهم وصفاتهم وميولهم شبه بعض



كل اما صداقتهم هتكون اقوي



كل اما الوقت يطول في الصداقة كل اما صداقتهم هتكون اقوي



لانهم في الوقت دا هتمر عليهم كل الانفعالات



ولو صداقتهم مرت علي الانفعلات دي



وصمدت في وش الريح



يبقي بقت  اقوي واقوي



لحد اماتختفي كلمة انا وانتي



انا وانت



وتظهر كلمة احنا



احنا عملنا



احنا



الفكر واحد



الروح واحده


الطبع واحد



من غير اي اتفاق مسبق



بتكون شي لا اراااااادي


واهم عامل بيقوي العلاقه الوقت



هتقولولي ازاي انا عندي اصحاب لسه عارفهم وصداقتنا قويه وارواحنا متقاربه



هقولكم كل اما الوقت بيزيد كل اما بيمرو بمشاكل وحفر ومطبات



والصديق وقت الضيق


ليه



اي حاجه في اولها بتبقي فل اوي ومبسوطين ومرتاحين وهوووووووب عند اول مشكله


 يخلعوا كدا مش بقت صداقة



اصلي مش هفرح ان صديقتي معايا في فرحي ووقت اما اقولها انا محتاجاكي تقولي


معلش معطلكيش



مش بقت صداقة اساسا



يعني مثلا ماما ليها اصحاب من قبل اما انا اتولد



تفتكرو ال23 سنه اللي هما كانو اصحاب فيها كان حياتهم وردي



لا طبعا صداقتهم مرت بكل الانفعالات دلوقت

وصلت ان لما واحده تتعب بتفضل  معاها زيها زي خالتو بالضبط




يبقي كدا التوافق شرط للانتمه



معني كدا ان اللي بينا وبين الناس مش صداقة لا صداقة بس بدرجه اقل


وبتزيد بالوقت واللي بيحصل في الوقت دا من مطبات وخلافه



واللي بيقول ان الاصحاب غدارين او مش في صداقة



نطبق كلمة نعيب زماننا والعيب فينا



العيب مش في الصداقة العيب في اختيارنا احنا




لان الصداقة مش زي الحب بنطب فيه ونقول ياريت اللي جري ماكان


الصداقة دي باختيارنا احنا


 احنا اتكلمنا وقربنا واتاكدنا ووثقنا و.و......و........و.......



واللي بيهد كل دا



الغدر والخيانه ولو حصل يبقي كانت وهم والعيب مش في الصداقه


العيب في الاختيار


نيجي بقي لنقطه مهمه



الصداقة = نجاح


ازاي



   الام صديقة بنتها يبقي حمت بنتها من بلاوي كتير


    الاب صديق ابنه حمي ابنه من كوارث كتير


    الزوج صديق زوجته يبقي هيتفاهموا وهيقدرو يميزوا


بين الوقت اللي الزوج بيكلم فيه صديقته وبيحكلها بعيدا عن اي غيره

والوقت اللي بيكلم فيه مراته وبيخاطبها كانثي


طيب شروط اختيار الصديق من وجهه نظري المتواضعه طبعا ؟



اولا : يكون علي خلق " المرء علي دين خليله فلينظر احدكم الي من يخالل "


ثانيا : الصدق من الصديق


ثالثا : التوافق ودا الشرط اللي بيعمل الصداقة لدرجات زي ماشرحت فوق


رابعا : يكون حبهم واخوتهم في الله


خامسا : لما يشوف صديقه بيغلط يوقفه ويكون في عونه لحد اما يفوق دا دوره وواجبه


سادسا : لما يحصل غلطات صغيره نسامح مش نجذره ونقطع رقبته اما  الغلطات الكبيره دي اللي


 مش ينفع فيها تساهل زي الخيانه :(



سابعا : اول اما يحس انه محتاجه يكون اول واحد في ضهره ويسانده حتي لو بينهم مشاكل

ولو حد قال عليه كلام وحش يدافع عنه مش يسكت ويعدي الموضوع واكن اللي بيتكلموا عنه ولا هامه  :(

ثامنا : قريت بيت عجبني اوي هو اذا الحبيب اتي بذنب واحد جائت محاسنه بالف شفيع 


تاسعا : ميرسي وشكرا والكلام دا مش ينفع لان الصديق لما بيسال

ولا بيقف جنب صدقه دا واجب عليه ولما بيعمل كدا مش بيستني انه يتقاله شكرا

بالعكس شكرا دي بتضايقه اوي بتحسسه انه مش صديق اصلا واخدنلي بالكم ياللي في بالي :)

وصدقوني لما تكون نيتنا حب في الله كل شي بيكون في بركه وصديقنا


لو فيه الخير هيفضل معنا وجوانا ولو فيه شر ربنا هيبعده عننا


 
سؤال بنتساله كل يوم هو في حد بيقول ممكن تحبني ممكن تقولي اسرارك وانت مش تعرفني
سؤال غريب اساسا الصداقة مش بالطلب الصداقة احساس بيجي تدريجي وبخطوات مرسومه بحرفيه 
محدش بيحس بيها
زي ماقلت في كلامي فوق وفسرت

وكدا ابقي خلصت البوست يارب اكون قدرت اقول  شي بسيط بيفسر الصداقة

78 كلام قلوبهم:

ذو الوجه المبتسم يقول...

اول تعليق محجوز
مش عاوز حد يعلق الا لما اعلق انا الاول
والا هاموته
هههههههههههههه

كيــــــــــــارا يقول...

هههههههههههههههههههههههه

هو فيها ضرب نار ولا ايه

ذو الوجه المبتسم يقول...

السلام عليكم اختى الصغيرة كيارا

الصداقة .. صدق
ما اجمله تعبير

البوست كله رائع ومعلومات هايلة عن الصداقة الحقيقية

الام وابنتها صديقتان
الاب وابنه
ياستى مش كنتى تقولى الاب وابنته
دا حتى البنت حبيبة ابوهاااا
ولا ايه رايكم يا ناس يااللى هنا

فيه كم سؤال
معلش انتى عارفة باحب اسال كتير

- طيب لو صادقت شخص ما وخان صداقتى
اسميه برده صديق ولا احذفه من حياتى

- لو صادقت بنت وحسيت تجهها باحساس اكبر .. الحب مثلا
ياترى برده هتستمر الصداقة ولا ممكن تتحول لحب متبادل ولا هتزول بعد فترة

- طيب لو صديقى احتاجنى وانا مش بايدى اساعده . غصب عنى يعنى
اعمل ايه

كفاية الكام سؤال دول وبعدين اكمل
انا لسة هادخل اعلق كتير
اصل بصراحة موضوع الصداقة ده عاجبنى جدا
والاحساس به اجمل

تقبلى تحياتى

كيــــــــــــارا يقول...

ياقهلا ياقهلا

مبسوطه ان البوست عجبك

وانا قلت البنت ومامتها والول وباباه عشان فيي حاجات لما تحكيها مش هيفمها الا لام وفي حاجات مش هيفهمها الا الاب من ابنه المصداقيه هتكون اكبر والخجل هيكون اقل

اما بالنوسبه للاسئله اممممممممممممم

ايه الناس اللي داخله علي طمع دي من اولها اسئله عااااااااااااااا

يلا خليها عليكي يابت ياكيتي اسال براحتيييييييك



- طيب لو صادقت شخص ما وخان صداقتى
اسميه برده صديق ولا احذفه من حياتى ؟

الخيانه كبيره ولا ممكن تغتفر بس لو خيانه من اللي هيا مش ينفع ننساها يبقي يتحذف واصلا مش يتسمى صديق نهائي

الصديق من الصدق


- لو صادقت بنت وحسيت تجهها باحساس اكبر .. الحب مثلا
ياترى برده هتستمر الصداقة ولا ممكن تتحول لحب متبادل ولا هتزول بعد فترة ؟؟

النضووووووووووج في الاول ايه الملابسات لو مرتبط يبقي اصلا مش ينفع ولازم تبعد لو مش مرتبط وحسيت انها بتزيد لازم فتره تبعد تراجع فيها نفسك وتختبر مشاعرك وهيا تختبر مشاعرها لحد اما تتاكدو انه حب او صداقه لان في ناس ممكن توصل للانتمه وتفتكرها حب




- طيب لو صديقى احتاجنى وانا مش بايدى اساعده . غصب عنى يعنى
اعمل ايه ؟ علي الاقل تكون جنبه معاه تسمعه لو مش بايدك حاجه كفايه انك تسمعه وهو بيتكلم هيرتاح ويمكن الكلام يدله علي الحل وانت مش قاصد المهم تكون في عوووووووووونه

نووووووورت وادخل براحتتتتتتيك :)

منورني باول كومنت

ذو الوجه المبتسم يقول...

رجعت تانى

تعليق على نقطة اكيد ناس كتير هتتكلم فيها

تفتكرى مش من حق رجل متزوج انه يحب تانى او ست مثلا

طب ليه مش من حقهم
وهو ده بايدهم

المشاعر والاحاسيس بتكون غصب عننا
ولا ايه رايكم يا اللى هتعلقو بعدى

هل دى تعتبر خيانة
ولا من حقنا نحب تانى

عارف ان فيه عوامل واشياء لازم ناخد بالنا منها لكن زي ما قلت .. المشاعر والاحاسيس صعب نتحكم فيها
واللى هيقول غير كده

ها ؟؟؟؟؟؟؟ مين اللى هيقول هههه

تحياتى

كيــــــــــــارا يقول...

مش تسالني انا السؤال دا

لاني شيفه ان لو الراجل عاوز يقول انه ممكن يحب وهو متجوز لان الاحاسيس مش ملكنا

يبقي نقلب الايه ونقول الست ممكن تحب وهي متجوزه لان الاحساسيس مش ملكنا ؟؟؟

mony يقول...

الزواج التزام يا ذو الوجه المبتسم
ممكن الانسان يتحكم فى مشاعره
ولان الحب زى الزرع لو مروتهوش واهتميت بيه بيدبل ويموت
ولان الانسان مش لازم يسيب نفسه لكل حب
يبقى الراجل هيبقى بير مليان ستات حبهم وحبوه
البوست جميل ياكيارا ومهم
تحياتى

smilyrose يقول...

السلام عليكم

الصداقة

اتعلمين ماهى يا اجمل صديقة

انظرى الى قلبك واخبرينى ما بداخله

انتظر الرد

حنان الشافعي يقول...

كيارا يا عسوله
قلتي اهم حاجات في الصداقه
الصداقه دين هنوفيه هنوفيه

وحشتيني جدا
وليكي عندي تاج

ديالا يقول...

كيارا

بصي مع احترامي لكلامك ده كله

الا اني مش مقتنعه بحاجه اسمها صداقه اساسا

كله بتاع مصلحته وبس

انا عن نفسي شفت كتييييييييير من الحاجات دي


بس برضه بوست هايل

تقبلي مروري

طيف السودان يقول...

مفيش حاجه قولها ممتازه جدا كلامك صح

انا زعلان منينك جدا انتي فكري ليه

Me7'o يقول...

أنا أول مرة آجى

وأكيد مش هاتكون آخر مرة

"لان الصداقة مش زي الحب بنطب فيه ونقول ياريت اللي جري ماكان"


الجملة دى مخمتنى قوى قوى


" لو صادقت بنت وحسيت تجهها باحساس اكبر .. الحب مثلا
ياترى برده هتستمر الصداقة ولا ممكن تتحول لحب متبادل ولا هتزول بعد فترة ؟؟

النضووووووووووج في الاول ايه الملابسات لو مرتبط يبقي اصلا مش ينفع ولازم تبعد لو مش مرتبط وحسيت انها بتزيد لازم فتره تبعد تراجع فيها نفسك وتختبر مشاعرك وهيا تختبر مشاعرها لحد اما تتاكدو انه حب او صداقه لان في ناس ممكن توصل للانتمه وتفتكرها حب "

الكلام ده موزون قوى

فكرتينى ببرنامج زماااااااااان كان بيجى فى التليفزيون اسمه حياتى

كانت بتقدمه واحدة عاقلة قوى مش عارف ليه بتفكرينى بيها

ماتوعيش إنتى على البرنامج ده


تحياتى

ABOALI يقول...

حلو الكلام يا كيارا ورائع فى المحتوى والتفاصيل

لو جبتى ليا حاجة ساقعة ممكن اقووووووول اكتر

اصلى انا عندى مثل

زغطنى تعرفنى


ولالالالالالالالالالالا ايه

ممكن لو سمحت نكون اصدقاء

عاشقه الرومانسيه يقول...

الله ينور عليكى يامنى والله
عجبنى قوى البوست وتحليلك للموضوع
عايزه اسئلك سؤال على جنب بقى
لما اقابلك على الميل
امووووووووووه

adel يقول...

كلامك حلو ياكيارورا
ههههههههههههه

بس انا علي فكرة ليا اصحاب ولاد و متوافين و يعرفوا عين اكتر من اهلي

بس كمان ليا اصحاب بنات و منهم واحدة اكتر من صحاب و تعرفني اكتر من نفسي وانا كمان

و عادي جدا جدا
الصداقة مش هتفرق ولد و بنت كبير او صغير

بس عاجبني قوي اسلوبك كالعادة :):)

ريمان يقول...

كيارا يا قمر


هاتى بوثايه عشان انتى وحشانى


البوست جميل اوى اوى

الصداقه بالنسبه لى زى البلسم الشافى بالظبط بس الصداقه الحقيقيه طبعا

بالنسبه للصداقه بين البنت والولد لازم تبقى فى اطار محدود وبقيود وشروط كمان


لان طبعا فى المجتمع ده صعب يبقى فى فصل بين البنات والاولاد خصوصا ع النت

ههههههههههه


فلازم بجد يكون الكلام بحدود وفى اطار موضوعى

صوت من مصر يقول...

الصداقه صعب جدا الكلام عنها
كوكى
انا جيت متاخر

Khaled يقول...

الصداقة = صدق
فى كل حاجة
بس خلاص

بدراوى يقول...

الصداقة شىء مهم اووووووى
انا على فكرة اعز اصدقائى
بنات و بعتبرهم زى اخواتى بجد
اللى بسأل عليهم على قد ما اقدر
و هماه بيقفوا جنبى
و على فكرة معظمهم نت بس
ناس بحترمها اوووى
لأنى زى ما قولت قبل كدة
ماليش اصدقاء فى الواقع
بس اكيد ان شاء الله مع الوقت
الوضع يتغير

بدراوى يقول...

احب اوضح حاجة بس
ان كلهم زى اخواتى فعلاً بجد
و انا لما قولت اعزهم بنات
عشان للأسف مفيش غيرهم وقف جنبى
لما كنت مضايق
الولاد مبيعملوش كدة
او جايز البنات عاطفيين زيادة
عشان كدة يقدروا يقفوا مع اى حد
عنده مشكله

mohamed ghalia يقول...

روعة يا كيارا بجد من أحلى البوستات الى قرأتهالك أو قرأتها فى حياتى
أنتى لميتى الموضوع بشكل أكثر من رائع
ربنا يكرمك ويسعدك دايما

جحا المصرى يقول...

كلمات رائعة عن الصداقة
تستحق أن تكون من زمن فات

المتبهـدلـون فـي الأرض يقول...

أولا أحي نفسي لإني التعليق رقم
23
::::
عجبني جدن تحليلك إن الصداقة صدق + توافق

لإن المشكلة الغالبة ,,هي ندرة التوافق , أو إحتياجها لبحث ..والواحد بيكسل

استمري
::::
بس بوست مفيد على الفطار

مصعب صلاح يقول...

السلام عليكم

هو دا التعريف الامثل للصداقة فعلا

تقبلي مروري

Soma يقول...

الصداقه شيء جميل
والانتيم بيكون اقرب للقلب من كل صديق
انا بحب اصاحب الناس المحبوبه اللي قلبهم بيساع كل الناس.

وطبعا صحاب زمان اللي موجودين معايا لحد دلوقتي هما صحابي بجد اللي عارفين عني كل حاجه

البوست جميل وحسسني باحساس غريب
انا حاسه اني عايزه اتصل بناس كتير اسال عليهم

وردة يقول...

بجد جميل اوووي يا كيارا انتي لميتي كل الموضوع بأسلوب جميل جدااا
وذكرتي كل شئ لدرجة اني مش لاقيه كلام اضيفه في التعليق
تفوقتي علي نفسك في البوست ده يا كيارا
ربنا يكرمك دايما
سلام

احساس لسه حى يقول...

عزيزتى

الصداقة شئ جميل

بس للاسف مش دايمن احنا اللىبنختار الاصدقاء

ساعات الظروف والقدر اللى بتحدد اصدقائنا

وبتفرض علينا نوع معين من الاصدقاء


ومهما نبعد عنه مش بنبعد كتير


وانا شايف ان الرجل بيصادق بصدق اكتر من المراه

زى ما المراه بتحب بصدق اكتر من الرجل

والرجل الصداقه شئ مهم ليه وله قيمة كبيرة عنده

والمراه الحب اهم شئ فى حياتها ومفيش شئ فى قيمته

يلا ربنا يبعد عنا كل صديق مش صدوق

تحياتى

سلام

Sweet Violet يقول...

هما مين اللى فى بالك هه
قولى قولى مين هه ؟؟؟
^_^

و هكون صريحة و اعترف
انا مش رجعت فى البوست اللى فات و انا عارفة مش ناسية
و البوست ده بردو مش هقدر اتكلم فيه
لان فعلا لو قولت حرف فى الموضوع ده بالاخص
هعمل اسقاط و انا مش حابه ده الصراحة
و انتى فاهمة ده كويس

يبقى النقاش يكون بينى و بينك
نقاش انتمات يعنى P:

Dr.A.S. black armor يقول...

طبعا رغاية زى العادة ومحتاجة الواحد يفضيلك وقته علشان يقرا البوست كله :)
بس بجد تسلم ايدك انا موافقك على كل كلامك ميه فى الميه
وربنا يرزقنا
دمتى بخير وود ومعاكى صديقة بجد

قوس قزح يقول...

اختار الرفيق قبل الطريق

الحكمة دى دليل على ان مشوار الحياة اهم ما فيه اختيارنا لاصدقاءنا

كلامك جميل
بس فى نقطة واحدة يمكن مش بتفق معاكى فيها .. وهى ان الاتنين لازم يتفقوا فى كل حاجة .. فى اساسيات لازم يكونوا اه متفقين فيها زى المستوى الاخلاقى مثلا ..بس مش شرط تكون اهتمامتهم واحدة و لا طباعهم واحدة بالعكس فى اوقات تستغربى ان الاتنين دول برغم اختلاف شخصيتهم لكن اصحاب اوى
غالبا بتكون فى شخصية بتحتوى التانى او بتعوض اللى مش بتقدر تعمله من خلال التانية
مش عارفة ..بس بحس ان ساعات الواحد بيحب الغريب عليه بدام مش غلط

تحياتى لك

ابو على يقول...

يا لهوى ع الكلام ايه الكلام الكتير دا

طب انا هاحجز تعليق لبكره ونشوف الكلام الكبير دا

مامة مازن يقول...

كيارا ازيك حبيبتى
ايه العقل والاتزان ده كله مش بعيد عليكى حبيبتى ربنا يكملك بعقلك كمان وكمان

حنين القلب يقول...

الله يا كيكى

البوست بجد رائع
اجمل شىء فى الوجود الصداقه
انك تلاقى حد جانبك فى حزنك قبل فرحك
انك تحس ان فيه حد بتحبه فى الله ولا بينكم مصالح ولا حاجه غير انهم فعلا بتحبوا بعض

بت انا بحبك فى الله

اسماء واحلام فى وجدانى يقول...

على فكرة انتى لو اشتغلتى صحفية
هتكون 100 100
اسلوب الانجاز لموضوع الصداقة كان شامل وواضح وصريح
بس ياريت اول مرتب فى الشغل تصرفيه على اخواتك اللى موجودين هنا

اشكرك جدا على سؤالك
والحمد لله انا رجعت النهاردة

عايش... ولكن !!!! يقول...

الصداقه صعب جداااااااا ان حد يكلم عنها
لكنك اتكلمتى وعبرتى واجدتى
تسلمى يا كيارا

أحــوال الهـوي يقول...

كل يوم اقول لنفسي البنوته دي بسيطه و بتكسب حب الجميع ازاي؟؟


لقيت السبب انها بتتعامل ببساطه و تتعامل بعمق


ايوه انت
وهذا ليس تناقض بالشخصيه و لكنه نضوج التعامل

و اللي مكتوب قدامي في ابوست بياكد كلامي

تحياتي

فتاه من الصعيد يقول...

كل كلامك صح وانا معاكي تماما

أحمـــــــــــــد أبو العلا يقول...

التوافق ياكيارا

التوافق لو مش موجود هتكون مشكله كبيره

توافق في المبادئ حتى لو كان فيه اختلاف في وجهات النظر

لما نقعد مع بعض نتكلم بلغه واحده,نختلف لكن لازم نوافق على نفس المبادئ

مينفعش نقعد مع بعض واحد بيتكلم في الحياه وازاي نعيش حياتنا والتاني بيحكي ازاي هوا عاكس كام بنت في حياته

المء على دين خليله: ده ميثاق لأي اختيار صديق

واحدة مجنونة يقول...

اعجبني جدا تعريفاتك للصداقة
و الحدود التي يجب ان تكون موجودة
و كيف نختار الصديق
اسمحي لي ان اضع رابط مدونتك عندي
و تقبلي مروري
شكرا لكي

بحب كل الناس يقول...

السلام عليكم ورحمة الله

اولا موضوع البوست جميل جدا وطريقة عرضه بس فى حاجة على الصداقة بين الولد والبنت

انا هشبه ان الولد والبنت

ان كل واحد منهم دائرة مضيئة ولا تسطيع المواصلة على الاضاءة الا من خلال حدود

ولو تخطى احد هذه الخطوط انطفئت الدائرة


وتقبلى مروى

الازهرى يقول...

الصداقة معانى جميلة وكتيرة
ولكن من شروط الصديق المهمة جدا انه وفى اهم لحظة اللى هى لحظة الصراحة بينهم يبقى فعلا صريح سواء بالعيوب والمميزات


اما بخصوص انواع الصداقة فبعيد برضه عن رأى الدين
فانا عندى بعض الامثلة الحقيقية لصداقات قامت على العشرة الطويلة بينهم وخاصةمن ايام الطفولة ولو تفتكرى انا كتبت عنها قبل كده ولسه هاكتب
لكن برضه ارجع لكلمتك الاهم فى حدود
لان طبعا لما اتكلم مع محمد صعب يكون فى نفس الامور مع فتكات مثلا
والا ايه ؟

مش فاكر كنت ناوى اقول ايه تانى
لو افتكرت هارجع

ندا منير يقول...

رائع يا كيارا بجد وانتى وضحتى كل حاجة خاصة بالصداقة

موضوعك جميل

والصداقة لما بتنجح بتبقى شئ جميل قوى وبتبقى احلى شئ فى الدنيا

حاسوباتيه يقول...

الصداقه احساس رائع خصوصا لو كان بجد وقوي بس ليا تعليق على صداقه البنت والولد افتكر انها مش بتكون صداقه بجد لان مهما كان في حاجات ماقدلرش اقولها لاي ولد وده رايي

EMMY BABY يقول...

فعلا ميقدرشى يحس بمعنى الصداقة غير اللى مجربهاش مش معنى كدة انه عاش وحيد لا ممكن يكون كان عنده اصحاب بس زى مانتى قلتى مع اول موقف باعووووووه وقالوا باى باى

عجبنى جدا الجزء بتاع البنت ووالولد

بصى مش عارفة عجبنى البوست اوى بصراحة اصلى كنت داخلة قلت ياترى هيكون فى ايه عن كلمة صداقة مش عارفاه لاقيتك ذكرتى الموضوع من كذا جانب

بجد احييكى

تحياتى

ايمى

احمد سعيد يقول...

كل اما كانو متوافقين وطباعهم وصفاتهم وميولهم شبه بعض
كل اما صداقتهم هتكون اقوى


بصى ياستى

انا معترض على الجمله دى

لانه مش شرط

بل فيه حاجه تانيه بتخلى الرابط اقوى

الا وهى التكامل

يعنى

انا فيا حاجات مش فى صحبى وهو فيه حاجات مش فيا

احنا الاتنين بنميل للحاجه اللى مفتقدينها ومش موجودة عندنا بينما موجودة عند الاخر

فبتقوم علاقه تعتمد على التكامل وليس الاستغلال

فرق كبير بين الكلمتين

بقول التكاااااااااااااامل

يعنى بنكمل بعض ومحتاجين لبعض


وممكن كمان الحاجات دى نكون مش بنحبها او على الاقل مش متقبلينها

بمعنى ادق مش بنسعى اليها

فبالتالى بتكون فيه حاجه اسمها القبول


يعنى

فرضا مثلا انا راجل محترم وماشى دوغرى

وليا صاحب له بدل المعجبه عشرين

انا مش عايز كدة

بس انا متقبله كشخصيه

اينعم ببعد عن الجزئيه دى فيه

بس فيه حاجات اقوى بتخلينا متمسكين ببعض

لذلك هتلاقى فيه صداقات غريبه جدا بيكون الطرفين فيها متناقضين فى حاجات كتير

وعلى الرغم من ان نوعيه الصداقات دى نادرة

الا انها بتكون اقوى بكتير من الصداقات العاديه

لان لما انا اصادق انسان زيى

ساعات لما اتخنق من نفسى واكرهها

هلاقينى من غير ما احس بنفر منه

لانى بلاقى نفسى ساعات فيه

hérisson يقول...

كيارا

أنا مش عارف اقول إيه
يعني عملتي المعادلة الصعبة

فسرتي بكل دقة معني صعب نشرحه يا دوب بنحسه بس

والاجمل انك فسرتيه بإحساس

برافو يا مني حقيقي جيبتي الموضوع من كل الجوانب
وحتي النقط الصغيرة ما اهملتيهاش

دمتي مبدعة كعادتك
يا بخت من نال صداقتك يوم
كفاية إنك عارفة معني الصداقة صح

تحيااااااااااتي لقلمك

Butterfly يقول...

يا جامد
ايه الكلام الكبير ده بس
ولا أوبرا رينفرى فى زمانها هههههههههههه
طبعا عندك حق فى كل الكلام ده وأا مقتنعه بيه جدا.

معتز شاهين - باحث تربوي يقول...

كلامك 100 100
واوافق على كثير منه

كل حاجة وليها حدود

بارك الله فيكي ونفع بكي

ويبقى التواصل

ذو الوجه المبتسم يقول...

السلام عليكم
ازيك كيارا
الاخت mony
اولا اشكرك لردك على تعليقي
انا متفق معاكى مع اللى بتقوليه
الزواج فعلا التزام
والحب لازم نرويه علشان يستمر باى شكل من الاشكال
عاوز اقول لك ملحوظة
مش شرط ان كل سؤال باساله يكون خاص بيا انا
انا باتكلم بشكل عام
لان فيه بالفعل ناس بيحصل لها كده

واعتقد سيدتى انه الانسام منا ممكن يتحكم فى اى شئ
الا المشاعر والاحاسيس
حتى لو متزوج
ممكن يحب ؟
صح ولا انا غلطان
يلا بقي متكشريش كده
فكيها بابتسامة حلوة
تحياتى للجميع

ذو الوجه المبتسم يقول...

بصراحة التعليقات كلها من الاخوة جميلة
الاحساس بالصداقة شئ من اجمل ما يكون

سؤال ؟
ياترى الزوج امتى يكون صديق لزوجته ؟؟
وياترى هيحكى لها عن كل شئ
وياترى هى امتى تكون صديقة لزوجها ؟
وياترى هتحكى له كل شئ ؟

Nabil يقول...

كيارا...
ازييييييك اخبارك ايه؟؟؟

يارب تكونى فى احسن حال

موضوعك بجد جميل اوى كالعاده والله.

عمرو يقول...

كلامك منطقى جدا و مش لاقى فيه أى اٍختلاف تقريبا مع ما أقتنع به من أفكار خاصه تولدت بداخلى عبر سنين طويله عشتها بحلوها و مرها وسط خضم هائل من الصداقات و الأصدقاء بكافة الأشكال و الصور ..
بيتبن لى يا كيارا اٍن الصداقه الحقه لا تكون اٍلا باٍمتزاج الصديقين فى كيان نفسى و معنوى واحد بشرط أن يقتنع كل واحد بمزايا و عيوب الآخر و ده مفتاح خلود الصداقه ..
تقبلى تحياتى و تقديرى و بيعجبنى أوى تحليلك المتأنى للأمور بغير تسرع و لا تطرف ..

Somaya Kamal El Din يقول...

انا مليش اصحاب بمعنى الكلمة انما عندى كتييييير بقى اصحاب مش بنفس المعنى
ههههههههههههه

موضوعك حلو اوووووى

ابو على يقول...

واللهى كلامك جميل جدا
حتى اللى مش متوافق معاكى ف رايك اسلوبك يخليه يقتنع لانه بيتكلم بالعقل

نسيتى حاجه مهمه اوى لو تلاحظيها ان اى اتنين اصدقاء على صح يعنى تنظرلهم كده من قريب او من بعيد تحسى انهم اخوات
انا اقصد الشكل على فكره

جود لاك

MaNoOoSh يقول...

صح جداااااااا يا كيارا

اذا كان الحب مش بايدينا فالصداقة اختيارنا
وعلشان كده لازم ندقق فيها قوي

وبالنسبة للصداقة بين الزوجين فأعتقد انها محتاجة قدر كبير من التسامح والتفاهم وتقبل أخطاء الاخر سواء كان الزوج أو الزوجة
لان الصداقة محتاجة صراحة والصراحة محتاجة ليونة كبيرة فى المغفرة لأي خطأ

علشان كده الصداقة بين الزوجين تعتبر اصعب الصداقات لأنها بيدخل فيها الغيرة

arsenalwy يقول...

كيارا

عملتى تحقيق صحفى ممتاز عن معنى الصداقة ومفيش احلى من الصداقة بين نفس الجنس ولد ولد او بنت بنت الواحد بيبقى على طبيعته ومش حاطط اى حدود

انا زعلان منك اولا لانك محطتيش اللوجو بتاع حملتنا ثانيا مش شايف تفاعلك معانا عالجروب عالفيس مع انك من مؤسسين الجروب

طبعا مفيش زعل ولا حاجه ده عشم بس عايزين على قد ما نقدر ياكيارا نساعد الناس دى بجد محتجانى ومحتاجينك ومحتاجين غيرنا

جزاكى الله من خيره

مشمشه يقول...

كلامك كله تمام جدا وسليم جدا بالذات حكاية الصدق دى لان لو حصلت فى يوم من الايام اى كذب من وجهة نظرى فى حاجه بتفضل تقع وبعدين بتقع العلاقه فورا ده عامة فى نقطه صغننه ممكن بس اقولك عليها ان الوقت مش هو الى بيوضد العلاقات يا ريت كان كده لانى كنت فاهمه زيك فى ناس بتفضل معاكى سنين طويله بحجة انهم اصدقاء وبيبقوا زى الفل بجد وفى لحظه موقف ما بتلاقى كل ده هوووووب راح فى الهوا يبقى ما هواش بالوقت وعلى رأى الى قالوا الصديق وقت الضيق
وحشتينى يا قمر

اسماء واحلام فى وجدانى يقول...

كيارا يارا يا بداية البشارة

اللى ورا كلامى ده مجرد اشارة

بتقول لنفسى حاسب يا احمد

من الدنيا دى

الدنيا دى مليانة مرارة

ومرارة اخوكى ربنا يستر

من كتر اللى فيها

بقت عاملة زى الخيارة

marmar يقول...

الله عليكي يا كيكي يا حبيبتي تسلم الايد اللي كتبت والقلب اللي حس
بجد الصداقه في اليومين دول بقت عمله نادره جداااااااااا
خصوصا بين البنت وبنت او ولد وولد
يعني اللي معاه صديقه يخاف عليه ويتبت عليه بايده وسنانه عشان ممكن يصحى ميلاقهوش جمبو وساعتها هيخسر كتير اوي :(

وحششششششششششششششششششاني

♥..~*شـــوشـــو هـــانــم*~..♥ يقول...

اولا ازيك ياكيارا
وحشاني

تعرفي البوست ده وجعلي قلبي قوي قوي
ليا وحه صاحبتي انتين اوي اوي اوي يعني بمعنى الكلمه كنا كاننا وحده بس

بس من حوالي شهر بس طعنتني ف ضهري ابشع طعنه ممكن حد يطعنها

عملت حاجه لغاية دلوقتي مأثره على حياتي دي قد تكون دمرتهالي مش أثرت عليها بس

وانا بغباءي سامحتها مع اني لسا بعاني من اللي عملته كل الي حواليا قالولي مكنتيش سامحتيها
انا بكلمها دلوقتي بس علاقتي بيها بقت سطحيه

بس مش عايزه اتكلم في الموضوع ده كتير قلبي وجعني اوي بجد

كلام جميل ياكيارا

تحيتي..

♥..~*شـــوشـــو هـــانــم*~..♥

شمس النهار يقول...

ازيك وحشاني جدا جدا
مش عارفه ابعت لك اي رساله من الموبايل بترجع تاني وبعت لشيكو ماوصلتش برضوا في ايه
الميل مع شيكو ابعتوا لي نمركم عليه
وحشتوني جدا

(green eyes) يقول...

الصداقه فعلا حاجه نادرة ورغم ان عندي اصحاب كتير واعتبر المقربه لبنات كتير اصحابي الا اني مش بلاقي نفسي الا مع ثلاثة بس .. دا علشان الكلام اللي فعلا قولتيه وهو التوافق

تقبلي مروري

آفشنا حرامي يقول...

نحن فى انتظار زيارتك

لامر هام

يختص بينا كأسرة واحدة

elsha3er يقول...

السلام عليكم انا متفق معاكى بس مش عارف لية مش حاسس حكاية التوافق دى انا شايف ان المسألة كدة ربانى زى ما بيقولو بس مش عارف لية مش جاية معايا الاحساس بحكاية التوافق دى


تحياتى

احمد الشاعر

عالم حبيب يقول...

الصداقة معنى جميل .. وكل ما ذكرتيه عنها رائع خصوصا صفات اختيار الصديق .. لكن احنا كمسلمين أكيد الدين هو على رأس تفكيرنا دائما .. وربنا عزوجل حسم الموضوع في الصداقة بين البنت والولدفي الآية الكريمة

وَلَا مُتَّخِذَاتِ أَخْدَانٍ 25 سورة النساء

قال ابن كثير رحمه الله في تفسير الآية : قَالَ اِبْن عَبَّاس : وَمُتَّخِذَات أَخْدَان يَعْنِي أَخِلَّاء وَكَذَا رُوِيَ عَنْ أَبِي هُرَيْرَة وَمُجَاهِد وَالشَّعْبِيّ وَالضَّحَّاك وَعَطَاء الْخُرَاسَانِيّ وَيَحْيَى بْن أَبِي كَثِير وَمُقَاتِل بْن حَيَّان وَالسُّدِّيّ قَالُوا : أَخِلَّاء وَقَالَ الْحَسَن الْبَصْرِيّ يَعْنِي الصِّدِّيق

الشاب أمامه أبواب كثيرة لتكوين علاقات من نفس جنسه وكذا الفتاة .. حتى يكون الأمر في حدود ما أمر به الله

الموضوع عموما جميل جزاكي الله خير

اقدم عاصمه فى الحب يقول...

كلام جميل اوى
ومدونه اجمل

وانتى اتكلمتى عن موضوع فى غايه الجمال
والناس اللى بتتواصل معاكى وبتعلق على مواضيع مافيش اجمل منهم
وتقبلى زيارتى اللى استمتعت فيها بالوقت الجميل ده

واعتبرينى زائر جميل دائم لهذه المدونه الجميله
..
. :)
ايه الجمال ده .....؟!
هههههههههه

☼♫♪ عمــاد الدين يــوسف ☼♫♪ يقول...

عزيزتي كيارا
في الحقيقه كلامك يتاقل بالذهب لانه جدا مفيد ومقنع وملم بالموضوع
في رأيي الصداقه بين الولد والبنت او الراجل والست ( كفئه عمريه مختلفه ) شيئ جميل ونبيل لو كان في اطار الالتزام بالاخلاق والدين ، بس للاسف احنا حوّرنا لفظ صديقه او صديق ( لصحبتي وصحبي ) وانا شايف انها الفاظ ومصطلحات غريبه على مجتمعنا المحافظ لان انتي وكلنا عارفين يعني ايه صحبتي ؟؟ او يعني ايه صحبي ؟؟

تحياتي

ملكة بحجابى يقول...

كيكووووو
وحشتينى
يابنتى انتى مثل للصديق الصدوق
وعجبنى اوى انك ركزتى على انه لو صداقة بين بنت وولد يتحتم تتبنى على النضوج وجميل البيت
(وإذا أتى الحبيب بذنب واحد أتت محاسنة بألف شفيع )
وحشتييييييييييييينى

سلميلى عالعصابه
:)
أميرة

(ملكة بحجابى )

قيس بن الملووووح يقول...

شوفي يابنتي ياكيارا
اهم من معني الصداقه هما عنصري الصداقة فلو كان في ادني مصلحه لا تكون هناك صداقة الصداقه حب لله وفي الله
تحياتي يا بنت ياشقيه

msafa يقول...

الكلام ده مهم جدا
لازمكل الناس تقراه
تقبلى مرورى

الشاعر الحزين يقول...

الصداقه

كلمه لو فهمها كل الناس مش هيفرطوا أبدا فيها

كلامك بجد جميل قوى قوى

وشرحك للصداقه أكثر من ممتاز

على فكره أنا متابع جيد جدا لمدونتك
بس للأسف مش بعلق لسبب واحد فقط





متستغربيش من السبب





السبب هو









الحياء








سلام بقى

حلم بيعافر يقول...

الصداقة ببساطة حاجة بتقوينا فى وش الدنيا
هى نوع من الحب منقدرش نستغنى عنه
ميمنيش بقى صداقة مع ولد ولا بنت
المهم الاقى حد يفهمنى وافهمه

كراكيب يقول...

ايييييييه يا كياااارا
مابين كل سطر وسطر واخدة كااااان إنتر
:) ايه الدخلة اللي انا دخلاها دي

ازيك يا اووختشي عاملة ايه كدة
ان شا الله تكوني فل الفل وعال العال

بوست هايل وكلام عاقل ويخش الدماغ

مستنية بوستك الجديد يا كوكي
ماتتأخريش علينا
اشطة

miro el niro kwaniro

أبو العريف يقول...

انا جاي اقول الموضوع حلو قوي

سيبك انت
انت عامله ايه

طوبة ذهب وطوبة فضة يقول...

اولا وحشانى اوى اوى ثانيا بجد موضوعك جميل جدا واتكلمتى عن كل اللى يخص الموضوع خصوصا الصداقه بين الاطراف المختلفه وفعلا لو فى ثقه وصدق متبادل واهم حاجه وضع الحدود والتزام كل طرف بدوره وعدم تجاوز هذه الحدود اما عن غياب الصداقه فهى موجوده بوجود الدنيا ولكن زحمه الحياه هو ما جعلها تتوه وتختفى ولكنها مازالت تحتاج لان ننفض عنها الغبار لتعود الى بريقها المعهود تسلم ايدك ياجميله

MR.PRESIDENT يقول...

رغم إن موضوع الصداقة ده مهم في حياة كل فرد ، وبفتخر أني لي صديق منذ منذ 9.5 سنين وعمري الآن 21 سنة تقريبا إلا اني بختلف معاكي يا اخت كيارا في موضوع الاختلاط و صعب نفصل بين الولاد والبنات عمرنا ما سمعنا عن نبي مثلا له جيرل فيرند لأن الدين واضح وانا عارف انك قلتي بعيدا عن الدين بس للاسف صعب نفصل بين الدين وحياتنا لان الإثنين بيكملوا بعض وبشكرك علي تنيبيهك علي الصداقة واختيار في بوستاتك الاخيرة ربنا يكرمك باذنه ، وارجو تقبل رايي ومروري بصدر رحب

أحساس لسه حى ...أنا مش موافق يقول...

عزيزتى
الصداقه جميلة اوى

بس الرجل بيقدر وبيخلص فى الصداقه عن المراه

زى ما المراه بتخلص فى الحب عن الرجل

الرجل صعب يبيع صديق علشان حبيب

المراه تبيع اى صديق من اجل الحبيب

تحياتى

سلام

نهــــــــــار يقول...

السلام عليكم ....
إزيك يا كوكي يا عسل ....
ماشاء الله عليكي جمعتي كل الجوانب وطرحتها بموضوعيه ....
....
الصداقه مليون بالميه ليست بالطلب ..
هي أمر يأتي لوحده ...
....
صداقة بنت وولد..
أظن انها زماله لا صداقه ...
تقتصر على مكان العمل أو الدراسه ...
...
تحياتي لمامتك العسل ....
وأن شاء الله يطلع التعليق كتبت تعليق طويل عريض وللأسف لم يظهر...
...
دمتِ بخير