عالــم مــولان عالــم مــولان
randomposts

آخر الأخبار

randomposts
randomposts
جاري التحميل ...

قلبك بيشوف الحقيقه .. الخوف والشك بس هما اللي بيعموا

  1. بحبك يامامتي يااغلي من كنوز الدنيا

    ردحذف
  2. rbna ykhlehalk ya rab wtfra7 beky wboladk ya amraya wtgeby bnt shaaya zayk bs htsta7mleha lan el omoma de a3zm ghreza fldonya

    ردحذف
  3. ربنا يسترررررررررررررررررررر لحسن بجد الامهات بتعاني معانا

    نورتيني ياعسل

    ردحذف
  4. انا جيت

    هاقولك حاجتين لاني بجد مستعجل بس مقدرتش معلقش عندك و مش هاستني افضي كمان ساعة :):)

    اولهم : طبعا ايه الحاجات دي بجد مسخرة بالذات الزيت :):):)
    بس فعلا اكيد ماماتك نفس طيبتك عشان اكيد انتي زيها و مسير بنتك هتبقي زيك :):)

    تاني حاجة انتي مجتيش لقاء المدونين ليه انا كنت هاقولك بس انشغلت ...كان بجد يوم جامد قوي :)

    ردحذف
  5. السلام عليكم......
    ربنا يخليلك مامتك يا كيارا يا عثل إنتي ...ههههه
    ولو بنتك طلعت زيك دي حتبقى حكايه ....
    كان الله بعونك دعوة الأم مستجابه حضري نفسك ...
    سلامي لماما ...
    في أمان الله..

    ردحذف
  6. ربنا يخليك لمامتك و لينا
    الشقاوة مطلوبه

    و ده ذكاء


    تحياتي

    ردحذف
  7. هههههههههههههههه كل دع عملتية في مامتك لا ليكي حق تخافي علي نفسك

    بعد الشر علي نفسيتك يا كيارا احنا قاعدين مستنين اهو

    ردحذف
  8. هههههه
    لا ياكيارا

    انا لو بنتى طلعت زييى
    مش هخليها تعيش لحد يوم الثلاث
    ولا الاربع
    ههههههههههههههههه

    يابنتى مافيش اغلى من الضنى:)

    حمد الله على سلامتك ياجميل

    ردحذف
  9. ههههههههههههه


    حرام عليكى كل ده
    انا كنت ومازلت حمامة سلاااااام طيوبة اوووى


    ربنا يخلى لك ماماتك ويخليكى ليها

    ردحذف
  10. ربنا يخليها ليكي ويخليكي ليها

    يارب

    ردحذف
  11. يارب يخليهالك ويخليكى ليها يارب

    وتفرح بيكى وأنتى عروسه وتفرح بأولادك ان شاء الله

    وصدقينى لو بنتك عملت فيكى أكتر من كده هتستحمليها وهتسمحيها طبعا

    لأن هى دى الأمومه وهو ده الحنان اللى فى قلب الأم

    دمتى بالخير

    ردحذف
  12. تصدقى انا هخصمك

    طب اسالى عليه يمكن اكون مت

    ههههههههههههههههههههه

    البقاء لله فيه بقى ولا عزاء لكيارا

    تصدقى لو تخيلنا نفسنا مكانهم

    استحاله نتحمل اللى شافوه معانا

    من يومين بابا كان بيكلمنى وزعلان بسبب

    حالتى الصحية وبيقولى لو انا مكانك

    وانتى العكس هتقدرى تتحملى قولت له لا

    قالى طب ليه قلت له مش عارفة

    بس صعب انى اتحمل كل دا

    ساعاتها حسيت بدره الله وحب اهالينا لينا

    ردحذف
  13. السلام عليكم

    بحبك اوى اوى اوى
    طبعا مش انتى
    دي ماما ههههههههه

    خلتينى وانا باقرأ البوست صورة امى مش بتفارقنى

    ربنا يخلى لك مامتك ويبارك لها فيكى ويبارك لك فيها يارب

    خدى راحتك لحد من تتظبطى وترجعى بحالة افضل ومود احلى

    بس اول حاجة عاوز اشوفها منك فى اى تعليق انتى عارفاها
    هههههههههههههه
    ايون هى دي

    تقبلى تحياتى

    ردحذف
  14. طيب أنا نفسى أفهم

    لما تشدى فى شعرك هيقولوا اتجننت
    ازاى ؟

    يا بنتى ات مجنونه أساسا وجنون أصلى مش أى كلام
    وألا بتحاولى تعملى نفسك مش واخده بالك من الموضوع ده

    بجد ربنا يخليلك مامتك ويخليكى لها
    وتكونوا دايما فى سعاده وصحه وأمان

    ويرزقك بنت شبهك يارب

    ردحذف
  15. السلام عليكم

    ربنا يخليها لك
    وربنا يعينك علي هذه الدعوة
    وعلي هذه الكلمات التي خرجت من فمها الي السماء سريعا وأكيد مستجابة ان شاء الله

    ويعينك اللي هتشوفيه في تلك الايام وخصوصا مع التكنولوجيا الحديثة والتفكير العبقري للنشأ الحديث وقتها

    ،،،
    وبعدين بلاش الاعلانات عن لبن نيدوا
    والا الرقابة هتحذف هذه الاعلانات أو تحاسبك عليها


    تحياتي

    ردحذف
  16. يخليهالك يارب
    وتفرح بيكي عليطول كدة
    ويخليكي ليها

    ردحذف
  17. يا حبيبتى يا كيارا ربنا يخليهالكم يارب ويخلى كل ام
    امال ايه هو الجنة تحت اقدام الامهات من شوية ماهو من اللى بنعمله فيهم
    طب تعالى شوفى ولادى مجننى يا اختى والله بس يلا الحمد لله ربنا يخليهم ويعملوا اكيد مامتك كانت بتقول كده برضه مش كده
    ماما لما كانت بتقول لاختى ربنا يديكى بت وتعمل فيكى زى ما عملتى كانت تقولها بلاش ياماما الدعوة دى شوفىلنا غيرها هههههههههههههه اتجوزت اختى وجابت بنت منتهى الشقاوة نفس مقالب اختى بالظبط ههههههههههههههههههههههه
    ربنا يسعدك يا منى يارب ونشوفك فى احسن حال

    ردحذف
  18. ربنا يخليها ليكى يارب تخيلى بقى بنتك عملت فيكى كده هتعملى فيها ايه؟

    ردحذف
  19. ربنا ياااااااااااااارب يخليهالك
    ومتتحرميش منها ابدا

    ويارب تجيبى بنانيت زى القمر ويطلعوا زيك ساعتها ابقى قابلينى لو لاقيتى شعرايه واحده تشديها لانك هتكونى قضيتى عليه هههههههههههههه

    وبعدين يعنى وحشاااااااااااااانى موووووت ويارب الهدنة بتاعك تخلص بسرعه بسرعه وترجعلنا
    بمووووووت فيك يا منمن

    ردحذف
  20. الام لا تعوض بحنيتها

    يا ريت اكون نص والدتي مع ولادي

    ربنا يخاليهالك ويخليكي ليها

    ردحذف
  21. ربنا يحليكوا لبعض وميحرمكيش منها ابدا ابدا

    وعشان تعرفوا قيمتكوا عندنا وتقدروا قيمتنا عنكوا يا كوكى


    عارفه كل ما احس بلهفتى على بيرو وااقله لا فى حاجه وتكون عشان خوفى عليه افتكر ماما علطول

    ردحذف
  22. ربنا يخليها ليكى ويخليكى ليها

    بس ايه الشقاوة دى كلها يا بت
    دنا بنتى اللى هموت عليها لو عملت نص اللى انتى عملتيه هحط ليها سم فى الاكل واخلص منها
    ههههههههههههههههههههههههههه

    بس هفرح اوى لو كبرت ولقيتها زيك طيبه وحنونه ومؤدبه ساعتها بس مش هندم على اللى عملته وهحس بفخر انها بنتى وحته منى
    يا رب يا كيارا ربنا يرزقك ببنت شبهك

    ردحذف
  23. من عمل يعمل كل العملناه واحنا صغيرين لازم يحصلنا ولازم هيطلع على عنيناهنروح منه فين ....
    ربنا يخليلك مامتك ويخليكى ليها....
    rock 

    ردحذف
  24. ربنا يخليهالك
    ويباركلنا في كل أمهاتنا وأبائنا

    ردحذف
  25. السلام عليكم

    ألف حمدلله على السلامه

    ويارب تكوني بخير ويروق بالك ويرزقك السكينه والطمأنينه

    رنا يخليك ولدتك ويمتعكم بحياتكم مع بعض

    بس ايه المقالب ديه كلها؟
    بصي اللي اعرفه انه كله سلف ودين,
    هههههههههههه

    وشكلك كده والله اعلم هيجيلك بنوته اموره شقيه وهتتعبك شويه بس هتكون ان شاء الله اغلى حاجه في دنيتك

    ردحذف
  26. ربنا يخليهالك يارب ويحفظك ليها
    وتكوني دايما بارة بها
    ساعات بحس ان الامهات بيحبو شقاوتنا
    بيفرحو بها رغم انا ساعات بتغيظ اوووي
    حنعمل ايه بس يا بنتي
    طيب ادينا كبرنا والمفروض عقلنا واحنا برضو لسه زي ما احنا
    هههههههههههه
    ربنا بيديهم صبر علينا منين
    مش عارفة
    ربنا يخلينا امهاتنا يارب
    سلام

    ردحذف
  27. إفعل ما شئت كما تدين تدان
    دا إنتي بنتك حتشيبك إن شاء الله :))
    ربنا يخلي لك ماما و يخليكي ليها و يكرمكم دايماً

    ردحذف
  28. عشان كده الام ليها الجنه

    ردحذف
  29. ربنا يخليكي ليها ويخليها ليكي
    يعني يخليوا لبعض من الاخر
    ههههههههههههههههههههههههههه
    لا بجد انتي كارثة
    كنتي شقية اوي يا كركورة
    اصبري بس وشوفي بنتك هتعمل فيكي ايه
    هههههههههههههههههههههه
    ادعي بقي من هنا للصبح انك تخلفي ولد
    ولو يا بنتي هيعمل فيكي اللي معملتيهوش في مامتك
    D:

    وحشتيني يا بنت انتي
    امووووووووووووووواة
    دمتي بخير
    :)

    ردحذف
  30. بجد الام دي نعمه ربنا مديهالنا
    مش اي حد يحس بيها
    بستغرب اوي لما بسمع عن حد عاق مع اهله
    وامه بالذات
    ماما مسافره السعوديه كمان اسبوعين
    وانا مش راضيه افكر انها هاتسبنا شهر
    بحاله كده
    انتي خليتيني افكر مع اني عاوزه انسي
    :(
    يارب يخليلك مامتك وكل امهات المسلمين
    ويفرحهم ديما بينا يارب
    جميله اوي ياكيارا :)

    ردحذف
  31. صديقتى الجميلة كيارا
    وحشتينى جدا جدا ومش هقولك زعلان انك مش بتخشى عندى بس عزرك
    ربنا يخليلك ممتك يا رب وميحرمكيش منها ابدا
    وواضح انك كنتى مغلباها اوى
    فى حد يرش زيت hahahahahahhahahaha
    والله جامدة ولا حتة الكرسيين اللى فوق بعض والله الواحد هيخاف منك بعدين
    وحشتنيى جدا
    كل سنة وانتى بخير و رمضان كريم
    تحياتى

    ردحذف
  32. هههههههههههههههههههههههههههههههههه يخربيت كدة

    ضحكتنى اوى بتاعت ايه الدوشة دى

    بحب اوى مواقف الطفولة دى
    ربنا يخليلك مامتك يارب ويخليلنا امهاتنا

    تحياتى

    ايمى

    ردحذف
  33. ربنا يخليهالك يا رب ويكرمك باطفال زى السكر زيك كده ويومها حتعرفى قيمتها اكتر واكتر ربنا يخليكو لبعض

    ردحذف
  34. ربنا يخلى لك ست الحبايب و يخليكى ليها و يجازيها خير جزاء عن معاناتها معاكى يا مولان :)
    و على فكره الأبهات كمان بيعانوا معاناه جنونيه زئبقيه فتاكه ثلاثية الأبعاد مع عيالهم بالمناسبه برضو :)
    ما هو أنتم ولادنا ربنا يخليكم لينا و أنتم اللى حتسندونا فى كبرنا يعنى أنتم أحسن اٍستثمار فى الحياه الحقيقه ..
    تقبلى تحياتى و تقديرى ..

    ردحذف
  35. ربنا يخليكوا لبعض يااااااارب وربنا يكرمك باولاد كتييييير بس مش يتعبوكى زى ما كنتى بتتعبى مامتك

    ردحذف
  36. كل سنة وانتى مامتك والاسة كلها بخير رمضان قرب
    وربنا يخليها لك وكل الامهات ربنا يديم عليهم الصحة
    ويعنى بقى احنا عرفنا ان الشقاوة دى عندك تاريخ طويل هههههههه
    بس هى شقاوة لذيذة بتملا مدوناتنا بالبسمة
    وعلى فكرة انا مستنى الجزء الاخير
    دمتى بخير

    ردحذف
  37. اولا بعتذر بجد عن تأخري في التعليق علي الكلام اللي هزني من جوه
    بس كان عندي ظروف كده

    بجد يا مني البوست مليان مشاعر حسيت بيها اوي واحترمتها جدا
    وعارفة بر الوالدين ثمرة بتحصديها في اولادتك اللي هيجوا قريب وتفرحي بيهم وتلاقيهم شبهك ناجحين وشاطرين ومحبوبين ومؤمنين

    زي ما مامتك حصدت ثمرة حبها ليكي واهتمامها بيكي وخوفها عليكي
    وبقيتي اجمل كيارا
    اللي اي ام لازم تفخر بيها

    حقيقي بوست اثر فيا اوي
    والحمد لله انك رجعتي بسرعة وما غيبتيش علينا
    في انتظار الجزء الاخير من القصة
    تحياااااااتي يا كيتي

    ردحذف
  38. السلام عليكم

    ربنا يخليها ليكى ويخليكى ليها

    وربنا يرزقك ببنت زيك او زى مماتك لأنكم انتوا الإتنين طيبين وحنيني على بعض جدا جدا ومش هتلاقوا احسن منكم تتمنوه لنفسكم


    وترجعلنا ان شاء الله بعد ترتيب الاوراق بأحسن حال بس مش تطولى علينا :)
    تحياتى

    ردحذف
  39. ربنا يخليهالك ياكيارا وتفرح بيكي
    وياما انا كمان لعبت في حوض الزرع وبهدلتلها الشقة طين وياما لعبت في الزبالة وطلعلتها عضم الفراخ واتكسرت 8 مراة وتجري تجبسني
    العيال دوول هم ياشيخة

    ردحذف
  40. مش اوى كدة يا كيارا


    اكيد
    ماماتك كانت سعيدة بكل دا


    وبالتالى انتى هتسعدى بدا من بنتك


    اتكلى انتى على الله وخلفى ومالكيش

    دعوة

    ردحذف
  41. طب بذمتك يا شيخة
    بعد الكام كلمة الحلوين اللى قولتيهم ف الآخر دول ميبقاش نفسك تجيبى بنوتة زى القمر زيك تقولك كدا ؟!!!!
    ربنا يرزقك بنين و بنات و تفرحى بيهم
    و يتربوا فى عز جدتهم
    يا رب
    و لمعلوماتك
    شوفى إنتى إتدلعتى و إتحبيتى جامد ازاى من مامتك رغم كل الشقاوة دى
    .. بصى بقى بنتك هتتعامل احسن منك الف مرة
    أعز الولد يا كيارا
    ربنا يسعد أيامك يا حبيبتى و يخليلك ست الكل

    ردحذف
  42. ابنتي الشقيه كيار
    واضح انك مش مظبطه خالص بدليل انك حرماني من مشاغباتك الممتعه
    تحياتي

    ردحذف
  43. اللــه يا كوكى
    بوست تحفة
    جميلة ذكريات الطفولة اوى
    واجمل ما فيها امهاتنا
    ربنا يخليهم لنا ويباركلهم فى صحتهم وعمرهم وفينا

    كل سنة وانتى طيبة يا قمر
    والى الله اقرب وعلى طاعته ادوم


    لما تفضى تعالى استلمى التاج اللى عندى يا جميل

    رمضان كريم

    ردحذف
  44. الله ..

    خلتينى احب مامتك قوى

    واحب فيك احاسيسك الندية ووفائك لمامتك

    ربنا يخليكوا لبعض وميحرمكمش من بعض

    انا جيت علشان اشكرك على زيارتك لى ودعائك الجميل الى انا فعلا محتجاه

    والغريبة انى لقيتك بتمرى بحالة شبيهه
    الظاهر انها عدوى :)

    رمضان فرصة جميلة نجدد اروحنا المرهقة والمظلومة معانا

    واكيد هنكون احسن بعد شحنة الايمان الى رمضان ممكن يوفرها لنا لو اسغليناه كويس

    ربنا يقويك ويوفقك ويرضيك ويرضى عنك

    ويباركلك فى ماما وتكونى زيها ام حنونة

    كل سنة وانت طيبة يا منى

    ردحذف
  45. ربنا يخليهالك وتستحملك كمان وكمان:)

    ردحذف
  46. ايه يا بنتى
    خير
    فينك بجد انا مش عارفة حاجة خالص
    على العموم تحيااااااااتى
    ويارب تكونى بخير
    وكل سنة وانتى طيبة والامة الاسلامية كلها بخير

    ردحذف
  47. دانتى كنتى مجرمه وانتى صغيرة:))

    ردحذف
  48. هههههههههه

    ياه

    ده ياريت الاطفال كلهم يبقوا طيبيييييين قوي زيك وانتي صغيرة

    براءة و طيابة مفيش كده (",)

    و إن شاء الله بنتك تطلع زيك بالظبط

    علشان تحبي مامتك اكتر و تقدري هي تعبت علشانك قد ايه :)

    ردحذف
  49. انت لسه هنا؟


    لا لا تعالى بسرعه عندنا


    تيمون وبوبما عايزينك


    كل ما تضحك اكتر كل تاكل بطاطا اكتر

    هاكونا مطاطا

    مش هتقدر تغمض عنيك

    هاكونا مطاطا هديتنا لكل المدونين عشان نخرج من حاله النكد

    هاكونا مطاطا تهييس للصبح

    هاكونا مطاطا ... لااااا للملل


    هاكونا مطاطا... قول لاء للهم

    هاكونا مطاطا.... اوعى تزعل ابدااا

    هاكونا مطاطا... ارمى الماضى ورا ضهرك


    انسى الماضى اللى يغيظ


    يلاااااااااا تعالى مستنى ايه


    وياريت تضيف اللينك عندك ومش هتندم

    مودتى

    ردحذف
  50. الأستاذة الفاضلة: كيارا
    صاحب مدونة: عالم مولان
    " تحية طيبة" وبعد..
    اعتذر عن الخروج من موضوع التدوينة، لقد أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية تشتمل على البيانات التي تساعدك على الإجابة عن الاستمارة.
    أرجو الاهتمام والرد سريعا.
    تحياتي وتقديري.
    شيماء إسماعيل
    باحثة بالماجستير- كلية الآداب جامعة القاهرة.

    ردحذف
  51. و أنا كمان
    الجنة غالية يا فارسة و في حالة خالتو أم مولان و اضح أن الثمن كان مضاعفا.

    بارك الله لك فيها و لها فيك و جعلك العمل المتصل لوالديك.

    تحياتي

    ردحذف
  52. ابنتي كيار
    المشكله احنا بنعملها وبنعيشها بنجري دائما وراء تطلعاتناورغباتنا التي لا تنتهي ..تعرفي دخل الزوجه ضاع في ايه ..لبس زياده..مصاريف انتقالها... مساحيق وبودرات...مصاريف حضانه للرضيع.... الست زمان كانت بتوفر ده كله وكانت بتغسل علي ايديها وتضبخ علي وابور الغاز وتكوي بالمكوه الحديد وتعصر الطماطم في المصفاه وليس الخلاط او الكتشن ماشين ..وتكنس بالمكنسه الليف مش الكهرباء ...وكانت تخلف سبع اوعشرة وتربيهم احسن تربيه ويتعلموا احسن تعليم وكانت مطيعه لزوجها
    ابنتي لقد شققنا علي انفسنا فشق الله علينا

    ردحذف
  53. السلام عليكم ورحمة الله وبركاته

    وانتي بكل صحة ورضا وايمان

    تحياتي
    الى اللقاء

    ردحذف
  54. هههههههه


    ربنا يكون فى عون مامتك

    عايزة اسئل الصورة اللى انت حاطة فى الموضوع بتا عتك وانتى صغيرة

    بس كل المواقف اللى حكيتى عنها عسولة

    وبالذات النوم تحت السرير

    ردحذف
  55. ربنا يكون فى عونها
    والله لها الجنه
    ياجبااااااااااره
    (:

    ردحذف
  56. ربنا يخليكم لبعض
    ويسعدكم
    حلو البوت اوي
    ممكن تزوري مدونتي هي لسة جديدة

    ردحذف
  57. السلام عليكم ..
    ازيك يا كيارا .. ؟ يارب دايما بخير حبيبتى ..
    ربنا يخلى لك ماما و يخليكى لها يارب و ما يحرمكوا من بعض ابدااااا ..
    بس انتى بجد كنت شقيه جدااااااااااا
    الحمد لله ان الشقاوة الجامده دى اصبحت ذكريات .. ربنا يرزقك كل السعاده انتى و ماما و كل احبابكم ..

    كل سنه و انتى طيبه و يارب رمضان كريم علينا و يتقبلنا الرحمن فيه برحمته و غفرانه .. امين

    ارق تحياتى

    ردحذف
  58. عاوز تعرف دينك اكتر

    وكمان ازاى تكسب ثواب وحسنات فى نفس الوقت

    تعالوا زروروا مدونه طــ الجنه ـــور

    اللى هدفها زياده الثقافه الدينيه وكمان خدمه الاسلام

    عاوزين تعرفوا ازاى تخدموا اسلامكم انتوا كمان وتكسبوا ثواب

    تعالوا وهتشوفوا بنفسكوا

    ردحذف
  59. أنا كمان كنت مجنناهم وأنا صغيرة ودلوقت طلع على عينى لأن بنتى بتعمل فيا كل ال عملته زمان
    كل سنة وانتى طيبة يا كوكى ورمضان كريم

    ردحذف
  60. السلام عليكم

    واااااو يا كيارا
    مش قادرة أقولك كلامك مأثر في قد إيه

    تخيلي إن مقدرتش أطلع من عندك غير لما قرأت أحلام وردية كلها من أولها لآخرها كمان

    هاااااااااايلة مووووت
    بس فين بقي الجزء الأخير
    بسرعة بقي بالله عليكي أنا أصلي بجد مبحبش الإنتظار


    تحياتي
    سلمي

    ردحذف

بحبك اوى اوى اوى

في الاول انا بعتذر عن غيابي سواء في الميل او المدونة او الفون بس فعلا انا نفسيا مش متظبطه وبعمل اعادة ترتيب وعشان كدا الاختفاء دا هيستمر شويه
بالنسبة للقصة الجزء الاخير انا كتبت نصه ومش عاوزه  اكمله إلا وأنا في المود عشان مش تحسوا ان في انفصال في الاحداث

مش عاوزه حد يزعل اني مش بزوره انا في فتره اعادة ترتيب وان شاء الله هرجع قريب

572385262

 

اما الفيديو اللي نزلته من كام يوم
فخلاني افكر جدا جدا جدا

من كام يوم كنت بتكلم مع ماما وبنهزر ولاقتها بتقولي الهي يا مني تجيبي بنت وتكون نسخه منك كدا

يالهووووووووووووووووووووووووووووووووووووووووووووووووووووووووي ايه الدعوه دي لا انا مش لاعبة

راحت ضحكت ضحكــــــــــــة وتقولي يبقي عارفه نفسك

هههههههههههههههههههههه ايوه عارفه نفسي انا لو بنتي عملت فيا ربع اللي عملته فيكي ياماما انا همشي في الشارع اشد شعري

همشي اكلم نفسي واخري الخانكة من غير مناقشة

w6w_w6w_200505040801143fbe6d597

وسرحت وعماله اقول ياتري هقدر اتحمل ياتري هتحمل ايه ولا ايه ولا ايه

المقالب - المذاكرة والتربية - المرض اصله بيحبني ولا ايه ولا ايه

نيجي للمقالب

رجعت بالذاكرة لورا لما كانت كل البنوتات عندها عرايس وانا بشوف ماما بتخيط وبركز معاها قوي

اقوم اجيب المقص واروح علي لبس ماما الجليبات والبيجامات واجي علي الطرف الاخير منه واقصه ال ايه هعمل فستان للعروسة اشمعني يعني ماما تلبس والعروسة لا

وهي تيجي تلبس تلاقي اللي هتلبسة مقصوص  من تحت ومش تفتكر انها قصه مقص لانها متدرجه تفتكرها فار ويقلبوا الشقة علي الفار انهم يلاقوه ابداااااااااااا

ولا لما كنا بنرش الميه في الشقه بازاه ببتاعه زي القطارة كدا ومره هي كانت حاطه ازازه زيت جنب بتاعه الميه ورحت اخدت الزيت بدل الميه وهاتك يارش في الشقه كلها

كل حاجه اتبهدلت بعد اما كانت مروقة وماسحه

ولا لما  نمت تحت السرير وانتي فضلتي تدوري عليا والجيران اتلمت وانا كنت نايمه والكل قعد يدور عليا وانتي بقي منهاره وعماله تقولي بنتي وبعد كام ساعه من اللف والدوران عليا

اصحي واطلع من تحت السرير و اقولك هو ايه الدوشة دي

براءه يااخواتي

ولا لما حطيت العروسة بتاعت المولد في دولابك

ولا اللبن لما تكوني عملاه لينا وتروحي انتي هنا وانا اقوم رمياه في الحوض من هنا

ولا فاكره اللبن النيدو لما كنت بحب اكله بالمعلقة وانتي تحطية فوق وطبعا عشان صغننه كنت احط الكرسين فوق بعض واطلع اجيبه بس مش بينزل سليم

كان بينزل كل حبه مستقله بذاتها هههههههههههههههههه

1537941210415340yj0

دا انا شيبتك يامامتي مقالب

هقول ايه ولا ايه انا البلاوي اللي عملتها معاكي بجد لاتعد ابداااااااااااا

مش بنتك السوسه زي مابتقولي ههههههههههههههههههه

نيجي للتربيه والمذاكرة

طبعا  تربيتك لينا هي اللي مخلياني دلوقت كيارا اللي بيعرفها بيحترمها ربنا يخليكيي ليا يااجمل ام في الكون

اما المزاكره مش هنسي مادة الرياضة اللي خلتنيي اعشقها واطلع الاولي في المدرسة عليها اينعم انا كملت تاريخ بس الاهم انك كنتي محبباني فيها

كل المواد كنتي بتزاكريها لينا وبتراجعي معانا ووقت الامتحانات بتاخدي اجازه وبتروحي معايا الامتحان وبتستنيني

ولما كنت باخد درس كان بيبقي في البيت وبتفضلي قاعده قدامنا شايفه المستر بيقول ايه كنت ساعتها بتضايق لكن عرفت بعد كدا انك صح وان غلط نتساب مع المدرس في اوضه مغلقة زي ما الكل كان بيعمل

ولما بقيت في الكلية وبقت المواد مختلفه وكبرنا كنتي بتقعدي تقري القران جنبي وانا بزاكر وبتديني الامان حتي لو مش بتزاكري معايا

كبرت معاكي في حضنك ياامي

sk-01b-mothersgen
كبرت لقيتك صديقتي واختي

حتي في مرضي بجد عانيتي معايا كتير فيه لاني كل شويه عيانه

ماما انا باقر وباعترف اني دوختك اوي


في شقاوتي وحياتي وفي كل حاجه


ربنا يخليكي ليا يااحن ام في العالم

وربنا يستر ومش بنتي تعمل فيا كل دا لحسن هشد شعري ويقولو البت اتجننت

بحبك يا مامتي  ياعسل يااجمل ام

04d342770aaaaa4602328c12828e5c8c

عن الكاتب

Kiara بنت مصريه بحلم بدنيا صافيه مش فيها غدر وكل اللي فيها اننا نحب بعض مش لهدف ما لكن نحب بعض عشان نشوف الدنيا صح

التعليقات


اتصل بنا

إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

جميع الحقوق محفوظة

عالــم مــولان