الجمعة، نوفمبر 27، 2009

شوية سرحان

 

من مدة اتسالت سؤال

النيل بيمثلك ايه ؟

nile misr

كانت اجابتي المختصره جدااااااااا

هى

^^^

اااااااااااااااااااااااااه النيل حبيبي وصديقي الوفي


النيل ده اول اما اشوفه بحس اني رحت دنيا تانيه خالص

بحس انه بيسحبني من كل حياتي  وبنسي معاه العالم والناس

 

وبيخليني اسرح فيه


وفي موجته الخفيفه اللي طبعا مش زي البحر


النيل حبيب العشاق السهرانين


النيل ونيس الوحدانين


النيل رمز للجمال


معه بتحس انك في دنيا مش فيها اي خداع ولا غش ولاكدب


بتحس انه بياخدك للعالم المثالي


بفكر كام واحد شرب منه وارتوي وجري في شراينه


كام واحد عاش من خيره 


كام واحد نجح في حياته بيه


كام واحد اذي الناس بيه


كام واحد اشتكاله ورمي حموله فيه

كام حبيب وحبيبه راحوله ويشهدوه علي  حبهم


كام واحد عمل زفافه فيه وكان طاير من فرحته


كنت فاكره ان الناس اللي شغلها فيه مش بيبقي عندها هموم


وبتبقي في قمه سعادتها وهما معاه


طلع ان اللي حاسس بيه هو البعيد عنه


واللي دايما بيشتقاله


لكن اللي بيشتغلوا فيه


لا يعني لهم شي


وبيهملوا فيه

النيـــــــــــــــــــــــــــــــــــل فيه غموض بيشدك للتفكير


اوقات لما بشوفه بقول لا انا مش هسرح تاني


عاوزه ابصله وبس

 
شي غريب لما تشوفه يدفعك انك تسرح في جماله


تسرح في كلامه ليك  لما بيكلمك وبيجاوبك علي اسالتك ليه


اه النيل بيكلمك


ممكن مش بلسان زي البشر


لكن بالاحساس


كفايه لحظه ماشوفه قلبي بيدق اوي اوي اوي


بحس اني سعيده اوي


زي مابتشوف الجد  وترمي كل اللي جواك فيه

ومن حبه فيك بياخد منك همومك وبيغسل قلبك كمان من الهموم

واول اما تبص له لا تملك سوي كلمة ..  الله سبحانك

تخيلوا بئا كام واحد وواحده رموا فيه همومهم وهو غسلها

 

 

ده النيل حكاااااااااااااااايه ومهما اتكلم


مش بيعبر عن شي جوايا

وهتفضل يانيلنا  الجد الطيب اللي بيحتوي كل الناس

44 كلام قلوبهم:

ابو على يقول...

ايوه كده احنا عايزين كل يوم بوست

اجرى البوست واجيلك

ابو على يقول...

هما قطعو الميه عندكو ولا ايه هههههههه

انتى شكلك اتلفحتى تيار هوا وانتى واقفه ع النيل ملى دماغك

هو بصراحه انقى واصفى مشاعر ممكن تقوليها للميه سواءا بقى كانت بحر ولا نيل
بس عندك حق الواحد بيحس انه بيتغسل لما بيروح للميه مش شرط انه ينزل فيها

انا عن نفسى بموت ف القعده قصاد البحر

7annen يقول...

النيل دا سر الحياه

حلم بيعافر يقول...

النيل نجاشى

حليوة واسمر

اييييييييه فينك ياعبدالوهاب

كل سنة وانت طيبة

عاشقة القمر يقول...

عارفه انا بحب النيل اوي بس ياخسارة مش عدنا النيل في بلد ساكنه فيها
بس موت في النيل

فاتيما يقول...

الله عليكى يا كيارا
تعرفى كلامك دا بالمللى حسيته
لما سافرت المنصورة ..
النيل هناك تحفة
و كمان من كام يوم شفت النيل فى القاهرة بس بشكل تانى غير اللى بشوفه بيه فى العادة ...
متهيألى حالتنا النفسية و الصحبة اللى معانا ممكن تفرق فى احساسك بالجمال عموماً
انما فى الأيام العادية دا مبيحصلش
لأننا بنكون غرقانين فى ألف حاجة تانية
حلو تشبيه النيل بالجد
فعلا جدتى الله يرحمها كانت الملاذ و الملجأ لكل شباب العيلة
لحد ما ربنا افتكرها
و ساعات كتير كنت بتمنى
لو كانت عايشة فى اوقات كتير
عشان مش تحل المشكلة لأ ...عشان الواحد يروح يفضفض لها و يرمى الهموم عندها
و يرجع خفيف
عيد سعيد عليكى يا بنوتات
يا عسولات

عاشقه الرومانسيه يقول...

النيل مفيش عاقل ينكر فضله
لكن احنا بقى عندنا البحر
وما ادراكى ما البحر
قدامه تنسى اسمك مش النيل بس
ههههههههههه

أبو العريف يقول...

مش عارف ايه سر عشق المصريين للنيل

انا واحد من الناس مع اني عمري ما فكرت احود اقف شويه عالنيل

وبشوفه بس وانا راكب المواصلات

لكن بعشق النيل بمجرد ما اسمع اسمه

احس انه فعلا حته من الجنه

محسيتش كل الكلام اللي قلتيه

لكن مصدقه

لو حد قاللي عشان بنشرب منه

هقول لا

انا مش للي بيربطني بيه اني بشرب منه

لا دي حاجه تانيه خالص

بوست رائع

تحياتي



اه نسيت اقولك

كل سنه وانت طيبه

كلي كويييييييييييييييييييس

adel يقول...

ياااااااااه كل ده عن النيل
ده انا افتكرتك بتتكلمي عني
اه و انا عمال ااقول ازاي كيارا تقول كل صفاتي كده للناس
وقعدت اتكسف و اتكسف قوي كمان
طلع الكلام في الاخر علي النيل
ده طلعنا متشابهين برضه قوي
ههههههههههه

وردشان smilyrose يقول...

ياااااااااااااه يا كيكى

قد ايه النيل ليه ذكريات معايا

وذكريات تخصنا فاكرة

لما كنا نتمشى سوا واخر مرة لما صورتك

واحنا على الكورنيش

قد ايه بلاقى عمرى معاه

شهد على حياتى كلها على بداية حبى

الوحيد وشهد على اخر لقاء لنا

ولما بتضيق بيا الحياة بروحله

وارمى نفسى جوا حضنه

وياما شهد على دموعى

مهما كتبت مش هقدر اوفيه حقه

كل سنة وانتى طيبة

وشكرا على الذكريات الحلوة

اللى خلتينى اعشها تانى وانا بكتب

mohamed ghalia يقول...

اسرحى ياقمراية براحتك
النيل فعلا بيدخل كده الراحة والسكون
ربنا يسعدك دايما
كل سنة وانتى طيبة

Mohamed Hamdy يقول...

مع احترامى للنيل
لكن الواقف على ضفته بيشوف ايه؟
بيشوف الضفه التانيه
اما الواقف على كورنيش اسكندرية بيشوف ايه الناحيه التانيه ؟ ولا حاجه .. فراغ تام
تعرفى ان فى دراسه اثبتت ان الناس اللى مبتقدرش تمد عينها على اقصى بصرها بيصابو بامراض العيون اكتر من الى ساكنين عند البحر او الاماكن المفتوحه على امتداد البصر؟
البحر يكسب بلمس الاكتاف

شاب فقرى يقول...

كلامك حقيقة

كنت زمان بروح اقعد اكلم النيل كدا

وكان فى ناس بتقول عليه مجنون

بس كنت برتاح اوى

لانى مع حد بحبه


:)

خالص تحياتى واحترامى
شاب فقرى

صوت من مصر يقول...

النيل عبارة عن شىء لا يوصف لاى حد
بس النيل هو مصر الحقيقه

Hager Za3bal يقول...

عاجبني كلامك اوي بكل تفاصيله وتعبيراتك ووصفك .. تسلم ايديكي بجد يا كيارا ..:)

وحشاااااني .. ياااااااارب تكوني بخير ..

وكل سنه وانتي طيبه
ربنا يجعل كل ايامك عيد :)

Sonnet يقول...

عيد سعيد عليك

فتاه من الصعيد يقول...

النيل بيمثلي الفسحه وبس

عمري ما حاولت اكلمه لا هو ولا البحر


بس النيل هادي وابن حلال .... تحسيه اصيل اوي

تحياتي

Manamino يقول...

كل سنة وانت طيبة ياكياااااااارا
عيد سعيد يارب عليكي وعلي كل الناس الحلوين الملايكة الطيبين اللي زيك كدة
كل سنة وانتم كلكم طيبين وبخير
يارب

حنين يقول...

كل عام وانتى بخير
انا حبيت اجى اعيد عليكى واحيكى على البوست الجميل فعلا النيل ده اكثر من رائع والكلام عنه ماينتهيش
اتمنى زيارتك
مع تحياتى حنين

مدحت محمد يقول...

المزز

norahaty يقول...

مصر هبة النيل
مش عمونا هيردوت
قال كده زماااان
ربنا يستر عليه
لان ناس كتير
أشرار جدا
بيسحبوه
مننا
شوية شوية
وأحنا ولا هنا:(

صدى الصمت - عاشقة الورد - يقول...

أمال لو شفتى النيل فى أسوان بصفاؤة وروقانة ولونه الساحر وجماله الحقيقى الخالى من الشوائب هتقولى ايه ؟
دة أنتى هتكتبى عنه قصايد شعر من جمالة وروعته
تحياتى وكل سنة وانتى طيبة

المعتصم يقول...

ازيك ياكيارا
يارب تكونى بخير وزى الفل
وكل سنه وانتى طيبه
عارفه كلامك ده كنت بحس بيه قوى وانا قاعد فى كايرو
كنت ساعات كده ببقى راجع متأخر على الساعه اتنين تلاته الفجر كده
كنت بروح اقعد على النيل لغاية الصبح وافضل بقى احكى معاه واشكي له واقوله
وياسالام بقى لما مايبقاش فيه ناس كتير بتبقى متعه مابعدها متعه
بس دلوقتى مافيش نيل يبقى الواحد يتنيل ويقعد وهو ساكت احسن
ههههههههههههه
كل سنه وانتى طيبه
ســـــــــــــلام

نهر الحب يقول...

من امنياتي اني اشوف نهر النيل فعلا

انا من اسكندرية واللي انتي وصفتيه عن النيل بحسه اوي للبحر

تدوينة مميزة

تحياتي

Butterfly يقول...

أكيد مش هقدر أقول أكتر من اللى انتى قولتيه
وصف جميل جدا ومعبر أوى :)

مدحت محمد يقول...

هههههههههههههههههههههه


النيل بيمثلى البنات الحلوة يعنى

blue-wave يقول...

الله عليكى يا اجمل مولان فى الدنيا:)
كل سنه وانتى بالف خير

Soma يقول...

ااااااااااااااااااااااه

انا كمان قلبي بيدق لما بشوف النيل

بياخدني بعيييد لدرجه اني مش فاكره الناس اللي وقفت معاهم عند النيل بس فاكره احساسي انا بالنيل

ربنا يديمه قدام عينينا ويحفظه لينا

كلمة صدق يقول...

السلام عليكم احت العزيزة اولا اسمحيلى بالمرور فى مدونتك الجميلةواحب ان اهنيك على ذوقك الجميل فى تنسيقهاواحساسك جميل فى وصف النيل وهو رمز الصفاء والمحبة والنقاء

ahmed_k يقول...

النيل آه يا نيل
قديما بعث أمير الشعراء برساله لشاعر النيل حافظ إبراهيم من منفاه يقول فيها :
يا ساكني مصر إنا لا نزال على
عهد الوفاء وإن غبنا مقيمينا
هلا بعثتم لنا من ماء نهركم
شيئا نبل به أحشاء صادينا
كل المناهل بعد النيل آسنة
ما أبعد النيل إلا عن أمانينا

وكل سنه وأنتي طيبه وبعوده عليكي العيد بكل الخير والصحه والسعاده

ahmed_k يقول...
أزال المؤلف هذا التعليق.
Somaya Kamal El Din يقول...

والله انا مبشوفش لا نحر ولا نيل

اخرى الترعة هههههههههههههه

وماما قالت لى تمشى ومتلميش حد

ومجربتش احساس انى اقعد واتكلم مع النيل

وصحيح عندنا ورنيش زى الفل ويفتح نفس الواحد بس انا اللى فقرية مش بروحه

silent girl يقول...

بما انى اسكندرانية حسيت كلامك لان البحر بيدينى نفس الاحساس اللى انتى بتقوليه ده ولماباجى القاهرة بسرح نفس السرحان اللى بسرحه فى البحر عندنا كنت اتمنى ان اليكس يكون فيها نيل :D

mostafa rayan يقول...

طبعا نهر النيل لا يعلى عليه
بالنسبه لان الناس اللي شغالين فيه مش حاسين بيه فدي طبيعه البنى ادم مش بيحس بالنعمه إلا لما تروح منه
لك كل التحيه يا بنت منطقتى الجميله

اقصوصه يقول...

انا النيل يذكرني بالفراعنه

وبإسطورة عروسة النيل :)

Dr Ibrahim يقول...

لن يكفى الكلام على النيل يكفى أنه نيل

دمتى بود

حسن ارابيسك يقول...

يااااه كل ده النيل بيعمله
صحيح عندك حق
مهو النيل ده ياما طلع لينا شعراء رومانسيين تالق معهم شعرهم شعراء جهابزة وقد كتبوا الكثير أيضا عن النيل وكتبوا أيضا فيه الأشعار الجميلة مثلما كتب الشاعر الكبير محمود حسن إسماعيل مسافر ذاده الخيال وقد لحنها وغناها عبدالوهاب
لا فعلا النيل له سحر خاص عن دون أنهار العالم لذلك نحن نعرف قيمته اه واللهي ونهينه على أكمل وجه
تحياتي
حسن أرابيسك

لجين أبو الدهب يقول...

هو التعليق فوق كده ليه ؟

بنهج من كتر الطلوع والنزول D:

النيل فعلا حاجة عظيمة كفاية انك وانتى بتشوفيه بتشوفى نهر من الجنة

ومنظره مهيب مع انسياب ورقة مياته

بحب النيل جدا

بس البحر اكتر ..

تعبير جميل ياكيارا على وصف النيل وصفتى فعلا حاجات واحاسيس صادقة جدا

تسلم ايدك

ضحكات الحياة يقول...

النيل
فكرتيني بنكته
واحد بيقول لخطيبته شوفتي القمر يا قمر
قالتله شوفت النيل يا منيل
ههههههههههههه

ضحكات الحياة يقول...

لا
بجد البوست حلو و تعبيرك عن النيل جميل و رائع

بس فعلا هو النيل كده يشدك قوي و انت واقف عليه بالليل و تلاقي الهوا كده ضربك في وشك و في ايام الشتا اللي احنا فيها دي ممكن تاخد برد بس عادي
تحس انه حاجة نقيه كده و بيسمع لهمومك من غير اي ملل

صراحة بوست جامد
دومتي مبدعه

dalia يقول...

كياراااااااااا وحشاني اسفة على التقصير اتمنى ان تكوني بخير وصحة ، يعني اغيب واجي القيكي سرحانه وبتسرحي كمان في النيل حبيبي ماشي
تحياتي

حصان المرجيحة يقول...

السلام عليكم
يا من احببتي النيل
ارجو التواصل
مدونة حصان المرجيحة

نهر الحب يقول...

السلام عليكم ورحمة الله وبركاته
ازيك ياقمر مش باينة ليه؟
يارب تكونى بخير وصحة وسعادة دايما يارب.

عندك حق النيل حكاية كبيرة مهما اتكلمنا عنها مش حنوفوها حقها.


خالص حبى واحترامى

نهر الحب

انسان وبس ! يقول...

ازيك
تحياتى على البوست المنيل دى هههههههههه
بهرج
لا بوست جميل وعموما التأمل فى اى حاجه كويسه شىء جميل
وانا بشارك حب النيل والسرحان فيه على فكره بقعد ابص للميه بعبط هههههه واسرح
بتكلم بجد
بوست جميل