عالــم مــولان عالــم مــولان
randomposts

آخر الأخبار

randomposts
randomposts
جاري التحميل ...

قلبك بيشوف الحقيقه .. الخوف والشك بس هما اللي بيعموا

  1. اول تعلييييييق الاول

    واقرا وارجع اكتب كومنت

    ردحذف
  2. هو كلامك حلو اوي يا كيارا
    وخلتيني عايزة اشوف ابيت ده.. رغم اني ما بتغزلش في الطبيعة زيك.. ولا عندي الحس الرومانسي بتاعك العالي ده
    يعني عمري ما فكرة في ريحة بيت او حاجة كده

    بس البوست بيدل على انك حساسة اوي

    ردحذف
  3. الله عليكى يا بت انتى
    تصدقى فعلا ساعات نعشق حاجات جماد و نحس بيها قوى اكتر من لبنى ادمين
    بس بنعشقها كلها على بعضها بكل تفاصيلها
    و لو اتغيرت فيها حاجه اكيد كلها على بعض حتتغير

    روح البيت اهله اللى بيحددوها
    يعنى لو ناس طاهره و بريئه حتلاقى البيت هادى و تحسى الملايكه بترفرف عليه
    و لو العكس حتحسى بالنفور من اول ما تعدى قدامه

    الانسان فعلا لو بيحب حبيبه قوى بتلاقى حتى ملامحهم بقت شبه بعض و تصرفاتهم بقت متتطابقه

    جميل البوست زى صاحبته

    ردحذف
  4. دا شئ طبيعى

    ممكن أى حد فينا يرتبط بأى شئ حتى لو كان جماد

    أحيانا بنكون مش عارفين السبب ، لكن حتما ولابد فيه سبب لكنه غايب عن العقل الواعى وموجود فى اللاشعور .. إللى بنسميه العقل الباطن

    كلامك فكرنى برائعة محمد منير : طعم البيوت


    بوست رائع

    دمتى بكل الود .. تحياتى

    ردحذف
  5. انا شامه عطر فروعها مع ندى مطرة

    ( غالبا هتلاقي ريحة الفروع متربه عشان المطر بيبقي ملوث دلوقت )



    عن طابق واحد فقط طوله تقريبا مترين

    ( تفتكري اللي طوله مترين ده وبتتغزلي فيه حد عايش فيه اصلا دا اكيد عشة فراخ )


    انا برتشف كوب من القهوه
    ( مش هتبطلي القهوه دي بقي )


    عبيطة اوي

    ( اوي اوي اوي هع هع هع هع )



    الخلاصه

    خلاصة الكلام
    ولب الموضوع ان تشبيهك جامد جدااا

    وكلامك ف محله

    بس قلت ارخم الاول شويه

    ردحذف
  6. انتي خيالك جميل ماشاء الله .... وواضح انك من الناس اللي بتتعلق بالاشياء :)

    بس الف سلامه عليكي بتروحي للدكتور ليه ؟

    تحياتي

    ردحذف
  7. فنانة يا كيتي والله
    بس اكيد اللي شدك في البيت انه بسيط
    وان عيونك احتاجت لمنظر طبيعي من غير عملية تجميل في وسط حياة معقدة
    وانك مستعدة تضيعي وقتك وتنفضي للدكتور قصاد مغازلة لعالم قرب ينقرض
    واحلي حاجة انك قولتي انه صعب تغيري الناس اللي جواه
    فعلا هو لو بسيط فده عشان اللي ساكنين فيه بنفس البساطة ولو انتي حليتي مكانهم هيتجمل اكتر ولو ناس تانية عندها قدرة وحب تجميل المناظر فيتحول قصر مكلف وعالي ومنعزل عن الناس ولو الحارس شافك بتبصي عليه شوية هيشك فيكي ويجري وراكي

    بعكس احساسك ان اصحاب البيت البسيط هيرحبوا بيكي ويعزموكي ع الغدا
    وانتي طبعا هتتحرجي وترفضي
    بس اكيد اكيد اكيد مش هتمشي غير لما تطلعي منهم بالمثاثة :D

    دمتي مبدعة يا مني
    تحياتي

    ردحذف
  8. سبحان الله
    اوقات كتير بتسيطر علينا احاسيس نادره تجاه اشياء معينه وده لاننا بيتملكنا شعور بالحنين للماضى ولذكرياتنا وبنشعر كتير ان الذكريات هى التى كانت تحمل ايام سعادتنا الحقيقه وكانت تحمل النقاء والبراءه ..نتمنى لو يعود الزمن بنا للوراء ولو ليوم...ولكن هذا الاحساس الذى شعرتى به تجاه هذا البيت ممتع فى حد ذاته ويضيف للنفس راحه وامل ..

    ان شاء الله اتمنى الا تتغير هذه المشاعر والاحاسيس الجميله لديكى وان تتمتعى بكل ما حولك دائما .

    ردحذف
  9. سر جمال الشيء نابع من طبيعته
    واي شيء طبيعي جميل
    اوقات كتير الناس بتتجمل
    ومنغير متحس بتشوه الحقيقة
    بتشوه الطبيعة
    البوست رائع
    تحياتي
    تامر الحسيني
    انسان عاشق حر

    ردحذف
  10. هشوفلك واحد سمسار ونخلصلك فى البيت

    ردحذف
  11. كلام عاقل قوى وموزون قوى فعلا لما الانساين بيحب حد بجد بيحبه بكل تفاصيله بيحصل بينهم نوع من الاندماج كمان قيمة الشيئ في كونه زي ماهو له تفاصيله الخاصةبيه اللي تميزه عن غيره
    موضوع جميل زي العادة يا بنت منطقتى

    ردحذف
  12. جميل اوى البوست ده ياكيارا
    بيعجبنى فيكى جدا نظرتك للامور بتشوفيها بشكل مختلف مليان براءة
    عجبتنى اوى الجملة دى وعندك حق فيها
    وجدت انه فعلا اللي يعجب بانسان او اي شئ لازم يكون حابه بكل تفاصيله ومش يحاول يغير فيه اي تفصيلة لان التغيير دا كفيل بهدم الكيان الجميل دا

    ردحذف
  13. وجدت انه فعلا اللي يعجب بانسان او اي شئ لازم يكون حابه بكل تفاصيله ومش يحاول يغير فيه اي تفصيلة لان التغيير دا كفيل بهدم الكيان الجميل دا

    بس فيه عيوب ساعات بتخلى الكيان الجميل ده بيفقد جماله بعد شوية

    التغيير مطلوب لكن بحدود ويكون ف الامكان

    حساسة ورقيقة اوى انتى يا منون دمتى رقيقة ومبدعة

    ردحذف
  14. فتافييييييييت
    ^^^^^^^^^^^^^

    نورتي ياقمر بااول تعليق :)

    ردحذف
  15. فتافيت

    ********

    ربنا يكرمك ياقمر انتي اللي رقيقة اوي عشان كدا شفتيه كدا

    بس بجد والله البيت دا لما بشوفه بحس بروح غريبة بتحتويني وبتمني اقعد قدامه وابصله بس

    ردحذف
  16. صيدلانية طالعه نازلة وداخت خالث ياحيني

    ************

    الله عليكي انتي ياعلا

    والناس فعلا اللي بتحدد ان كان المكان يكون جميل او لا

    وانتي الاجمل لانك شفتيه بعنيكي العثل دي

    ردحذف
  17. د. رامى

    ************


    السبب بيكون مبهم لكن بيكون جوانا المهم اننا مستمتعين بالارتباط دا ولا اية:)

    ومحمد منير دا مش ليه حل اصلا

    ردحذف
  18. ابوالعريف

    ***********

    يااااااااااااارب صبرني يارب اعملك فيه اية يابني انت مستقصدني ليه غاوي رخاااااااااااااامة ليه

    بلاش هشررررررررردك انت بلاش تتكلم يالهوي علي الناس

    فينك ياراون زمانك ظبطتيه دلوقت

    ههههههههههههههههههههههه

    ردحذف
  19. فتاه من الصعيد

    **************

    ربنا يخليكي ياقمر بس فعلا انا بتعلق بالاشياء جدا البيوت الشجر كل حاجه


    اما الدكتور فاكان فيه انيما والحمد لله اتظبطتت

    ردحذف
  20. جدوووووووووو

    ****************

    صح جدا ياجدوووو

    ههههههههههههههههه وفعلا لازم يجبولي مثاثه امال همشي ببلاش كدا اية الناس دي

    اللي جاية بايدها فاضية دي :)

    ردحذف
  21. ابوعلي

    **********

    امممممممممم هو اكيد الماضي له حنين لانه بقي نقي واتصفي منه اي جرح واي حزن مش بيكون في الميموري غير الذكري الحلوه وعشان كدا بنحن ليها ودا حصل لما شفت العروسة لانها شبة عروستي البيت بعيد عن اي تكنولوجيا ودا اللي اداله الجمال

    عامة بتمني الاحساس دا يكون عند كل الناس

    ردحذف
  22. تامررر


    *********

    كل دا اختفاء فينك ياعم

    اكيد معاك حق

    ردحذف
  23. كيمو

    ******

    ياريييييييييييييييت

    ردحذف
  24. ابن منطقتى

    **************
    الاجمل هو وجودك ياابن منطقتىىىىى

    وكل سنة وانت طيييييييييييب

    ردحذف
  25. ايوووووووشة

    **********

    ربنا يخليكي ياقمرررر

    ومبسوطة ان الفقرة دي عجبتك

    ردحذف
  26. منونه

    ********

    في حاجات التغيير فيها مقبول لكن حاجات بتكون هي روح الشخص صعب تتغير لو اتغير هيتهد

    انتي الارق وربنا يامنونه ياعثثثثثثل

    ردحذف
  27. ايه الجمال ده يا مون

    بجد روووووووووووووووووووووعه

    وفعلا لازم لما نحب حد نحبه زى ما هو مش فيه حد كله عيوب ولا حد كله مميزات لازم نرضى بالاتنين

    تسلم ايدك يا حبيبتى

    ردحذف
  28. صح ياحنونتي

    هههههههههههههههههههههههههههههههههه

    طبعا عارفة الضحكة دي ليه

    ومبسوطة ان الموضوع عجبك اوي

    ردحذف
  29. اعتقد بالفعل ان هناك علاقه يمكن ان توجد بين الانسان و المكان او بين الانسان و الجماد
    وصفك جميل جدا عن احساسك بالبيت ..انا دايما بحاول اتخيل حياه الناس اللى ماشيين جنبى فى الشارع و اعرف الحكايه ورا كل صوره

    فكرتينى باغنيه طعم البيوت

    ردحذف
  30. والله هو نفس احساسي وانا بمر علي اكثر من بيت معين قديم شكله مهجور نفسي انط من علي السور - مش عارف ليه - بس عايز اخش عشان اتفرج عليه من جوه ومرعوب ,,,
    وصفك رائع

    ردحذف
  31. هناك فلسفة غامضة بين تلك السطور تحكي عن منهج للحياة
    لن تستطيع ان تتملك من تحب و لكن تستطيع ان تمتزج معه

    لعل فرضية التملك قد تمحو بهجة الشئ و لكن التمتع به كما هو بغير تغيير في مهيته اروع الف مرة من الاستحواز عليه

    احببت سطورك التي قد تبدو بسيطه و لكنها عميقة المعني
    تحياتي

    ردحذف
  32. mohra
    ********
    دا اكييييد انا طلعت مش لوحدي اللي بتنح في الناس بئا :)



    نورتيييييني ياقمري

    ردحذف
  33. MR.PRESIDENT

    ****************
    زي حلاتي بس بتكون مرعوب لية ؟؟

    اعترررررررررررررف


    الاروع وجودك

    ردحذف
  34. بابتى

    *********

    لن تستطيع ان تتملك من تحب و لكن تستطيع ان تمتزج معه

    بالضببببببببببط يابابا هي دي الخلاصة

    منورني يابابا يااحلي بابا

    ردحذف
  35. عارفه يا مني

    حبك وغزلك وتغزلك وعشقك لشكله عشان انتي شايفاه حلو وحباه علي كده انما لو اتغير هيبقي شيء عادي

    وبخصوص البني ادمين فعلا اللي يحب حد بيحبه علي بعضه زي قفص الخيار بياخد الحلو والوحسش وكله في قلب بعضه

    مش هينقي واجمل شيء في الحب ان الواحد ياخد اللي بيحبه علي بعضه يعشق تفاصيل تفاصيله يعشق حياته وهواه وقلبه يحس بللي يحس بيه حبيبه اقولك ايه يا مني قلبتي عليا المواجع

    ردحذف
  36. انا مش قلبت حاجه ياعم هو البيت اللي عجبني روح اضربه بئا :)

    سيبها علي الله

    ردحذف
  37. اولا عجبني قوووي طريقة وصفك للبيت والمكان كاني شايفه بعيونك.
    ثانيا: الحاجات دي زي الزمان اللي عاشته بالضبط..كل ما بتقدم كل ما بتزيد حلاوتها.
    وصدقيني لو قلت لك انه الاماكن فعلا لها روح ويمكن لو روحي البيت ده هو نفسه اللي ها يرحب بيك مش بس اهله ، وده ها تحسية وانت جواه لاني مؤمن انه الاشياء تشعر بمن حولها ومدى احساسه واهتمامه بها.
    بالضبط زي ما تدخلي البيت وتغمضي عينيك وتاخدي نفس عمييييق قوي..

    ساعتها انت مش بتستنشقي الرائحة اللي حواليك.. لأ.. انت بتستنشقي عبق الزمان والتاريخ اللي عاشه المكان.
    حاسساني ممكن اتكلم اكتر من مجرد تعليق لاني باحب حاجات زماااان قوي..

    عجبني كمان كلامك عن انه اللي بيحب حد او شيء بيحبه زي ما هو.. (بس كمان كل انسان بيحاول يتغير عشان اللي بيحبه)

    بوست حلو جداااا.. خلاني ازور البيت الجميل ده واستمتع بروحة اللي اتحولت لحروف هنا في مدونتك :)

    صباحك ورد وقرنفل يا موني :)

    ردحذف
  38. يوم اما جدو اتوفي .. مش كنا عرفنا الخبر بس بابا نزل يدور عربية جدو ويطلع تاني عشان البطارية مش تنام

    العربيه عطلت وكمان وهما بيزوقها داست علي رجل بابا فقال للناس خلاص مش مهم تشتغل دلوقت

    طلع عمتو اتصلت وقالت الخبر ...

    جدو مات في نفس اللحظة العربيه اللي كانت شغاله ميه ميه باظت

    ولحد الان بابا بيحاول معاها ومش بتدور ..

    الجماد بيحس بصاحبه جدا وجدو كان بيحب العربيه دى .. اما بصيت في شنطة العربية

    ايه ياجدو انت مش مخلي حاجه الا وجايبهالها

    كان هو اللي بيصلحها مش بيوديها لحد ..

    ساعة جدو اللي مش اتشالت من ايده الا وقت وفاته

    مش بقت تشتغل

    الجماد بيحس اوي اوي وغلطان اللي بيتعامل معاه علي انه جماد

    غير البيوت

    جرب كدا تقول انا نفسي اعزل من البيت دا

    هتلاقي البيت بئا كئيب وموحش ومقبض لصاحبه

    جرب تحب البيت .. هتستمع بكل لحظة انت عايش جواه

    بحب موبايلي جدا وبلاقيه جميل اول اما اقول عاوزه اجيب حاجه جديده يطلع القطط المستخبيه

    -----

    عجبني كمان كلامك عن انه اللي بيحب حد او شيء بيحبه زي ما هو.. (بس كمان كل انسان بيحاول يتغير عشان اللي بيحبه)

    لو بيتغير عشان اللي بيحبه يبقي في يوم من الايام هيمل ويرجع تاني

    لكن لكل طرف شخصية مستقله كيان مستقل ومع الايام والسنين الاتنين بيدبو في بعض بيكونو كيان واحد

    سعيدة ان البوست عجبك

    صباحك معطر بعبق التاريخ :)

    ردحذف

روح بيت

1165316592

من عادتى وانا بمشي في اي طريق اشوف الدنيا بعنيا .. 

بعشق تفاصيل كل شئ عنيا بتقع عليه

اعشق شجرة فروعها تاخدنى معاها ..

احلم اني فوقيها  .. 

باصه للسما وانا شامه ريحه فروعها  مع ندى مطرة من رب العباد ….

المهم .. وكالعادة وانا ماشية في طريقي للدكتور اللي كنت بروحله كنت بشوف بيت ملوش حل اينعم هو قديم اوي اوي اوي وآيل للسقوط الا انه تحفة بجد ترتاح اول اما تبصله بس ….

هو عبارة عن طابق واحد .. طوله تقريبا مترين ..   شباكه من الخشب  .. وعلطول مفتوح هو الشباك معمول بشكل بلكونة 

تحس ان اهل البيت دا عايشين مع الناس اللي رايحه واللي جاية واكن مش في اي حاجز ( اقصد البيت طبعا ) 

اتمنيت اني اقعد علي الشباك دا وانا بشرب القهوه وبتفرج علي الاطفال وهما بيعلبو كورة وفرحانين وفرحتهم تخلي القلب يطير …

اليوم الثانى

اللي بعدي فيه علي نفس البيت لقيت علي الشباك دا عروسة قديمة زي عرايس زمان افتكرت وقتها عروستى اللي كنت بنام وهى جنبي واسرح شعرها بايدي واحميها واقوم احط الاكل في بقها واعيييييييييييييط لما الاكل يقع منها واقول هي مش بتاخد مني الاكل لييييييه ( عبيطة اوي )
وكانت ماما بتعملي فساتين حلوه عشان البسها للعروسة وكنت بفرح اوي بدا ومين يقدر يقرب من عروستي تلاقي ام اويق فتحت بقها بئا ومين يهديني وافتكرت العروسة اللي كانت في بيت جدي الله يرحمه كنت بترعب منها اوووووووووووووووووي وشكلها يرعب ولحد الان كل اما ابصلها اخااااااااف ……

اتمنيت اشتري البيت دا من كتر ماعشقته وحسيته قلت اجيبه بئا واعدل فيه واعمله ديكور حلو واعيش فيه لكن ….

ريحه البيت هتروح لما ادهنه بدهان جديد !! 

لو بدلت العروسة القديمة بعروسه حديثه هل لما اشوفها هحس بعروستي منا بشوف عرايس كل يوم ليه مش حسيتهم زي العروسة القديمة دي !!

بعدت الفكرة من دماغي لكن ….

كل يوم بعدي فيه علي البيت دا بموت فيه اكتر وبحس بحنين وشوق مش ممكن حد يتخيله حتي اني حكيت عليه مع صديقتي اللي عايشة قريب منه راحت قالتلي " انتي دايما بتتغزلي في الطبيعه حتي البيوت اللي هي جماد بتتغزلي فيها !! " 

قلت ليها البيوت فيها ملايكة ساكنه فيها من سجده اتسجدت فيها بخشوع باتت فه عملت له الروح المفقودة انا متاكدة انك لو خبطتى علي اهل البيت دا هيرحبو بيكي ومش بعيد مش يوافقو انك تمشي الا بعد اما تتغدى كمان !!
قلت في نفسي خلاص انا هخلي كل حاجه في البيت زي ماهى واعيش فيه .. لكن فرضا دا عملته وعشت فيه هل روحه وعطره هيكونو زي ماهما ولا هيتغيرو بطبعي ورتم حياتي  ….

هنا اهل البيت والبيت عشقوا بعض وتفاصيلهم دابت في بعض وروحهم خلتني احتار هل البيت هو اللي كدا ولا اهل البيت هما اللي كدا 

لقيت انه مش ينفع يكون بيتي لاني هضيع جماله بوجودي فيه وقلت هكتفي اني اشوفه واحسه من بعيــــد…

وجدت انه فعلا اللي يعجب بانسان او اي شئ لازم يكون حابه بكل تفاصيله ومش يحاول يغير فيه اي تفصيلة لان التغيير دا كفيل بهدم الكيان الجميل دا 

ولو في تفصيله مش عجباه يبقي الافضل يبعد ويشوف الجمال دا من بعيد عشان يفضل محتفظ بجماله ورونقه 

اما لو حب الانسان بجد فمن غير مايحس تفاصيله هتدوب في تفاصيل الشخص التاني لحد اما تخلي الكل محتار مين في الصفه دى
 
وطبعا التغيير مش اقصد بيه العقل .. لكن اقصد بيه النظره للحياه  والروح والقلب اما  العقل فدا طول مااحنا عايشين لازم ننميه ونتطوره .

~~~~~~~~~~~
ان شاء الله اشوفكم بكرة في اللقاء

عن الكاتب

Kiara بنت مصريه بحلم بدنيا صافيه مش فيها غدر وكل اللي فيها اننا نحب بعض مش لهدف ما لكن نحب بعض عشان نشوف الدنيا صح

التعليقات


اتصل بنا

إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

جميع الحقوق محفوظة

عالــم مــولان