الثلاثاء، فبراير 15، 2011

رد الجميل

180092_125603364177513_100001835506172_171543_1416108_n

 

ياجماعه السيد الرئيس السابق حسنى مبارك

عملنا حاجات كتير اوعو تكونو ناكرين للجميل ابدا

اوعى يامصري ويامصرية الجحود والنكران يوصل لقلبكم

دا كان ملازمنا 30 سنة ازاي نعمل كدا في ابونا اللي كان حنين علينا ومش مخلي الاسرائليين يدخلو بيتنا

دا حتي لما الجنود المصريين بيتضربو علي الحدود كان بيروح يطبب علي اهلهم

ولما مصري اتسحل جاب حقه ولما مصري اتجلد جاب حقه

ازاي بعد كل دا تعملو كدا

انا شفت ناس بتبكي عشانه ومنهاره حرام علينا والله الجحود دا

لالالالالالا ازاي ياجماعه نخليه يرحل بدون ما نعمله 21 طلقه شرفيه زي ما عملنا للملك فاروق ونحييييه

اقولكم شوفو الفيديو دا

بجد هيقولكم اننا لازم نكون ايد واحده مع الشرطة ونحبهم كمان

 

 

عرفتو ليه لازم نرد الجميل

الملك فاروق لما رحل عن مصر  اطقلت المدفعية  21 طلقه تحيه له

الحرس الملكى قاله ممكن نخلص عليهم رفض وقال مش ممكن اخلي في نقطة دم تنزل من مصري

وعشان كدا اتردله الجميل

دا بئا ارد جميله علي اي اساس فقد اراق دم اغلب المصريين سواء " الفقر – التعذيب – القتل – المرض – امن الدولة "

ومش في حد يقول الملك فاروق

image

دا برواز محطم كما تم في عصر مبارك

لكن هناك فرق الملك فاروق رفض اراقة دم مصري واحد

عكس مافعل السيد مبارك

image

ومش في حد يقول اصل هو مش هيكون مسئول عن 80 مليون مصري بيعملو ايه كما قيل لي

عمر بن الخطاب كان بيحاسب نفسه علي النملة

هتقولو العدد مش زي العدد

لا انا اتحملت مسئولية 10 لازم اكون ادها 20 لازم اكون ادها مليون لازم اكون اد مسئوليتهم لاني هتحاسب عليهم واحد واحد

ان مش كنت قد مسئولية حاجه اسيبها

مش اعمل مذبحه عشان افضل

لكل فعل رد فعل

والثورة الاول مش كان نيتها الاطاحه كانت نيتها العداله واننا نقول لا للظلم فين حق اللي ماتو

لكن الغريب ان لما كانو بيصرخو وبيقولو لا للقتل والظلم كانو بيتقتلو بردو

واضح واضح ان النظام القديم كان بيفهم بالعكس

طب كنا نقول بئا اقتلوناااااااااااااا يابشر

وساعتها كانو هيفهمو اننا بنقول لا للقتل

مش مسامحه في اي حق من حقوقنا كمصرييين

والحمد لله علي الخلاص

161976_180443488664273_2711434_n

الفكرة اللي في دماغي

كل حد اكيد قريب منه صيدليه

عشان المريض اللي مش قادر يجيب حق الدوا

كل مصري يدي الصيدلية دي مبلغ مثلا عشان لما يجي مريض مش قادر علي العلاج ياخد من الرصيد دا

او ندي المبلغ دا لمسجد مثلا بتثقوا في شيخه واللي مش قادر يروح لمسجد المكان

كل اسبوع ننزل منطقتنا ننضفها بنفسنا مش لازم نستني انها تنضف لوحدها

كل منطقة تجمع مع بعضها ويجيبو حاجه تتحط فيها الورق واكياس الشيبسي والفضلات وكدا اللي بيرميها المارة  وتتوزع علي المنطقة بدل ما يرموها في الارض

نزرع قدام بيتنا عشان الشجر بيخلي المكان جميل بدل ما ابني علي الاراضي الزراعية

كل 3 شهور اروح اتبرع بدمي في اي مكان

اسيب تليفوني في بنوك الدم عشان لو في حاله مستعجلة يكلموني

اروح المستشفيات اللي امكانيتها علي قدها واديها شاش وقطن واسعافات اوليه

مش لازم نجمع بعض عشان ندى مساعده

اروح ازور المرضي اللي في المستشفي اللي قريبه مني واسالهم هما محتاجين ايه

ومستشفيات الغلابة كتير

موضوع البورصة انا سالت خبير في البورصة قالي انه الوقت دا مش وقت شرا اول اما الاسهم توصل للثبات هيبلغني عشان كلنا لازم نشتري الاسهم عشان مش ندى فرصة للاجنبي انه يشتري في الاسهم المصرية

بالنسبة للمظاهرات الفردية والله ماوقته خالص خلي البلد تقوم وبعدها طالبو بحقوقكم يعني انتو كنتو بتتريقوا علينا ولما لاقيتو اننا جبنا نتيجه  ومطمنين انكم مش هتتاخدو امن دولة بقيتو تتظاهرو !!

6 كلام قلوبهم:

AHMED SAMIR يقول...

انا برضة لسة كاتب موضوع في المدونة عندي عن الناس بتوع رد الجميل دول
حاجة عجيبة جدا
مفيش كدة في الدنيا

كيــــــــــــارا يقول...

انا محروق دمي منهم

مش لحاجه اد ما نسيو وهان عليهم دم اللي راحو سواء في المظاهرات او قبلها

في مثل شعبي تيتا قالتهولي من يومين عشان اللي حصل

بتقول " لو كنتو نسيتو اللي جرا هاتو الدفاترا تنقرا "

والدفاتر شغاله تتنشر وبرضو الناس بتنسي

kochia يقول...

اكيد عمل مميزات
هو مش شيطان يعني حتي لو اخطأ اهو انتهي بعصره بحلوه وبمره وخلاص نبص لقدامنا ونحاول نصلح بلدنا
واقتراحاتك كلها جميلة جدا
يارب كلنا نعمل بيها وكل واحد يبدأ بنفسه وانا هبتدي بنفسي

تحياتي

أكون أو لا أكون يقول...

لا حول ولا قوة الا بالله
حسبنا الله ونعم الوكيل

الفيديو مؤلم جدا... الله يشفيه ويرحم الشهداء

انتي معاك حق يا كيارا في كل كلمه... ضروري ان الانسان يقف مع ابناء بلده ويساعدهم في كل الاشكال والطرق

وأنا لو في بلدي لن اتردد في حمل المقشه وتنظيف شوارعها.. أو زراعه الشتلات مثل ماتفضلتي... او بأي طريقة تخطر في البال تساهم في الحفاظ على بيئتها او المظهر العام
مصر عادت لاهلها والحمد لله... فهي الان امانه في ايدي شعب مصر...

والصبر الصبر... فما افسد في ثلاثين عام لايمكن اصلاحة في ايام.

Ramy يقول...

عارفه كنت بكلم واحد

راح قالى طب دة كان طيار الطلعة بتاعت هيرجع و لا لأ

قولت له دة على اساس ان المشاة مثلاً كانو طالعين و معاهم كارت بلانش للعودة سالمين غانمين

كفايه بصراحة بعد اللى عمله ملهوش حق حتى يطلع باللى هوا لابسه

المفروض يتبهدل بين الدول

و يجى يتحاكم

......................ز

بعيد عن الموضوع

كل سنة و انت طيبة

المولد النبوى

M HELMY يقول...

انا كنت فكرك من الناس الماسوشيين اللي عايزين يكرموا مبارك ويمشوا في مسيرات بنحبك يا ريس بسبب كلامك اللي في الاول

انا مش مصدق ان في ناس كده فعلا