الاثنين، يناير 12، 2009

هل كوني مدونه ده يكون وصمه عار



بقالي كتير مش كتبت عن حاجه تقريبا


لكن كان في شي هيجنني من التفكير
وبصراحه قعدت افكر اكتبها لغه عربيه ولا اكتب زي مابتكلم كده
لقيت اني اكتب زي مانا عشان اطلع حاجه جوايا وارتاح
من يومين كنت انا وصحبتي بنتكلم وبنشوف المدونات
المهم بتقولي بت ياكيارا
قلتلها ايوه
قالتلي لو ناويه تحبي وتتجوزي بلاش تعرفيه التدوين
استغربت قولتلها ليه
قالتلي يعني مش طالبه خناق وطبعا كان كلامها لما حد بيقول مثلا دمك خفيف او انتي عثل كده يعني

وقفلنا الحوار لحد كده
ندخل بقي في اللي قعدت افكر فيه بعد كلامي انا وهي
هو انا كده غلط لما بكتب وحد يعجب باسلوبي مثلا
طيب ماشي جاوبت علي نفسي وقولت انا مش غلط

ولا بقول كلام مش مفهوم بالعكس انا افتخر ان كلامي بيوصل لاي حد
بس قولت ياتري افضل للانسان اللي ارتبط بيه اني اقوله اني مدونه
ودي مدونتي وده المدونات اللي بتابعها عندك في الناحيه الشمال
ولا اني مش اقوله وهو هيعرف منين مهو انا كيارا في النت مش بتعامل بالاسم الحقيقي

(طبعا رايي في الموضوع ده اني اصارحه عشان محسش اني بخون امانته وثقته فيا )

واصبح السؤال اللي بيدور في دماغي وشغااااااااااااااال يونيفرسال
هل اني بنت ومدونه اصبح وصمه عار اتكسف اني اقولها للانسان اللي هرتبط بيه
واني لو قلتله يبقي هتبدا حياتي في خناق وغيره وشك و.و....و.........

والنهايه المتوقعه اننا هنسيب بعض لسبب بسيط الشك والغيره الزايده اخرتهم معروفه
وطبعا لو عارف اني مدونه هتبدا المتابعه في اي كومنت بكتبه واي كومنت بيتكتبلي
يالهوي دي مش هتبقي حياه ابدا
طبعا انا مش بقول ان البنت مش تراعي الانسان اللي هترتبط بيه في كلامها وكله
بس انا بتكلم في نقطه هل كوني مدونه ده يكون وصمه عار ليا اخاف اقولها للانسان اللي هرتبط بيه
انت كراجل اهو هل تقبل ان زوجتك تدون
سيبك بقي من انك مدون وكده نفرض انك ملكش في التدوين خالص بس
وحبيت واحده واتقدمتلها وعرفت انها بتدون رد فعلك هيكون ايه
طيب بلاش نعكسها

انتي كمدونه او كانثي تقبلي ان زوجك يدون او يكون مدون
تقري اعجاب مثلا البنات اللي هما المدونات بكلامه او اسلوبه او المواضيع اللي بيطرحها
وهتتفهمي ده

ولا هتبدئي في دايره الغيره والشك بص بتقولك ايه بص فلانه بتعمل ايه

ولا تحبي انه مش يصارحك من الاساس

طبعا انا الموضوع مش شخصي بس كلمه صحبتي ليا هي اللي ثارت فيا الكلام ده

*******
طبعا انا مش قلت رايي في الموضوع ورايي هقوله في اخر كومنت
*****
تحياتي

كيـــــــارا

4 كلام قلوبهم:

Ramy يقول...

كيارا

حد داعى عليا وصلت للتدوينة بس بايظه

الكلام داخل على بعضة

تقريبا انتى بوظتى سباكة المدونة فرشحت ع البوست (:

هههههههههههههه

Ramy يقول...

كيارا

بالنسبة للتدوينة دى بقى

كلام غير منطقى انا لو هرتبط بواحدة مدونة دة هيكون فخر ليا

ليه لأن اللى هرتبط بيها انسانة بتفهم انسانه متفتحة

انسانة قادرة تشوف الناس التانية بتفكر ازاى

و بعدين لو حصل ارتباط الثقة فى الأنسانة اللى هرتبط بيها هتكون فى كل حاجة دا انا احترم انها قالت لى انها عندها مدونة اتعرف من خلالها على شخصيتها اكتر و اكتر

و تكون دى حاجة تقدر تربطنا اكتر ببعض

متكنش شيىء يبعدنا عن بعض

الأنسان الكويس كويس عموما مش فى المدونة وحش و الحياة كويس
و العكس

طبعا فى كلام كتير بس كده كفايه (:

تسلم ايدك (:

كيــــــــــــارا يقول...

الكلام مش داخل في بعضه ولا حاجه تب شوف بتاع العريس

كيــــــــــــارا يقول...

الله ينور عليك يارامي بجد هو دا الكلاام