السبت، يونيو 13، 2009

تاجييييييييييييين عاااااااااااااااااااااا


جالى تاج من حسن حنفى صاحب مدونة شيفا

بدأت تدون من امتي ؟ و دخلت العالم ده ازاي ؟

كنت مشتركه مع مدونه انتيمتي مجرد انسانه وبس ودي من سنه ومن شهرين تقريبا عملت مدونه ضي القمر للمواضيع الاجتماعيه وايام زمان لمواضيع التاريخ لكن بكتب من سنتين في المنتديات وطبعا بعمل ابحاث تاريخيه عشان دراستي

ايه كان انطباعك في البداية ؟

طبعا انا كنت عامله المدونه مجرد ارشيف لكتاباتي وعارفه ان مش فيي حد هيزورها وكدا ازاي حد يزورني وانا مش معروفه وكدا وكنت مهتميه اكتر بالمنتدي اللي انا فيه لاني معروفه هناك ومعروف اسلوبي لكن في عالم التدوين مش كنت متوقعه ان ممكن حد يزورني

مين اكتر واحد بتهتم بتعليقه علي بوستك الجديد ؟

اللي بهتم بتعليقهم اكيد انا مسجله مدوناتهم عندي كمان بهتم باي واحد جديد بيعلق عندي بجري علي مدونته اعرف منها هو ايه نوع المواضيع اللي بيفضلها وبفهم اسلوبه عشان اعرف ارد علي الكومنت اللي سابه

ايه أهم حاجة اتعلمتها من عالم التدوين ؟

اني اهتم بالنفس البشريه كل مدونه بتعبر عن صاحبها سوا شكلا او اسلوب المواضيع

ايه أكتر حاجة كرهتها ؟

ان في مدونات بتجيب كل مصايب مصر واكن مصر مفهاش ميزه خالص


حاسس ان التدوين له تأثير ؟

طبعاااااااااااااااااااااااا اكبر تاثير ان رئيس الوزراء بيزور المدونات وده بدايه كويسه ان صوتنا بيتسمع


تهدى التاج لمين ؟

اهديه لميييييييين

طفله مش عاوزه تكبر

كلام من القلب

دردشه عربي

مش عارف





طبعا التاج ده جالي من حسن حنفي صاحب مدونه شيفا

وجالي من سيفين صاحب مدونه مش عارف


س 1-أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟

انسان بلا حلم يبقي بلا حياه او هدف الحلم بيكون بدايه لطريق نسير فيه بس احلام الماضي ممكن تكون هي هي احلام المستقبل بس هحاول اشوف احلام انتهت

الحلم الاول : كنت متفوقه جدا في ماده الرياضيات علي مدار السنين وكنت بطلع الاولي علي المدرسه فكنت بحلم ادخل علوم قسم رياضه طبعا حلم لم يتحقق عشان بابا اصر علي ادبي ماعلينا

الحلم الثاني : كنت بتعلم موسيقي وكنت باخد درس فيها وكنا بنعذف مقطوعات جامده لام كلثوم وفريد الاطرش وحليم وبرده بنعذف للجيل بتاعنا وكنت وصلت لمرحله ان لما اكون مخنوقه امسك الاورج او الناي واعزف اي حاجه المهم اقدر اخرج من المود وكنت عاوزه اكمل في الطريق ده بس برده كان في معارضه شديده من البيت وبابا قال عاوزه تعزفي او اي حاجه في البيت لكن مش تستمري في المجال ده اني ادخل معهد موسيقي وكدا

الحلم الثالث : الرسم اقرب حاجه ليا وكنت بهدي لاصحابي زمان حاجات انا رسماها وهما اللي بيختاروا ده وكنت برسم علي الزجاج يعني كانت هوايه علي ادي بس لما دخلت الكليه كنت كل اما اجي امسك الورقه والقلم وارسم الاقي سيل من الصوت العالي فين مذاكرتك و...و... ويوم ورا يوم اصبح الرسم بعيد المنال

الحلم الرابع : لما دخلت كليه الاداب كنت عاوزه اتخصص في اللغه الفرنسيه لاني فعلا كنت عاشقتها بس الكليه بقي اعترضت لان لازم يكون لغتي الاولي فرنسي او من مدارس فرنسيه

وطبعا كنت حزينه جدا واختارت تاني ماده بحبها التاريخ بس جيت بقي وانا في تانيه كليه الشرط اللي كان علي اللغه الفرنسيه اتغير وبقي اني اكون جايبه في الماده الفرنسيه لا يقل عن 45 من 50 وطبعا ده كان متحقق بس قلت هضيع سنه وخلاص انا اندمجت مع مود التاريخ

الحلم الخامس : ان اعيش في مكان فيه حساب للجيره والناس فيه كلهم عارفين بعض وقلبهم علي بعض مش زي مانا دلوقتي وقبل كده كل الاماكن اللي بسكنها عمارات ومبعرفش شكل جيراني ايه

س 2-أذكر 5 أحلام على الأقل تخص مستقبلك ؟

الحلم الاول : كاي بنت بتحلم تحب وتتحب وتحس بحب وحنان واحتواء حبيبها

الحلم الثاني : العفاريت وهو طبعا انجاب اطفال ينورو الدنيا ويحسسوني اني فعلا عايشه لان بجد الاطفال بالنسبه ليا حاجه كبيييييره اوي يمكن كتير بيعتبروني طفله بسبب اندماجي السريع مع الاطفال ببقي اقل سننا منهم

الحلم الثالث : طبعا انا بعمل دراسات عليا بجد بحلم اكمل الطريق فيه لكن الله اعلم ايه هيحصل في المستقبل

الحلم الرابع : اني اشتغل في المجال اللي بحبه لان انا مجالي شي ودايما الشغل اللي بيجيلي شي تاني

الحلم الخامس : اكفل طفل يتيم

س 3-أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟

نورا : انتيمتي الغاليه

مني : اختي وصديقتي

زهره اللي هي ليدي بنتوتي

دول بجد كنت بحلم يكونوا معايا من يوم ميلادي في الدنيا دي

س 4-أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟

جدي الله يرحمه بجد كنت بحلم يكون شيفني دلوقتي حاسس بيا حاسس بالمي حاسس بفرحي جدي اللي كنت الدنيا ليه بجد هو معايا مع انه توفي من وانا في تانيه ابتدائي

الشخص التاني خاله ماما بجد مش شفت حد في حنيتها وطيبتها بجد اتمني وجودها بس الله يرحمها توفت من كام شهر

5-لمن تهدي هذا التاج ؟

ماما اموله

طفله مش عاوزه تكبر

كلام من القلب

دردشه عربي

13 كلام قلوبهم:

elsha3er يقول...

السلام عليكم نحجز بس

elsha3er يقول...

تمام كدة يارب تكونى بخير وربنا يكتر تاجاتك معلش بقى بقالنا كتير ما جناش عشان ظروف الامتحانات

بس ان شاء الله اكون متابع جيد


تحياتى


احمد الشاعر

بنوتة يقول...

هاي
يارب يجيلك 1000000000000000000000 تاج
اجاباتك جميلة و مقنعة و بالذات في التاج الأولاني

engy يقول...

ماشاء الله اجابات جميله تدل على شخصيه رائعه

ضحكات الحياة يقول...

السلام عليكم

ايه التاجيين الحلوين دول
يا رب كل أحلامك تتحقق

لكن فعلا في حاج لفتت نظري جداااا في أحلامك اللي هو

"ان اعيش في مكان فيه حساب للجيره والناس فيه كلهم عارفين بعض وقلبهم علي بعض مش زي مانا دلوقتي وقبل كده كل الاماكن اللي بسكنها عمارات ومبعرفش شكل جيراني ايه"

طول حياتي برده أحب أني اعيش كدهاعرف كل اللي حواليا و نبقي زى العائلة الواحدة

و تقبلي تحياتي

rssamet_algera7 يقول...

السلام عليكم
اجابات رائعة من شخصية اروع
اعجبني طموحك وروحك الطفولية المرحة والمعطائة
ان شاء الله كل احلامك بتحقق
موفقة

احترامــيّ..

د.أحمد عثمان يقول...

رغم انني لا أحب أن أصاب بدوار التاج
الا انني أجد متعة كافية
لقراءة الأخرين عبر اعترفاتهم

و هنا قرأتك

تحية

3mR Wa2el يقول...

على فكرة الكلام دة حلو اوى و ردك منطقي وسهل اوي ربنا معاكي و يارب احلمك تحاولي تحققي جزء منها بالتوفيق ان شاء الله

Hina wi Hinak يقول...

نل سنة وإنت طيبة

الحــ ــزين يقول...

الحــ ــزين
انا اسف بس والله بحاول ادخل عندك بس للاسف انى ديما مش من المدعوين عند حضرتك عموما انا سعيد جدا انى اتشرفت بمعرفة حضرتك

sweet angel يقول...

جميله احلامك
واجاباتك عن التاج رائعه
سعيده جدا باكتشاف مدونتك

تقبلي مروري
تحياتي

rack-yourminds يقول...

اتمني عودتك للتدوين قريبا

كيــــــــــــارا يقول...

ميرسي جدا لكلامكم

بس دي البوستات بتاعت المدونة اللي اتهكرت

اما الان فانا بقيت علي اللينك دا

http://mulan22.blogspot.com/